Yesaya 17 - IBAYIBOLO 2024

U Chala akwiza pakubafunda aba Siliya naba Izilayeli

¹ Agha gho mazyu aghabulaghuzi ghagho ghakunena nizya Damasika: “Ennya, u Damasika atakwiza pakuba kaya akakulu nkani, loli akwiza pakuba chibunga icha visami.

² Utwaya utukulu nkani utwa mu Asiliya tukwiza pakuba tusita bantu, sona tukwiza pakuba buzilo ubwakudimilamo ivitekwa, atalipo nayumo yuyo akwiza pakuvyoghofya

³ Aba muchisu icha Efulayimu batakwiza pakuba ni ilinga ilya kuvwamilamo, ghope amaka agha bumwene mu Damasika ghakwiza pakumala; abakusyalako aba muchisu icha Asiliya, bakwiza pakuba ngati buchindamu ubwa ba Izilayeli.” U Mwene Uwamaka Ghosi anena.

⁴ “Pisiku lilalila ubuchindamu ubwa Izilayeli bukwiza pakumala, po umubili wache uwakwina ghukwiza pakughanda.

⁵ Kukwiza pakuba ngati po umwinuli yula, akwinula ingano zizyo zimiliye bulo, nukwinula ingano ninyobe yache, ngati muntu yuyo akusalala imitu iya ngano mwikombe ilya Lefayimu.

⁶ Loli imisyunguti yimo iyakusalalizya yikwiza pakusyalako, ngati kokuneng'ennya ukwa likwi lyache, lilyo likulekaghapo ivikomwa vibili pamo vitatu patusamba utwapamwanya, folo pamo fayivi mutusamba utwa pasi,” U Mwene, u Chala uwa Izilayeli anena.

⁷ Pisiku linili abantu bakwiza pakubikako umoyo kumupeli wabo, nu kwennya amaso ghabo ku Muzelu uwa Izilayeli.

⁸ Batakwiza pakwennya sona pavighemo, pamo imbombo izya nyobe zyabo, ni chifwani icha Ashela sona ni vighemo ivyakufukizizyapo utwakununkila vivyo bakapanga ni nyobe zyabo.

⁹ Pisiku lilalila utwaya utukulu nkani utwa maka, tukalekiwa tukwiza pakuba buzilo ubwa baluko ulwa ba Hivi nulwa ba Amoli, tuto tukasuliwa pachifukwa icha ba Izilayeli sona tukwiza pakuba visami.

¹⁰ Amwe mwamuluvya u Chala Umupoki winyu, mutakumukumbuka yuyo lyalabwe linyu ilyakuponelamo. Polelo, napapo mukabyala imbeyu inyiza, nukwitikizya imbeyu iya bachala abayeni,

¹¹ napapo pisiku lilyo ukuzibyalilagha, nukuzipela ukuti zikulaye, mukazibyalagha pandabindabi nukuzipela ukuti zibazye ubwezya, loli inyinulo yitakwiza pakubangako, pisiku ilya ntamyo nukubaba kuko kutakumala nalumo.

¹² Chighune ku inko inyinji zikuzuma ichongo, ukuzuma kuli ngati kupoma ukwa nyanja! Chighune ku inko, zizyo zikuzuma ichongo, ngati kupoma ukwa mizi aminji nkani!

¹³ Napapo inko zikuzuma ngati kupoma ukwa mayigha, bo aghachemela ghakuchimbilila kubutali, ghakuchimbila pantazi pa mpepo ngati lyelelo pighamba, sona ngati lufumbi ulwa kankungu.

¹⁴ Pachamabwila, kukuba ukoghofya! Bo kuchili pakucha bakuzyebeluka! Ichi cho chigaba icha bantu babo bakutufyula. Ubu bo bumalilo ubwa bantu babo bakufyula.