Yesaya 10 - IBAYIBOLO 2024

¹ Chighune kubabo bakupinya indaghilo imbibi, sona kubabo bakusimba indaghilo izya kubayivya abamwabo,

² bakukana pakubalongela abapina mubugholosu, bakubafyula abantu bane ubwanaloli bwabo, nukubapela abafwilwe pakuzompola, nukufyula, abana abalanda.

³ Nkimba mukwiza pakubomba ichoni pisiku ilya lufundo, bo ukunanganika kukwiza ukufuma kubutali? Nkimba mukwiza ukuchimbilila kwa wenu ukuti mubwaghe ubwavwilizi? Nkimba mukwiza pakumulekela uwenu ubukabi bwinyu?

⁴ Chitalipo nachimo chicho chikwiza pakusyala, loli mukwiza pakulemiwa nukubuka, namwe mubuzya pamo pakughoghiwa. Pa zyosi zinizi, ubukali bwache butakutozoka, inyobe yache yichili yigholokite bulo.

Ichisu icha Asiliya chaba chibombelo icha Mwene

⁵ U Mwene akuti, “Chighune kuba Asiliya, indisa iya ukukalala kwane, munyobe zyabo muli intughu iya ubukali bwane!

⁶ Nkumutuma pakulwana ninko zizyo zitakumunyila u Chala, abantu babo bankalalizizye ane nkubatuma, nkumulamula ukuti azompole nukufyula, nukubakanyannya ngati matope agha mumusebo.

⁷ Loli te momumo zibeleye inyinong'ono zyache, izi tezyo zizyo akaba nazyo munyinong'ono zyache, ifundo yache yikaba yakunangannya, nukuzimala inko inyinji.

⁸ Akuti, ‘Nkimba abalongozi bane bosi tebo bamwene?

⁹ Nkimba akaya aka Kalino kate ngati ka Kalikemishi, Hamati ngati we Alipadi, Sona u Samaliya ngati we Damasika?

¹⁰ Inyobe yane yifikite kubumwene bubo bukwiputa ivifwani, ubumwene bubo ivifwani vyache vikaba vikulu, ukuvichila ivya mu Yelusalemu na mu Samaliya,

¹¹ Nkimba ntangamalana nu Yelusalemu ni vifwani vyache, ngati mumo nkabombela nu Samaliya ni vifwani vyache?’ ”

¹² Po u Mwene ayimalizya imbombo yache yosi Pighamba ilya Ziyoni na mu Yelusalemu akwiza ukunena ukuti, “Nkwiza pakumufunda u mwene uwamu Asiliya, pachifukwa icha mituvyo nukwikwezya.

¹³ Pakuti akuti, ‘Nabomba zinizi na maka aghane na ghane sona na mahala ghane, chifukwa ne wakwivwisya nefyapo impaka izya inko, nafyula ubukabi bwabo ngati nkambaku, nabawisya babo bali pavitengo ivya bumwene.

¹⁴ Inyobe yane yabwagha ubukabi ubwa bantu, ngati chivulumbo icha viyuni, sona ngati mumo umuntu akabunganizizya amafumbi agha kulekiwa, momumo nkuvibunganizizya ivyisu vyosi, patakabapo nayumo uwa kuneng'ennya ichipapande, pamo ukwighula umulomo wache nukulila.’ ”

¹⁵ Nkimba intemo yingikwezya ukuti yapamwanya, ukuchila yuyo akuyibombezya, pamo ichakubolela amatabwa chingituvya ukuti chapamwanya, ukuchila yuyo akuchibombezya? Chinichi chiyanite bulo ni ndisa pakumulema yuyo ayinyamuye, pamo intughu yikulonda pakumunyamula mumwanya yuyo te likwi ilyumizu!

¹⁶ Polelo, u Mwene Uwamaka Ghosi, akwiza pakubawisizya ububine, ubwa kughandizya abalwabwite abamaka, kusi ukwa buchindamu bwache ku kukwiza, pakwaka umoto ghugho ghutakuzimamo.

