Yelemiya 8 - IBAYIBOLO 2024

¹ “U Mwene akuti, ‘Pakabalilo kalakala abantu bakwiza pakwefyamo mumapumpa, amafupa agha bamwene aba mu Yuda sona nagha makambala ghabo agha mu Yuda, amafupa agha baputi na balaghuzi, na mafupa agha muntu wesi uwamu Yelusalemu.

² Ghakwiza pakunyampaniziwa kwizuba na kumwezi sona ni tondwa zyosi vivyo bavighanite nkani nukuvibombela sona vivyo bavikonka nukulabako amahala nukuvyiputa. Batakwiza pakughabungannya amafupa ghala pamo ukughasyila, loli ghakwiza pakuba muvundo pamwanya pitope.

³ Kosi kuko nkabachimbizizyako, abantu bosi babo bakapona abaluko ulubibi aba bakwiza pakubulonda ubufwe ukuchila ubumi. Ane ne Mwene Uwamaka Ghosi nanena.’

Imbibi nulufundo

⁴ “Ubabuzye uti, ‘Umu momumo u Mwene akunenela: Nanti abantu bawa, nkimba batakunyamuka sona? Nanti abantu bapulumpa, nkimba batakunyokela sona?

⁵ Po nkimba chifukwa choni chicho abantu banaba bapulumpa? Nkimba choni chicho u Yelusalemu akwendelela pakunyokela kwisinda? Babukakatiye ubumyasi, bakukana pakunyokako.

⁶ Nabateghelezya nkani ku zizyo bakunena loli batakunenapo nazimozimo ingolosu. Atakabapo nayumoyumo uwakuzileka imbibi zyache, nukunena ukuti, “Nkimba nananga choni?” Loli umuntu wesi akubuka ku zila izyache ni zyache, ngati yo falasi yiyo nyengo nkani pakulwa ubwite.

⁷ Inyangenyange ni nkunda ni nkwale nu sele vikamenye akabalilo kabo aka kunyamukila ubulendo. Loli abantu bane batazimenye indaghilo izya Mwene.

⁸ “ ‘Nkimba munganena bulibuli ukuti, “Aswe tuli namahala, pakuti tuli nu lulaghilo ulwa Mwene.” Loli mumanye ukuti abasimbi binyu bo babo basimbite izinji bulo zizyo zyabumyasi?

⁹ Abamahala bakwiza pakukoziwa isoni, amahala ghakwiza pakubamalila sona bakwiza pakulemiwa. Pakuti balikana izyu ilya Mwene, nkimba bali na mahala ghoni?

¹⁰ Polelo nkwiza pakubalemeka abachi babo abanavuli abanji sona amaghunda ghabo ku bantu abanji. Pachifukwa ichakuti ukwandila ku bana mupaka ku basongo bosi banaba bakunyonywa ukukabila ichuma muzila izya buzimbuli. Abalaghuzi na baputi bulo bosi bazimbuli.

¹¹ Bakupozya ivilonda ivya bantu bane pamwanya bulo. Bakunena bakuti, “Umutende, umutende,” loli bo umutende ghutalimo naghumoghumo.

¹² Nkimba bate ni soni pakubomba ivinyazu vinivi? Awe, bate ni soni nazimozimo sona batakuwisya ivyeni vyabo pasi. Pakuti bakwiza pakuwila poka na bamwabo babo bakawa kale. Bakwiza pakuwila zila bo nabafunda. Ane ne Mwene nanena.’

¹³ “U Mwene akuti, ‘Nkwiza pakwefyako inyinulo yabo. Ivikomwa vitakwiza pakubamo mu mampesya. Ivikomwa vitakwiza pakubamo mu makwi agha makuyu, sona amani ghache ghakwiza pakufoka. Nkwiza pakubafyula ivintu vivyo nkabapa.’ ”

¹⁴ Abantu bakuti, “Nkimba choni chicho twikaye pano? Bungana poka! Zagha tuchimbilile ku malinga agha mutwaya utukulu nkani nukuzimila kulakula! Pakuti u Mwene u Chala witu adumula ukuti tubaghiye pakufwa, sona atung'wesya amizi agha bwanga, pakuti twamunangila.

¹⁵ Tukalondagha umutende loli ivintu vitakatwendela akiza tukalondagha ukupoziwa loli kukabako ukoghofya kwene.

¹⁶ Abalwani bitu binjiye kale mukaya akakulu nkani aka Dani, Bo ifalasi zyabo zikulila, ichisu chosi chikutetema. Abalwani bizite pakunangannya ichisu chitu, poka na vyosi vivyo vili mumo, akaya akakulu nkani sona na bantu babo bakwikala mulamula.”

¹⁷ U Mwene akuti, “Ennya nkwiza pakubatumila injoka pakasi papinyu, abachipili babo atalipo nayumoyumo yuyo angabafunga, sona bakwiza pakubaluma. Ane ne Mwene nanena.”

U Yelemiya ali ni chitima na bantu

¹⁸ Ukubaba ukwa moyo wane kute numulembo naghumoghumo, umoyo wane wawa amaka.

¹⁹ Ivwa ukulila ukwa bantu bane abakufuma kuchisu icha kubutali, “Nkimba u Mwene atalimo muchisu icha Ziyoni? Fwandi u mwene atalimo mulamula?” U Mwene akwamula akuti, “Nkimba choni chicho bakunkalalizya ni vifwani vyabo? Sona ni vifwani vyabo iviyeni vivyo vite nimbombo nayimoyimo?”

²⁰ Abantu bakuti, “Akabalilo aka nyinulo kamalite, akabalilo aka chisanya kachila, loli pope bulo tuchili tutapokiwe.”

²¹ Pakuti abantu bane bavulaye, nane invulaye, nkulila sona indi nubogha.

²² Nkimba ku Giliyadi ghutaliko u mulembo uwakupozezya? Nkimba ataliko nayumoyumo umughanga kulakula? Po nkimba choni chicho ivilonda ivya abantu bane vitakupola?