Yelemiya 7 - IBAYIBOLO 2024

U Yelemiya akulumbilila mu Nyumba iya Chala

¹ U Mwene akamubuzya u Yelemiya akati,

² “Imilila pamulyango uwa Nyumba iya Mwene nukulumbilila amazyu aghakuti, ‘Ivwa amazyu agha Mwene mwe bantu bosi aba mu Yuda mwe mukwinjila pamilyango iyi pakumwiputa u Mwene.

³ U Mwene Uwamaka Ghosi, u Chala uwa Izilayeli akuti: Yannya inkalo zyinyu ni mbombo zyinyu, po nkwiza pakubitikizya pakwikala pabuzilo ubu.

⁴ Mutakaghasubilaye amazyu agha bumyasi ghagho ghakuti, “Iyi yo Nyumba iya Mwene, Inyumba iya Mwene, Inyumba iya Mwene!”

⁵ “ ‘Nanti naloliloli mukuyannya inkalo zyinyu ni mbombo zyinyu sona mukulongelana mubugholosu,

⁶ nanti mutakubakanyilila abayeni, abana abalanda, pamo abafwilwe, sona mutakukupula ibanda ilya bantu babo bate ninongwa pabuzilo bunubu, sona mutakubakonka abachala abanji ukuti batakabanangannye,

⁷ po nkwiza pakubitikizya pakwikala pabuzilo bunubu, muchisu chicho nkabapa abanyenya binyu ukuti chibanje chabo bwila na bwila.

⁸ Loli ennya, amwe mukughasubila amazyu agha bumyasi ghagho ghate ni mbombo nayimoyimo.

⁹ “ ‘Amwe mukwiba, mukughogha, mukulowa, mukulapa, mukumochela u Baala utwakununkila sona mukubakonka abachala babo mutabamenyemo nalumolumo.

¹⁰ Po pakwimilila pamaso papane munyumba yiniyi, yiyo yili Mwitabwa lyane, nukunena ukuti, “Aswe twapona,” loli mukwendelela pakubomba ivintu ivinyazu.

¹¹ Nkimba mukwinong'ona ukuti Inyumba yane yo mpako iyakuvwamilamo amavyondongo? Loli nemwenecho nkuvyennya vyosi vivyo mukubomba! Ane ne Mwene nanena.

¹² “ ‘Po mubukaye ku buzilo ubwa mukaya aka Shilo mumo nkandila pakubikamo Itabwa lyane, po mwennye zizyo nkababombela akaya kala pachifukwa icha mbibi izya bantu bane aba Izilayeli.

¹³ U Mwene akuti bo mukubomba ivintu vyosi vinivi, sona bo nkunena namwe kabilikabili, mutakateghelezya, bo nkubitizya mutakanyamula.

¹⁴ Polelo, zizyo nkababombela akaya aka Shilo, zyo zizyo nkwiza pakuyibombela Inyumba yiyo muyisubiye, yiyo nkabapa amwe na banyenya binyu.

¹⁵ Nkwiza pakubasumbila kubutali nukubefyapo pamaso papane, ngati mumo nkababombela aba wamwinyu bosi, abantu aba mu Izilayeli.’ ”

Ukusita kwivwila ukwa bantu

¹⁶ U Mwene akuti, “Wee Yelemiya, utakabiputilaye abantu banaba, utakabalabilaye pamo utakabilumbuzizyanje kukwane, pakuti ntakwiza pakukuteghelezya.

¹⁷ Nkimba utakuzyennya zizyo bakubomba mutwaya utukulu nkani utwa Yuda sona na mumisebo iya mu Yelusalemu?

¹⁸ Abana abanandi bakutenya inkwi, abanavuli bakupemba u moto, po abakolo bakukantannya ubusu ukuti bapiyile utuvibama utwakwiyipila kwa Mwene Umukolo Uwakumwanya. Bakupungula u vinyo wabo pakuba chakwiyipa ku bachala abanji ukuti bankalalizye.

¹⁹ Nkimba batakunkalalizya nene? Nkimba batakwivulazya bene umwakuti bakoziwanje isoni?”

