Yelemiya 51 - IBAYIBOLO 2024

Ubulongi ubwa Mwene pa Babiloni

¹ U Mwene akuti, “Nkwiza pakunyamusya impepo iyakunangannya ichisu icha Babiloni, sona napa bantu babo bakwikala mumo.

² Nkwiza pakutuma abayeni ku Babiloni, pakumupeta sona nukumunangannya. Bakwiza pakusambukila imbazu zyosi, pakabalilo akakunanganikila kwache.

³ Mutakabapanje ulusako abakuwesa ubwele, pamo pakuvwala ivilwilo ivya bwite, Mutakabalekaye bulo abasilikali abalumendo, mubanangannye abasilikali bache bosi.

⁴ Bakwiza pakughoghiwa mu Babiloni, nukuvulaziwa mumisebo yache.

⁵ Ichisu icha Izilayeli nicha Yuda vitalekiwe, nu Chala wabo, u Mwene Uwamaka Ghosi, napapo ichisu chabo chizuye nukunanga, pamaso pa Muzelu uwa Izilayeli.

⁶ “Chimbilamo mu Babiloni! Bupoke ubumi bwinyu. Mutakaghoghiwe pachifukwa icha mbibi izya ba Babiloni. Pakuti aka ko kabalilo kako u Mwene akutanizizya, akwiza pakubatanizya zizyo zibabaghiye.

⁷ U Babiloni akaba ngati lo lubako ulwa golide munyobe izya Mwene, lulo lukapela ichisu chosi ichapasi ukuti chikolwe. Inko zyosi zikang'wela u vinyo wache, polelo, ilelo zyapena.

⁸ U Babiloni akwiza pakuwa lubilolubilo nukufwantika. Mumulililaye! Nukumulondela umulembo ukuti ububavu buleke, pamo bangapola.

⁹ “Abazya bakuti, ‘Ngali twamupozya u Babiloni, loli atangapola. Zagha tumuleke, sona umuntu wesi abukaye kuchisu ichache ni chache, pakuti ulufundo lwache lwafika kumwanya, lukwelite nakumabingu bulo.

¹⁰ U Mwene atubombela ubugholosu aswe, po zagha tufumusye mu Ziyoni, zizyo u Mwene u Chala witu atubombela.’

¹¹ “Pyasya utulasilo, senda ingulu zyinyu! U Mwene abasonjelezya abamwene aba mu Mediya, pakuti inyinong'ono zyache zyakuti amunangannye u Babiloni. U Mwene akwiza pakutanizya, pachifukwa ichakuyinangannya Inyumba yache.

¹² Kwezya indembela zyinyu, nukughanangannya amalinga agha Babiloni! Mubikepo abalindilili, muyannye abasilikali! U Mwene akwiza pakukwanilisya, chicho akabatika nizya bantu aba mu Babiloni.

¹³ Amwe mwe mukwikala kupipi nisoko inyinji, sona na mwe bakabi, ubumalilo bwinyu bwafika, sona ubumi bwinyu bwamala.

¹⁴ U Mwene Uwamaka Ghosi alapa ukuti: Naloliloli nkwiza pakubatuma abantu abasita kubelengiwa, ngati we kanta pakulwa namwe ubwite sona bakwiza pakukolomoka, ukulanjizya ukuti bapota.”

Ulwimbo ulwa mapalo kwa Chala

¹⁵ U Mwene akapela ichisu ichapasi na maka ghache, na mahala ghache akapela ichisu chosi ichapasi mubumanyi bwache akachikuzula ichisu icha kumwanya.

¹⁶ Bo akujilimisya, amizi kumwanya ghakupongomoka. Weyuyo akukwezya amabingu ukwanda kubumalilo ubwa chisu chosi ichapasi. Weyuyo akulamizya utumesya ni vula sona akuyifumya impepo muchipinda ichakusungilamo.

¹⁷ Umuntu wesi mupunganu, sona ate na mahala naghamoghamo, umusyani wesi uwa golide akukoziwa isoni ni vifwani vyache vivyo apanga. Ivifwani vyache vyabumyasi, vite nubumi nabumobumo.

