Yesaya 13 - IBAYIBOLO 2024

U Chala akwiza pakuchifunda ichisu icha Babiloni

¹ Amazyu aghabulaghuzi ghagho ghakunena nizya Babiloni ghagho u Yesaya umwana uwa Amozi akapokela:

² Kwezya indembela pakaghamba kako kate na makwi, nukubakolomokela, mubakopezye ni nyobe, pakuba chimanyilo pakwinjila pamulyango uwa kaya aka muchizi kala.

³ Ane ne Mwene nabalamula abazelu bane, nabitizya abalwabwite bane ukuti bakwanilisye ubukali bwane babo bakusekela mubupoti bwane.

⁴ Teghelezya, ichongo pamaghamba, ngati chachilundilo ichikulu nkani! Teghelezya, ichongo ichikulu nkani pakasi pamabumwene, ngati inko zizyo zikubungana poka! U Mwene Uwamaka Ghosi akubabungannya abasilikali bache, ukuti balwe ubwite.

⁵ Bakufuma kuvyisu ivya kubutali, kubumalilo ubwa chisu ichapasi, u Mwene ni vilwilo ivya bukali bwache, akwiza pakuchinangannya ichisu chosi ichapasi.

⁶ Fwifwitilagha, pakuti isiku ilya Mwene lili papipi, likwiza ngati kunangannya ukufuma ku Wamaka Ghosi.

⁷ Pachifukwa chinichi, inyobe zyosi zikwiza pakuba dedebazu, sona umoyo uwa muntu wesi ghukwiza pakusungulaka.

⁸ Ivyakoghofya nivyakubaba vikwiza pakubalema, bakwiza pakuba mububavu ngati, mukolo yuyo ali pakupapa. Bakwiza pakuswighanagha, ivyeni vyabo vikwiza pakuba ni soni.

⁹ Ennya, isiku ilya Mwene likwiza, isiku ilyakoghofya, isiku ilya bukali nukukalala kwache ukwakoghofya pakuchipela ichisu pakuba chisami sona nukubanangannya ababomba mbibi mulamula.

¹⁰ Intondwa izya kumwanya ni vibunga vyabo vitakwiza pakulama. Izuba lilyo likulama likwiza pakuba muchisi, ghope umwezi ghutakwiza pakulama.

¹¹ Nkwiza pakuchifunda ichisu ichapasi pachifukwa icha mbibi zyache, ababibi pambibi zyabo. Nkwiza pakumazya ukwituvya ukwa bakwitutumula, nukubisya pasi aba kwikwezya sona na bakali.

¹² Nkwiza pakubapela abantu pakuba bapamwanya nkani, ukuchila ugolide umwiza uwamu Ofili.

¹³ Polelo nkwiza pakukuneng'ennya kumwanya; sona ichisu ichapasi chikwiza pakwepa pabuzilo bwache, zinizi zikwiza pakubombiwa, pachifukwa icha bukali ubwa Mwene Uwamaka Ghosi, pisiku ilya kwaka ukwa kukalala kwache.

¹⁴ Ngati mbabala yiyo yikubingiwa, ngati ng'ozi yiyo yite nu mudimi, umuntu wesi akwiza pakunyokela ku bantu bache, umuntu wesi akwiza pakuchimbilila kuchisu ichache ni chache.

¹⁵ Umuntu wesi yuyo aghiwa akwiza pakulasiwa sona yuyo alemiwa akwiza pakughoghiwa nupanga.

¹⁶ Ababonda babo bakwiza pakubamiziwa pasi bo abapapi babo bakwennya, inyumba zyabo zikwiza pakufyuliwa nukubalema pamaka abachi babo.

¹⁷ Ennya, nkubavundumuzya aba Mediya pakulwa nabo ubwite, babo batakupasikizyako nu siliva sona batakuhoboka nu golide.

¹⁸ Ubwele bwabo bukwiza pakubaghogha abalumendo, batakwiza pakubapelelagha ichisa ababonda, pamo pakuba nichililizi na bana.

¹⁹ Sona akaya akakulu nkani aka Babiloni, kako kaya aka buchindamu ubwa bumwene, abantu bakwituvya nu Babiloni. Loli ane ne Chala nkwiza pakumunangannya, ngati mumo nkamunanganizizya u Sodomu nu Gomola.

²⁰ Abantu batakwiza pakwikalamo, pamo aba Alabu batakwiza pakuzengamo ivisakasa vyabo, pamo abadimi abang'ozi ukudimamo.

²¹ Loli ivipeliwa ivya munkolongo vikwiza pakughonagha mulamula, inyumba zyabo zikwiza pakwizula na kambwe, na masisimusi ghakwiza pakwikalagha mulamula, ni mbuzi izya munkolongo zikwiza pakunyelanyela mulamula

²² Abalabwe bakwiza pakulilagha muvipinda ivya nyumba zila, bope abakambwe bakwiza pakuba mubuzilo ubwiza munyumba izya bumwene. Akabalilo kache kali papipi, sona namasiku ghache ghatakwiza pakwendelela.