Yesaya 11 - IBAYIBOLO 2024

Ubumwene ubwa mutende

¹ Akasamba kakwiza pakufuma muchisinko icha Yese, akasamba akanandi kakwiza pakwela ivikomwa ukufuma kumagululuzi ghache.

² Umuzimu uwa Mwene akwiza pakwikala papache, Umuzimu uwa mahala nu wakwivwisya ivintu, Umuzimu uwakumanyisya amahala nu wamaka, Umuzimu uwa bumanyi nu wakumunyila u Mwene

³ akwiza pakuhoboka pachifukwa icha kumunyila u Mwene. Atakwiza pakulonga inongwa pakwennya icheni icha muntu, pamo pakudumula pazizyo akwivwa bulo,

⁴ loli nu bugholosu akwiza pakubalongela abapotwe, nukubadumulila abapina mubwanaloli aba muchisu ichapasi. Akwiza pakuchikoma ichisu ichapasi nindisa iya mumulomo wache, umuyi uwa milomo yache gho ghukwiza pakubaghogha ababomba mbibi.

⁵ Ubugholosu bo bwikiza pakuba we lamba wache sona ubusubiliwa bo bukwiza pakuba chakwipinya icha mumusana wache.

⁶ Abakambwe bakwiza pakwikala poka na kana aka ng'ozi, uzyela wepe akwiza pakughona poka ni mbuzi, ingwata ni nkalamu, abana aba nkalamu bakwiza pakulya poka ni ngwata sona umwana umunandi weyuyo akwiza pakuzidimagha.

⁷ Ing'ombe zikwiza pakulya poka na balabwe, utwana twabo utunandi tukwiza pakughona poka, sona inkalamu yikwiza pakulya isote ngati ng'ombe.

⁸ Ubonda akwiza pakwangalagha papipi ni chiliba icha swila, umwana umunandi akwiza pakubika inyobe yache muchivulumbo icha chipili.

⁹ Mutakwiza pakubamo ukuvulaziwa, pamo ukunanganika pighamba lyane izelu, pakuti ichisu chikwiza pakwizula nu bumanyi ubwa Mwene ngati mumo amizi ghizuliye munyanja.

¹⁰ Pisiku lilalila Weka uwa banyenya aba Yese akwiza pakwima ngati chimanyilo icha inko zyosi, zikwiza pakumulonda, po ubuzilo bubo akwikalapo bukwiza pakuba buchindamu.

¹¹ Pisiku lila u Mwene akwiza pakulanjizya amaka ghache akabubili, pakubabwezya abantu bache abakusyalako ukufuma kuvyisu ivi, Asiliya na kuchigaba icha kuntede ku Ijiputi na kuchigaba ichakumitu icha Ijiputi nu Etiyopiya nu Elamu nu Babiloni nu Hamati na musungo zyosi izya Nyanja iya Medeteleniya.

¹² Akwiza pakukwezya indembela ku inko, nukubabungannya abazya, babo bakanyapana muchisu icha Izilayeli nicha Yuda, ukwanda kunkuto zyosi izya chisu.

¹³ Akabini aka Efulayimu kakwiza pakumala, sona babo bakumuyivya u Yuda bakwiza pakudumuliwa, u Efulayimu atakwiza pakuba nakabini nu Yuda, pamo u Yuda kwa Efulayimu.

¹⁴ Bakwiza pakubanyelela aba Filisiti kubwinjililo bwizuba, po bosi poka bakwiza pakubafyula ivintu abantu abakubufumilo bwizuba. Bakwiza pakubika inyobe zyabo paba Edomu nu Mowabu, aba Amoni bakwiza pakubalambila.

¹⁵ U Mwene akwiza pakupwezya amizi agha munyanja inkulu nkani iya Ijiputi, ninyobe yache akwiza pakutuma impepo, iya kocha palusoko ulwa Yufuleti. Akwiza pakulugabannya ulusoko lula, mutusoko seveni ukuti abantu balobokaye ni nkwato zyabo.

¹⁶ Pakwiza ukuba umusebo uwa bantu bache, abakusyalako aba muchisu icha Asiliya, ngati mumo zikabela naba Izilayeli bo bakufuma mu Ijiputi.