¹⁸ Vite nimbombo nayimoyimo, pakuti imbombo yabo yabuzimbuli mpela, sona pakabalilo aka lufundo lwabo bakwiza pakuzimila.

¹⁹ U Chala uwa Yakobo atayanite nabo, pakuti we mupeli uwa vintu vyosi, Aba Izilayeli bantu bache babo akabasala, itabwa lyache we Mwene Uwamaka Ghosi.

Inyondo iya Mwene

²⁰ U Mwene akumubuzya u Babiloni akuti, “We ntughu yane, we nyondo yane iya kulwila ubwite, wewe ukunyavwa pakuzitizannya inko izya bantu, wewe nkubombezya pakubunangannya ubumwene,

²¹ wewe nkukubombezya pakutizannya ifalasi na bendezyi, wewe nkukubombezya pakuzitizannya ingolo na bendezyi,

²² wewe nkukubombezya pakubatizannya abanavuli na bakolo, wewe nkukubombezya pakubatizannya abasongo na bachilumendo, wewe nkukubombezya pakubatizannya abalumendo na balindu,

²³ wewe nkukubombezya pakutizannya umudimi nu mudimo, wewe nkukubombezya pakutizannya umulimi ni nkambaku wewe nkukubombezya pakutizannya abalaghili na makambala.”

Ulufundo paba Babiloni

²⁴ U Mwene akuti, “Pamaso papako, nkwiza pakumutanizya u Babiloni na bantu babo bakwikala mulamula, pachifukwa icha kunanga kwabo kuko bakabomba mu Ziyoni. Ane ne Mwene nanena.

²⁵ “Wee Babiloni, we lighamba ilyakunangannya, nkulwana nawe, wewe ukuchinangannya ichisu chosi ichapasi. Ane ne Mwene nanena. “Nkwiza pakukukoma ni nyobe yane, nukukubungulukizya pasi ukufuma pilyalabwe, nkwiza pakukupela pakuba lighamba ilyakulungulila.

²⁶ Litakwiza pakubapo nalimolimo ibwe, lilyo likwiza pakusendiwa papako pakuzengela inkuto, pamo ibwe limo ilyakuzengela ulwalo, pakuti ukwiza pakuba we chisami bwila na bwila. Ane ne Mwene nanena.

²⁷ “Kwezya mumwanya indembela pachisu! Lizya ipati pakasi pa inko. Muziyannye inko pakulwa nu Babiloni. Bwitizye ubumwene ukuti balwe nawe ubwite, naba mu Alalati, naba mu Mini sona naba mu Ashikenazi. Sala usongo uwa basilikali ukuti alwe nawe, tuma ifalasi inyinji ngati we kanta umwinji.

²⁸ Muziyannye inko ukuti zilwe nawe ubwite. Mubitizye abamwene aba mu Mediya, na balaghili, na makambala ghabo ghosi, sona ni vyisu vyosi vivyo bakuvilaghila

²⁹ Ichisu chikutetema nukunyongoloka, pachifukwa icha bubavu, pakuti chicho u Mwene akamubatikila u Babiloni chikwiza pakubombiwa, pakuchipela ichisu icha Babiloni pakuba chisami, umwakuti atakwiza pakubamo nayumoyumo uwakwikalamo.

³⁰ Abasilikali aba mu Babiloni baleka pakulwa, bakwikala mumalinga ghabo. Amaka ghabamaliye, baba ngati bakolo. Inyumba zyache zyapya numoto, impingwi izya pamilyango zyapyoka.

³¹ Uwakuchimbila akuchimbila nukukomana nu yunji, intumi yikuchimbila nukukomana ni yinji, pakumubuzya u mwene uwamu Babiloni, ukuti akaya kache akakulu nkani kosi kafyuliwa.

³² Amaloboko ghosi ghakafyuliwa, amalinga ghosi ghapya numoto, po abasilikali bache bakunyila.”

³³ U Mwene Uwamaka Ghosi u Chala uwa Izilayeli akuti, “U Babiloni kali ngati chakukomelapo inyinulo, pakabalilo akakukomela, akabalilo akakwinulila kali papipi.”

