Yesaya 16 - IBAYIBOLO 2024

Aba Mowabu batagha ulusubilo

¹ Aba Mowabu batuma umwana uwa ng'ozi, pakuba chabupi kumulaghili uwa chisu, ukwanda ku kaya aka Sela, ukudumusannya munkolongo, mupaka kwi ghamba ilya Ziyoni.

² Ngati mumo utuyuni tukubulukila ukwepa pachivulumbo, momumo babeleye abakolo aba mu Mowabu, piloboko ilya lusoko ulwa Alinoni.

³ Bakubabuzya abantu aba ku Yuda ukuti, “Mutubuzye ichakubomba, dumula zizyo tubombaye. Mughupelaye umuzyezye winyu ngati busiku pamusanya. Mubafisaye babo bakachimbiziwa kubwite, mutakatubikaye munyobe izya balwani.

⁴ Mutuleke aswe twe tukuchimbiziwa twikalaye poka namwe, mubanje chakuponelamo chitu kuwa kunangannya witu.” Umuyivyi akwiza pakumala sona ukunanganika kukwiza pakuleka, uwakukanyankila akwiza pakuzyebeluka pachisu.

⁵ Ichitengo icha bumwene chikwiza pakwikalana mulughano, po weka uwa luko ulwa Devedi akwiza pakwikalapo mubusubiliwa, akwiza pakulongela mubwanaloli sona walubilolubilo pakubomba ubugholosu.

⁶ Twivwa nizya kwituvya ukwa Mowabu namumo akwikwezya nkani, ukwitutumula sona na madinko ghache loli ukwitutumula kwache kwa bulo.

⁷ Polelo aba Mowabu bakulila inkuta, po bosi bakubalilila aba muchisu icha Mowabu. Balilaye ni chitima pachifukwa icha vibama ivya mampesya, vivyo bakalyanga mu Kili Haleseti.

⁸ Amaghunda agha mu Heshiboni ghafoka, sona ghope na mampesya agha mu Sibima ghafoka. Abalaghili aba inko bakanyankila amampesya amiza nkani, ghagho ghakafika ku Yazeli mupaka ku nkolongo. Isamba zyache zikafika mupaka kwisila ilya nyanja.

⁹ Po nkulila, ngati mumo aba Yazeli bakulilila, pachifukwa icha mughunda uwa mampesya uwamu Sibima. Wee Heshiboni, wee Eleyale nkukulilila amasozi! Ukulila ukwa bantu aba mu Yazeli, pachifukwa icha mampesya agha mu Sibima, pate inyinulo iya kubapela abantu ukuti basekelaye.

¹⁰ Ulusekelo nukuhoboka vyasendiwa, ukufuma mumaghunda gha vikomwa, atalipo nayumo yuyo akwimba, pamo akukolomoka mumaghunda agha mampesya, sona atalipo nayumo yuyo akukama uvinyo, apakukanyilapo uvinyo, pakuti namazya ichongo icha bakukama uvinyo.

¹¹ Umoyo wane ghukumulilila u Mowabu ngati chinanda, umuzimu wane ghukumulilila u Kili Helesi.

¹² Bo u Mowabu akwilanjizya pabuzilo bwache ubwapamwanya, akwilitizya bulo mwene, nanti akubuka kunyumba zyache izya kwiputilako abachala bache, vitakubendelagha akiza.

¹³ Agha gho mazyu ghagho u Mwene akanenela zila ukuyana nu Mowabu.

¹⁴ Loli ilelo u Mwene akuti, “Mumaka matatu, ghali ngati maka agha kumusimba uwa mbombo, ubuchindamu ubwa Mowabu na bantu bache abinji bakwiza pakusamuliwa, napapo ali na bantu abinji nkani, abakupona bache bakwiza pakuba banandi bulo sona na badedebazu.”