Yelemiya 6 - IBAYIBOLO 2024

U Yelusalemu akuzyunguliliwa na balwani

¹ Mwe baluko ulwa Benjamini, chimbila nkani ukuti mupone! Epamo mukaya aka Yelusalemu! Lizya ipati mu Tekowa! Kwezya indembela mu Beti Hakelemu! Pakuti ichintu ichibibi nukunanganika ukukulu nkani vikufuma kuchigaba icha kumitu.

² Nkwiza pakukanangannya akaya akakulu nkani aka Ziyoni, akaya akiza nkani sona akakuboneka akiza.

³ Abamwene bakwiza pakukizila na basilikali, ngati mumo abadimi bakwizila ni ng'ozi, bakwiza pakuzenga ivisakasa umwakukazyungulila, pakuti wesi akwiza pakudima ivitekwa pachigaba chache.

⁴ Bakwiza pakunena ukuti, “Mwiyannye pakulwa nakaya aka Yelusalemu! Nyamuka, zagha tulwe nakaya kanaka pamusanya! Loli tuli nulusako ulubibi, ichamabwila chafika, sona akavwelelema kafika.

⁵ Po nyamuka, twende tulwe nako pabusiku nukughamongolannya amalinga ghache!”

⁶ U Mwene Uwamaka Ghosi akuti, “Dumula amakwi nukuzenga ulubumba umwakukazyungulila u Yelusalemu. Akaya kanaka kabaghiye pakufundiwa, pakuti kakubayivya abantu.

⁷ Ngati mumo ichiziba chikufumizya amizi ghache, po momumo kakufumizizya ububibi bwache. Ichongo nukunanganika vikwivwika mu mwache, vivyo nkuvyennya mubantu bache bubine ni vilonda.

⁸ Wee Yelusalemu, sendapo ichimanyilo, ukuti intakepukeko kukwako nukukuleka pakuba chisami, ichisu chicho atalipo nayumo umuntu angikalamo.”

U Izilayeli umusambuke

⁹ U Mwene Uwamaka Ghosi akuti, “Leka basalalaye aba Izilayeli abakusyalako, ngati mumo abantu bakubombela pakuyaba amampesya pakughefyako ku tusamba twache.”

¹⁰ Nkimba ninganena nu wenu nukumusoka? Nkimba wewenu yuyo anganyivwa? Amakutu ghabo ghighaliye umwakuti batangivwa. Bakughakana amazyu agha Mwene, sona batakuhoboka nagho.

¹¹ Loli nizuye nu bukali ubwa Mwene, nalita pakwilema. U Mwene akuti, “Pungulila ubukali bunubu pa bana aba mumisebo napa balumendo babo babunganite poka, bosi umulume nu muchi wache bakwiza pakulemiwa mumo, abasongo na baghosi bulo.

¹² Inyumba zyabo zikwiza pakupeghiwa ku bantu abanji, poka na maghunda ghabo sona na bachi babo bulo. Nkwiza pakubafunda abantu babo bakwikala muchisu chilachila. Ane ne Mwene nanena.

¹³ “Pachifukwa ichakuti ukwandila ku bana mupaka ku basongo bosi banaba bakunyonywa ukukabila ichuma muzila izya buzimbuli. Abalaghuzi na baputi bulo bosi bazimbuli.

¹⁴ Bakupozya ivilonda ivya bantu bane pamwanya bulo. Bakunena bakuti, ‘Umutende, umutende,’ loli bo umutende ghutalimo naghumoghumo.

¹⁵ Nkimba bate ni soni pakubomba ivinyazu vinivi? Awe, bate ni soni nazimozimo sona batakuwisya ivyeni vyabo pasi. Pakuti bakwiza pakuwila poka na bamwabo babo bakawa kale. Bakwiza pakuwila zila bo nkubafunda. Ane ne Mwene nanena.”

Aba Izilayeli bayikana izila iya Chala

¹⁶ U Mwene akuti, “Imilila mulubazu mumusebo nukutalankannya, lalusya izila izya kale. Lalusya kuko kuli izila inyiza sona nukwendamo mulamula, po imizimu yinyu yikwiza pakubwagha ubutuzyo. Loli amwe mukati, ‘Tutakwiza pakwendamo.’

¹⁷ Nkabimikila abalindilili nukuti, ‘Teghelezya ukulila ukwa ipati!’ Loli amwe mukati, ‘Tutakwiza pakuteghelezya.’

¹⁸ Mwee inko izya bantu, teghelezya, mwee bakaboni, mwenelezye zizyo zikwiza pakubawila.

¹⁹ Wee chisu ichapasi, teghelezya, nkwiza nintamyo pabantu aba, nkwiza ni vikomwa ivya mbombo zyabo, pachifukwa ichakusita kwivwila amazyu ghane, sona balukanite ululaghilo lwane.

²⁰ Nkimba utwakufukizya utwakununkila utwa ku Sheba tuli nimbombo yoni kukwane, pamo ivyakunonanona ivya kuchisu ichakubutali? Ivyakwiyipa vyinyu ivyakocha vitakupokeleliwa, Ivyakwiyipa vyinyu vitakunhobosya.”

²¹ Polelo u Mwene akuti, “Nkwiza pakubabikila ivipunuzyo abantu aba. Abawise nabana bakwiza pakwipunulamo; abakamu na bamanyani bakwiza pakuzimila.”

Ukulemiwa ukufuma kumitu

²² U Mwene akuti, “Ennya, abasilikali aba kumitu bakwiza, uluko ulwamaka na bamwene abinji bakwiyannya pakulwa ubwite.

²³ Banyamuye ubwele ni mpalala, bakali sona bate ni chisa nachimochimo. Bakwivwika ngati kupoma ukwa nyanja bo bakwelite pafalasi zyabo. Wee Ziyoni, bakwiza ngati bantu babo biyanizye pakulwa ubwite, ukuti balwe nawe.”

²⁴ Twivwa imbili yako, sona amaka ghamumalila. Ubogha bwamulema ngati bubavu ubwa mukolo yuyo akusayiwa.

²⁵ Mutakabukaye ku maghunda, pamo pa kwenda mumisebo, pakuti u mulwani ali nupanga, sona ubogha buliko kosi.

²⁶ Mwee bantu bane, vwala amasaka sona mughalaghataye mwitoyi, mulilaye umwakukolomoka, ngati mumo umuntu akumulilila u mwana wache weka naweka, pakuti umwakuchenusya bulo uwakutunangannya akwiza pakutwizila.

²⁷ U Mwene akambuzya akati, “Nakubika awe pakuba we wakupima ivyela na bantu bane umwakuti wennye namumo inkalo zyabo zibeleye.

²⁸ Bosi banaba bantu abasambuke aba moyo amapalapala nkani, sona biyebo. Amoyo ghabo ghali ngati mukuba ni chela. Bosi ubusubiliwa butalimo mumwabo.

²⁹ Inyambi zikuvukuta nkani ukuti ichela chochiwe numoto loli ichela ichibibi chitakusunguluka napo panandi, pakuti ababibi batepitemo.

³⁰ Bali ngati we siliva yuyo ataghiwe, pakuti u Mwene abakanite.”