¹⁷ Ulukozyo ulwa Izilayeli lukwiza pakuba moto, Umuzelu uwa Izilayeli akwiza pakuba ngati kampesese aka moto, Pisiku lyoka bulo ghukwiza pakocha nukulungulizya amivwa na bantolovu bache.

¹⁸ Ubuchindamu ubwa misitu yache nu muvundo uwa mumaghunda ghache ghukwiza pakunanganikila zila, po pakwiza pakuba ngati mumo umuntu umubine akughandila.

¹⁹ Amakwi aghakulekiwa mumusitu wache ghakwiza pakuba manandi nkani, umwakuti nu mwana umunandi angaghabelenga.

Abakusyalako muchisu icha Izilayeli

²⁰ Mwisiku lila abakusyalako mu Izilayeli, na babo bakapona abamunyumba iya Yakobo, batakwiza pakumusubila yuyo akabayivyanga, naloliloli bakwiza pakumusubila u Mwene Umuzelu uwa Izilayeli.

²¹ Abakusyalako bakwiza pakunyokela, sona abakusyalako abamunyumba iya Yakobo bakwiza pakunyokela kwa Chala Uwamaka Ghosi.

²² Wee Izilayeli, napapo abantu bako bangaba binji ngati musesenga uwa munyanja, loli abakusyalako bo babo bakwiza pakunyokela. Ukunanganika kwalamuliwa sona kwizula nu bugholosu

²³ U Mwene Uwamaka Ghosi, akwiza pakuchinangannya ichisu chosi ichapasi ngati mumo akalamulila.

²⁴ Polelo, izi zyo zizyo u Mwene, u Mwene Uwamaka Ghosi, akuti, “Mwee bantu bane mwe mukwikala mu Ziyoni, mutakabanyilaye aba Asiliya, babo bakubasyempa ni ndisa nukubanyamusizya intughu, ngati mumo bakabombela aba Ijiputi.

²⁵ Pakuti kwasyala bulo akabalilo akanandi ukuti ukukalala kwane kumale, sona ubukali bwane bukwiza pakubanangannya.”

²⁶ U Mwene Uwamaka Ghosi akwiza pakubasyempa ni ndisa, ngati mumo akabombela naba Midiyani pibwe ilya Olebu, sona akwiza pakunyamusya indisa yache pamwanya pamizi, ngati mumo akabombela mu Ijiputi.

²⁷ Pisiku lila ukatundu wabo akwiza pakwefiwapo pavipunko vyabo, ikoli ilya musingo zyabo likwiza pakupyoka pachifukwa ichakwina kwinyu.

Ubwite ubwa ba Asiliya

²⁸ Bakwinjila mu Ayiti nukudumusannya mu Miguloni, nukubunganika ukatundu wabo pa Mikimashi.

²⁹ Bakudumusannya pabwinjililo ubwa kaya kala, nukughona isiku lyoka pa Geba. Abantu aba muchisu icha Lama bakutetema, aba mukaya akakulu aka Gibeya aka Sabuli bakuchimbila.

³⁰ Mwee bantu aba mu Galimu! Kolomoka nkani, mwee bantu aba mukaya akakulu nkani aka Layisha Teghelezya! Mwee bantu aba mukaya akakulu nkani aka Anatoti mubamule!

³¹ Abantu aba mukaya akakulu aka Madimena bakuchimbila, abantu aba mu Gebimu bakuchimbila ukuti bavwame.

³² Pisiku ili bakwiza pakwima pakaya akakulu aka Nobu, bakwiza pakuneng'ennya inyobe zyabo, pighamba ilya bantu aba mu Ziyoni, pakaghamba aka Yelusalemu.

³³ Ennya, u Mwene, u Mwene Uwamaka Ghosi akwiza pakubadumulannya, akwiza pakupalanta isamba izya makwi, sona akwiza pakudumulannya amakwi amatali nkani, Abakwituvya nabapamwanya bakwiza pakudumuliwa nukwisiwa,

³⁴ Akwiza pakubadumula ngati makwi mumusitu ni ntemo, umusitu ghukwiza pakudumuliwa nintemo, u Lebanoni akwiza pakuwa pantazi pa Wamaka ghosi.