³⁴ U Yelusalemu akuti, “U mwene Nebukadineza uwamu Babiloni atulya, atufwantannya, nukutupela ngati sonta yiyo mutalimo nakamokamo. Atumila ngati nyivwila, sona izuzya ulwanda lwache ni vyakulya ivinonu, pisinda pache akutufwina.”

³⁵ Abantu aba mu Ziyoni bakuti, “Ivyongo vivyo vikabombiwa pakasi papitu, vibanje paba Babiloni.” Abantu aba mu Yelusalemu bakuti, “Leka ibanda lyitu libanje pabantu babo bakwikala mu Babiloni.”

U Mwene akwiza pakubavwa aba Izilayeli

³⁶ Polelo u Mwene akuti, “Nkwiza pakukulwila ubwite, nukukutanizya. Nkwiza pakupwezya inyanja izya Babiloni, sona nkwiza pakupwezya imbwibwi zyache.

³⁷ U Babiloni akwiza pakuba chibunga icha visami, sona nu buzilo ubwakwikalamo abakambwe, akaya akakoghofya na kakusamuliwa, mumo atalimo nayumoyumo uwakwikalamo.

³⁸ Abantu bache bakwiza pakubuluma ngati nkalamu, sona bakwiza pakutamya ngati nyana iya nkalamu.

³⁹ Loli nanti bakalala, nkwiza pakubayanizizya ulusekelo, nukubapela ukuti bakolwe, umwakuti basekaye umwakukolomoka, po bakwiza pakughona utulo utwakufwa nato, nukuti batakwiza pakunyamuka sona. Ane ne Mwene nanena.

⁴⁰ “Nkwiza pakubuka nabo ukuti baghoghiwe, ngati twana utwa ng'ozi, ngati boba dubi ni mbuzi.”

Ukumala ukwa Babiloni

⁴¹ U Mwene akunena nizya Babiloni akuti, “Akaya kafyuliwa, kako kapaliwanga na bantu. Akaya aka Babiloni kaba chintu ichinyazu, pakasi pa inko!

⁴² Inyanja yizula nukufika pamwanya pa Babiloni sona kakupikiliwa na mayigha ghache.

⁴³ Utwaya twache utukulu tukwiza pakuba chisami, ni chisu ichumizu, sona nicha nkolongo, ichisu chicho mutakwikalamo nayumoyumo, mumo abantu batakwendamo.

⁴⁴ Nkwiza pakumufunda u Belo u chala uwa Babiloni, nukumutapizya vivyo akamila. Inko zitakwiza pakubuka kukwache sona. Ulubumba ulwa Babiloni lukwiza pakuwa.

⁴⁵ “Mwee bantu bane, epamo mu Babiloni, bupoke ubumi bwinyu! Buchimbile ubukali ubwakoghofya ubwa Mwene.

⁴⁶ Amoyo ghatakanyokelaye kwisinda pamo mutakanyilaye, bo mukwivwa amapangwi ghakwivwika muchisu. Umwaka nu mwaka kukwivwika ipangwi ni pangwi, amapangwi agha vyongo muchisu, sona amapangwi aghakuti umulaghili uyu akulwa nu mulaghili uwamwabo.

⁴⁷ Pakuti naloli akabalilo kakwiza, kako nkwiza pakuvifunda ivifwani ivya Babiloni. Ichisu chache chosi chikwiza pakukoziwa isoni, sona abantu bache bosi babo baghoghiwe bakwiza pakuba mivimba yiyo yilambalaye mulamula.

⁴⁸ Po kumwanya ni chisu ichapasi sona chosi chicho chili mulamula, vikwiza pakukolomoka umwakuhoboka pachifukwa icha Babiloni. Pakuti abantu aba kumitu bakwiza pakukanangannya akaya kala. Ane ne Mwene nanena.

⁴⁹ “Ichisu icha Babiloni chibaghiye pakuwa, pachifukwa ichakughoghiwa ukwa ba Izilayeli, ngati mumo abantu bosi aba pachisu chosi ichapasi, bakaghogheliwa pachifukwa icha Babiloni.”

