Yesaya 1 - IBAYIBOLO 2024

¹ U Yesaya umwana uwa Amozi akennya ichisetuka chicho chikalingannyanga nizya chisu icha Yuda, sona nakaya akakulu nkani aka Yelusalemu pakabalilo aka Uziya nu Yotamu nu Ahazi, sona nu Hezekiya, babo bakaba bamwene aba mu Yuda.

U Chala akubachemela abantu bache

² Wee kumwanya, ivwa kuno, sona wee chisu ichapasi, teghelezya! U Mwene akuti, “Nkapapa abana nukubalela loli ilelo bansambukiye.

³ Inkambaku zimumenye umwenecho impunda yope yichimenye ichakulyelamo. Loli aba Izilayeli batakuzimanya, abantu bane batakwivwisya.”

⁴ Chighune, ku mwe luko ulubibi, mwe mwizuye ni mbibi, mwe baluko ulubomba mbibi abana babo banyonganite! Bamukanite u Mwene sona bamusulite Umuzelu uwa Izilayeli, nukumupa inkonto.

⁵ Nkimba mukulonda imbakome piyi, fwandi choni chicho mukusambuka bulo? Umutu winyu ghosi ghuvulaye sona amoyo ghinyu ghosi ghabinite.

⁶ Ukwanda kunyayo mupaka kumutu, patalipo napamopamo pabugwalazule, napapo paboliwe, sona ni vilonda ivyakukomiwa bulo umwakuti atalipo nayumoyumo umuntu uwakuvipinya, pamo ukupakazya amafuta.

⁷ Ichisu chinyu chaba chisami, sona utwaya twinyu utukulu nkani tochiwe numoto. Abayeni bakubafyula amaghunda ghinyu bo mukubennya. Ichisu chinyu chaba bulo ngati nkolongo, sona abendazila bakuchinangannya.

⁸ Akaya akakulu nkani aka Yelusalemu kasyala kene ngati chitembe mumughunda uwa mampesya. Kasyala kene ngati chisakasa mumughunda uwa ving'wela mizi, sona ngati kaya akakulu nkani kako kazyunguliliwe na basilikali.

⁹ Nanti u Mwene Uwamaka Ghosi, atakabalekapo abantu bamo abakupona, ngali twaba ngati we Sodomu nu Gomola.

¹⁰ Mwee balongozi aba mu Sodomu, ivwa amazyu agha Mwene. Teghelezya indaghilo izya Chala witu, mwee bantu aba mu Gomola!

¹¹ U Mwene akuti, “Nkimba ubwinji ubwa vyakwiyipa vyinyu cho choni kukwane? Intakuvinyonywa sona ivyakwiyipa vyinyu ivyakocha ivya ng'ozi, ivyakwiyipa ivya mafuta agha badubi nagha vitekwa ivyakwina, ntakuhoboka ni banda ilya nkambaku, nilya twana utwa ng'ozi sona nilya mbuzi.

¹² Nanti mukwiza pamaso papane, nkimba wewenu yuyo ababuzizye ukuti mwize navyo vinivi? Nkimba wewenu yuyo ababuzizye ukuti mukanyayemo muntanda izya Nyumba yane?

¹³ Mutakizaghe nalumo ni vyakwiyipa vivyo vite ni mbombo nayimoyimo, tope utwakufukizya twinyu utwakununkila utwa mwiko kukwane. Ulusekelo lwinyu ulwa Kupanta ukwa Mwezi nulwa Isiku Ilyakutuzya sona ninkomano izya masiku zitakunhobosya pachifukwa ichakuti vyizuye ni mbibi.

¹⁴ Mubumi bwane ndubengite nkani ulusekelo lwinyu ulwa Kupanta ukwa Mwezi, sona na masiku aghanji amapaghuliwa. Vyaba bulo ngati we katundu umung'wamu kukwane, sona nalita navyo pakuvinyamula.

¹⁵ Bo mukukwezya inyobe zyinyu mumwanya pakwiputa, nkwiza pakwighalila amaso ghane. Napapo inyiputo zyinyu zingaba ntali, loli ane ntakwiza pakuziteghelezya, pachifukwa ichakuti inyobe zyinyu zyizuye ni banda.

¹⁶ Musukusulaye munyobe zyinyu umwakuti muswepaye. Muzileke imbombo zyinyu imbibi pamaso papane, sona mutakabombaye ububibi.

¹⁷ Mumanyilaye pakubomba imbombo ingolosu, mubombelaye mubwanaloli, sona mubakazyanje abantu babo bakuyivyiwa. Mubasungililaye abana abalanda sona mubimilaye abakolo abafwilwe pa nongwa zyabo.”

¹⁸ Po u Mwene akuti, “Zagha tunenezannye. Napapo imbibi zyinyu zingaba chee ngati libanda, zikwiza pakuba swee ngati we kabefu. Napapo zingaba nchesamu loli zikwiza pakuswepa ngati busapa.

¹⁹ Nanti mukulonda nukunyivwila, mukwiza pakulya ivyiza ivya muchisu ichi.

²⁰ Loli nanti mukunkana nukunsambukila mukwiza pakughoghiwa nupanga.” Pakuti ane ne Mwene nanena.

²¹ Ennya akaya akakulu nkani akasubiliwa kabeleye, pakuba kaya aka bamalaya, kale kakabombagha ubwanaloli, sona ubugholosu bukaba mulamula loli ilelo kizuye na baghoghi!

²² Usiliva wako ate ni mbombo nayimoyimo, uvinyo wako umwiza onganikiye na mizi.

²³ Abalongozi bako basambuke, sona baba bo bamanyani aba biba. Baghanite nkani pakupokela amabeko, sona akabalilo kosi bakulonda vyo vyabupi. Batakubavighilila abana abalanda, pamo pakuteghelezya inongwa izya bakolo abafwilwe.

²⁴ Polelo u Mwene Uwamaka Ghosi, Uwamaka uwa ba Izilayeli akuti, “Mwee, nkwiza pakupungulila ubukali bwane pababo bakulwana nane sona nkwiza pakubatanizya abalwani bane.

²⁵ Nkwiza pakubafunda nkani, sona nkwiza pakubaswefya ngati chela mumo chikusunguluziwa pakwefya ububibi bosi.

²⁶ Nkwiza pakubanyosezyemo abalongi, bako ngati mumo bakabela kale, sona na bakukumanyisya amahala pakuba ngati po pabwandilo. Po ukwiza pakwitiziwa ukuti we Kaya akakulu nkani, Akagholosu sona Akasubiliwa.”

²⁷ Pachifukwa ichakuti u Mwene mugholosu, akaya akakulu nkani aka Yelusalemu kakwiza pakupokiwa, poka na bantu bosi babo bapinduka.

²⁸ Loli abakusambuka na bantu abambibi bosi bakwiza pakunanganika, sona bosi babo bakumukana u Mwene akwiza pakubazimizya.

²⁹ “Ukwiza pakukoziwa isoni pachifukwa ichakuti amakwi agha mupandapanda, ghagho ukahobokagha nagho. Ukwiza pakukoziwa isoni pachifukwa icha maghunda ghagho ukaghasala.

³⁰ Ukwiza pakuba ngati likwi ilya mupandapanda na mani ghache aghakufoka, ngati gho mughunda ghugho ghute na mizi.

³¹ Umuntu uwamaka akwiza pakuba mudedebazu, sona imbombo zyache ngati kampesese aka moto. Abantu bosi babili banaba bakwiza pakupyela poka, sona patakwiza pakubapo umuntu nayumoyumo uwakughuzimya umoto ghula.”