Yelemiya 9 - IBAYIBOLO 2024

¹ Mwee, nalondagha nkani ukuti u mutu wane ghube ngati mbwibi iya mizi nukuti amaso ghane ghabe ngati chiziba icha masozi! Umwakuti ngali nalila umusanya nubusiku pachifukwa icha bantu bane babo baghoghiwe.

² Mwee, nalondagha nkani ngati po ningaba ni nyumba munkolongo, umwakuti imbaleke abantu bane nukubepukilamo, pakuti bosi bo bamalaya, ichilundilo icha bantu babo bate basubiliwa.

³ U Mwene akuti, “Bakupeteka indimi zyabo ngati bwele pakulasa ubumyasi, ichisu chizuye nu bumyasi mubuzilo ubwakwizula nu bwanaloli. Batakutuzya pakubomba imbibi, sona nako kumumanya batamumenye.

⁴ Mube maso na bapalamani binyu, mutakabasubilaye abakamu binyu. Pakuti wesi muzimbuli, sona u mumanyani wesi we mwendanato.

⁵ Umumanyani akumuzimbula umumanyani, sona atalipo nayumoyumo yuyo akunena ubwanaloli. Bazimanyizizye indimi zyabo pakunena bo bumyasi, umwakuti nako kupinduka batangapinduka.

⁶ Bakubungannya ubumyasi pamwanya pabumyasi, ubuzimbuli pamwanya pabuzimbuli, mubuzimbuli bwabo bakukana pakummanya. Ane ne Mwene nanena.”

⁷ Polelo u Mwene Uwamaka Ghosi akuti, “Ennya, nkwiza pakubasekesa nukubayela, pakuti chitalipo nachimochimo chicho ningababombela abantu bane, pachifukwa icha mbibi zyabo.

⁸ Ululimi lwabo luli ngati kalasilo akakughogha, lukunena izyabumyasi. Numulomo wache akunena nulughano ku mupalamani wache, loli mumoyo wache, akumutegha nakapingo.

⁹ Nkimba ningaleka pakubafunda pa zinizi? Nkimba ntangalutanizya uluko lunulu?” Ane ne Mwene nanena.

¹⁰ Nkwiza pakukolomoka nukughalilila amaghamba sona nkwiza pakuyifwifwitila inkolongo, pachifukwa ichakuti ukwakudimako kwananganika. Kwaba chisami sona batakwendako ukumota ukwavitekwa kutakwivwikako. Iviyuni ni vinyamana vyachimbilamo.

¹¹ U Mwene akuti, “Nkwiza pakumupela u Yelusalemu pakuba chisami, numwakughonamo abakambwe, sona utwaya utwa Yuda utukulu nkani tukwiza pakumongoliwa, umwakuti nayumoyumo u muntu akwiza pakwikalaghamo.”

¹² Nkimba wewenu uwamahala yuyo angivwisya zinizi? Nkimba wewenu yuyo u Mwene akamulingannya ukuti abalingannye abanji? Nkimba choni chicho ichisu chaba chisami sona chananganika ngati yo nkolongo yiyo atalipo uwakwendamo?

¹³ U Mwene akamula akati, “Pachifukwa ichakuti abantu batazikonkite indaghilo zyane zizyo nkabapa sona bazikanite indaghilo zyane nu bumanyisi bwane.

¹⁴ Mubuzilo bwache bakonka amoyo ghabo amakafu, babiputa abachala babo aba Baala ngati mumo abanyenya babo bakabamanyizikizya.”

¹⁵ Polelo, u Mwene Uwamaka Ghosi, u Chala uwa Izilayeli akuti, “Ennya, nkwiza pakubalyesya abantu banaba ichakulya ichibabe sona nukubang'wesya amizi agha bwanga.

¹⁶ Nkwiza pakubanyampanizizya pakasi pa inko zizyo abene pamo abanyenya binyu batazimenye nalumo, nukubatumila abasilikali pakubamala bosi.”

Abantu bakulila pakulaba ubwavwilizi

¹⁷ U Mwene Uwamaka Ghosi akuti, “Mwinong'one nazizyo zikubombiwa! Mubitizye abakolo babo bamenye pakulila, nkaninkani abakolo babo bamenye nkani pakulila umwakukolomoka.

¹⁸ Bize umwalubilolubilo pakutulila, ukuti amaso ghitu ghafumaye amasozi, sona muvisighe vyitu mwizulaye amizi.

¹⁹ Ukulila ukwa Ziyoni kukwivwika, ‘Mwee twamala! Mwee isoni zyatulema! Tubaghiye pakwepamo muchisu chitu, pachifukwa ichakuti inyumba zyitu zyipela visami.’ ”

²⁰ Mwee bakolo, ivwa izyu ilya Mwene, Ighula amakutu ghinyu ukuti mwivwe zizyo akunena. Mubamanyisye abana binyu abalindu namumo bangimbila ulwimbo ulwa pamfwa, umuntu wesi amumanyisye umupalamani wache pakulila.

²¹ Imfwa yatwizila ukwendela mumabwindo ghitu, yinjila munyumba izya bumwene. Yatughoghela abana bitu mumisebo, sona yatumalila abalumendo bitu muminalo.

²² U Mwene akuti, “Imivimba yikwiza pakuba ngati gho muvundo ghugho balundikite mumughunda, ngati nkose izya ngano zizyo abinuli bazilekite mwisinda, sona atalipo nayumoyumo uwakuzibungannya.”

²³ U Mwene akuti, “Uwamahala atakituvyanje chifukwa icha mahala ghache pamo uwamaka atakituvyanje pachifukwa icha maka ghache, pamo umukabi atakituvyanje pachifukwa icha bukabi bwache.

²⁴ Wesi yuyo akulonda ukwituvya, ituvikizyanje muchintu ichakuti, ammenye sona akunyivwisya, ukuti ane ne Mwene uwachisa, uwanaloli, sona umugholosu pachisu ichapasi, pakuti nkuhoboka na zinizi. Ane ne Mwene nanena.

²⁵ “Ghakwiza amasiku ghagho nkwiza pakubafunda babo basilimuliwe ku mubili wene.

²⁶ Aba muchisu icha Ijiputi nu Yuda nu Edomu nu Amoni nu Mowabu sona na babo bakwikala munkolongo babo bakumwa isisi zyabo. Pakuti inko zyosi zinizi zitasilimuliwe sona bope aba Izilayeli batasilimuliwe mumoyo.”