Yesaya 15 - IBAYIBOLO 2024

U Chala akwiza pakubanangannya aba Mowabu

¹ Agha gho mazyu aghabulaghuzi ghagho ghakunena nizya Mowabu: Akaya aka Ali mu Mowabu kaba chisami, nukunanganika mubusiku boka bulo, Akaya akakulu nkani aka Kili mu Mowabu kaba chisami, nukunanganika mubusiku boka,

² abantu aba muchisu icha Diboni bakubuka kunyumba iya kwiputilamo pakubalilila, aba muchisu icha Mowabu bakukalilila akaya aka Nebo naka Medeba. Po umuntu wesi amwiye isisi ni ndevu pachifukwa icha chitima.

³ Mumisebo bakuvwala amasaka; patusonje utwa nyumba na muminalo bakulila nkani

⁴ Abantu aba mu Heshiboni naba Eleyale bakulila, amazyu ghabo ghakwivwika mupaka ku Yahazi. Polelo abalwabwite aba mu Mowabu bakulila, amoyo ghabo ghazilikite.

⁵ Umoyo wane ghukuchililila ichisu icha Mowabu; bo abantu bache bakuchimbilila kukaya aka Zowala, mupaka Egilati Shelishiya. Bakukwela ichikwezya icha izila iya ku Luhiti, bo bali pakulila mumusebo uwaku Holonayimu bakulila inkuta iya kunanganika.

⁶ Utusoko utwa Nimulimu tupuye, sona isote lyafoka, katalipo nakamokamo akabisi akakulekiwa.

⁷ Po ubukabi bubo bali nabo na vivyo bakasungagha, bakusenda nukuloboka navyo vyosi kwi Kombe ilya Mafyomi.

⁸ Ukulila kwabo kwivwika mupaka kumpaka iya Mowabu, Ukufwifwitila kwabo kwivwika mupaka ku Egilayimu, Inkuta yabo yivwika mupaka ku Beyele Elimu.

⁹ Amizi agha mukaya aka Diboni ghizuye ni banda, loli inchili indi navyo ivyinji ivyakubayivizya aba Diboni, zyo nkalamu paba Mowabu babo bakapona, sona na babo bakalekiwa muchisu.