Amazyu agha Chala kuba Izilayeli mu Babiloni

⁵⁰ U Mwene akubabuzya abantu bache mu Babiloni akuti, “Amwe mwe mwapona kubwite, mubukaye, sona mutakazyelaye! Mumukumbukaye u Mwene napapo muli kuchisu icha kubutali sona mukinong'onaye akaya akakulu nkani aka Yelusalemu.

⁵¹ “Mukuti, ‘Twakoziwa isoni, pakuti twasamuliwa, ivyeni vyitu vili nisoni, pakuti abantu abayeni binjila mu Buzilo Ubuzelu ubwa Nyumba iya Mwene.’

⁵² “Nkuti, ‘Akabalilo kakwiza akakuvifundila ivifwani, sona ukukoloma ukwa bantu abakuvulala, kukwiza pakwivwika muchisu chache chosi. Ane ne Mwene nanena.

⁵³ “ ‘Napapo aba Babiloni bangafika kumwanya, nukughazenga amalinga ghabo, pope bulo nkwiza pakutuma abakughanangannya.’ ”

Ukunanganika ukwa Babiloni kukwendelela

⁵⁴ U Mwene akuti, “Ivwa izyu ilya kulila mu Babiloni, ichongo ichikulu nkani icha kunanganika.

⁵⁵ U Mwene akwiza pakumunangannya u Babiloni, akwiza pakupumizya ivyongo vyache. Abalwani bakumuchimbilila ukuti bamuleme ngati chongo icha mayigha, ichongo icha izyu chikukwelelakwelela.

⁵⁶ Abakumunangannya u Babiloni bafika, abasilikali bache balemiwa sona ubwele bwabo bwapyoliwa. Pakuti ane ne Chala yuyo akutanizya imbibi pa mbibi, naloliloli nkwiza pakubatanizya imbibi pa mbibi,

⁵⁷ Nkwiza pakughapela amakambala ghache na bantu abamahala pakuba bachakolwa, poka na balaghili na balongozi sona na basilikali bulo. Bakwiza pakughona utulo utwakufwa nato sona batakwiza pakulamusya. Ane ne Mwene Uwamaka Ghosi nanena.”

⁵⁸ U Mwene Uwamaka Ghosi akuti, “Ivibumba ivya maka ivya Babiloni vikwiza pakumongoliwa, sona imilyango yache imitali yikwiza pakochiwa. Inko izya bantu zikwipala pabulo, imbombo zyabo zikupya bulo mumoto.”

Amazyu agha Yelemiya ghakutumiwa ku Babiloni

⁵⁹ Agha gho mazyu ghagho umulaghuzi u Yelemiya akamubuzya umulongozi usongo, u Selaya, umwana uwa Neliya, umwizukulu uwa Mahiseya, mumwaka uwafolo, bo u mwene u Zedekiya akulaghila muchisu icha Yuda. U Selaya akabuka ku Babiloni nu Zedekiya.

⁶⁰ U Yelemiya akasimba kale mwibuku nizya kunanganika ukwa Babiloni, sona ni zinji zyosi zizyo zikasimbiwa ukuyana nu Babiloni.

⁶¹ Po u Yelemiya akamubuzya u Selaya akati, “Bo wafika mu Babiloni, wenelezye ukuti wababelengela abantu amazyu aghabulaghuzi.

⁶² Po babuzye ukuti, ‘Wee Mwene, wanena ukuti: Ukwiza pakubunangannya ubuzilo ubu, umwakuti atakwiza pakwaghiwamo nayumoyumo uwakwikalamo, manyi umuntu pamo ichinyamana, sona kakwiza pakuba ngati chisami bwila na bwila.’

⁶³ Bo wamala pakubabelengela abantu ibuku ili, ulipinyilile nibwe nukulisumbila mulusoko ulwa Yufuleti.

⁶⁴ Po unene bunubu ukuti, ‘Umu momumo u Babiloni akwiza pakudwibila, sona atakwiza pakunyamuka, pachifukwa icha ntamyo zizyo zikwiza pakumuwila. Po bantu bache bakwiza pakuwa.’ ” Amazyu agha Yelemiya ghamalila panapa.