²⁰ U Mwene Uwamaka Ghosi akunena akuti, “Ukukalala kwane nu bukali bwane vikwiza pakupunguliwa pabuzilo bunubu, pa muntu napa chinyamana, pa makwi agha munkolongo napa seke izya mumughunda, sona bukwiza pakwaka ngati moto ghugho ghutakuzima.”

²¹ U Mwene Uwamaka Ghosi, u Chala uwa Izilayeli akuti, “Longolela, onjelezya ivyakwiyipa vyako ivyakocha pa ivyakwiyipa vyako ivinji, po mulyanje inyama yache.

²² Pakuti pisiku lilyo nkabafumyanga abanyenya muchisu icha Ijiputi nukunena nabo, ntakabapa amalamulo ghene agha ivyakwiyipa ivyakocha,

²³ loli nkabapa ilamulo ilyakuti: Munyivwilaye po nkwiza pakubanga ne Chala winyu sona amwe mukwiza pakubanga mwe bantu bane. Muzikonkaye izila zyosi zizyo nkubalamula, nanti mukulonda ukuti ivintu vibendelaye akiza.

²⁴ Loli abantu bala batakivwila pamo ukubikilako umoyo, mubuzilo bwache bakendelela pakubomba zizyo amoyo ghabo amabibi ghakalondogha. Bakanyokela kwisinda mubuzilo ubwakwendelela.

²⁵ Ukwandila mwisiku lilyo abanyenya bakepaghamo mu Ijiputi mupaka nilelo, isiku ni siku, kabilikabili, nkabatumila ababombi bane na balaghuzi bane.

²⁶ Loli batakanteghelezya pamo ukubikilako umoyo. Bakakazya amoyo ghabo sona bakaba babibi ukubachila abanyenya babo.

²⁷ Nanti ukubabuzya zyosi zinizi batakwiza pakukuteghelezya, nanti ukubitizya batakwiza pakukwamula.

²⁸ Polelo ubabuzye ukuti, ‘Ulu lo luko ulwa bantu babo batakaghitika amazyu agha Mwene u Chala wabo, pamo ukwitika ukunanga kwabo. Ubwanaloli butalipo pakasi papabo, sona butakwivwikapo pamilomo yabo.

Imbibi izya mwikombe ilya mu Beni Hinomu

²⁹ “ ‘Lilagha mwe bantu aba mu Yelusalemu, mwanga isisi zyinyu sona muzisumbe, mulile nkani pamwanya patughamba, pakuti ane ne Mwene nkalaye sona nabakana abantu bane.

³⁰ “ ‘Abantu aba mu Yuda babomba ububibi pamaso papane. Babika ivifwani vyabo ivinyazu munyumba iyi yiyo yikumanyikwa ni tabwa lyane, sona bayinyazya.

³¹ Bazenga ichitembe chicho chikwitiziwa ukuti Tofeti mwi Kombe ilya Beni Hinomu, ukuti bochelayeko abana abalumendo na balindu pamoto pakuba chakwiyipa ku bachala abayeni, ichintu chicho intakabalamulapo sona chicho chite na munyinong'ono zyane.

³² Po mube maso, akabalilo kakwiza kako ubuzilo ubu butakwiza pakwitiziwa ukuti Tofeti pamo Ikombe ilya Beni Hinomu, loli bukwiza pakwitiziwa ukuti Ikombe Ilyakughoghelamo, pakuti bakwiza pakubasyilamo abafwe mu Tofeti, chifukwa butaliko sona ubuzilo ubunji.

³³ Po imivimba yikwiza pakuba chakulya icha viyuni sona ni vinyamana ivya muchisu ichapasi, sona atakwiza pakubapo nayumo uwa kuvyoghofya.

³⁴ Nkwiza pakukanizya ivyongo ivya lusekelo nivya buhobosu mutwaya utukulu nkani utwa Yuda sona na mumisebo iya mu Yelusalemu naku mazyu agha yuyo akusendiwa sona nu mwenesendwa pakuti ichisu chila chikwiza pakwipela chisami.’