Yelemiya 50 - IBAYIBOLO 2024

Nizya kulemiwa ukwa Babiloni

¹ Agha gho mazyu ghagho u Mwene akanena ukwendela mwa mulaghuzi u Yelemiya nizya chisu icha Babiloni sona na bantu bache,

² “Fumusya nukulumbilila pakasi pa inko, kwezya indembela nukufumusya, utakavindepo nakamokamo, loli unene ukuti, ‘U Babiloni akwiza pakulemiwa. U chala wache u Belo akwiza pakukoziwa isoni, sona ubogha bwamulema u chala wache u Maladuka. Ivifwani vyache vyakoziwa isoni, sona bope abachala bache baba nubogha.’

³ Uluko ulwa kumitu lukwiza pakulwa nawe ubwite nukuchipela ichisu chila pakuba chisami. Atakwiza pakubapo nayumoyumo umuntu uwakwikala mulamula. Abantu ni vinyamana bakwiza pakuchimbilamo.”

Aba Izilayeli bakubwela

⁴ U Mwene akuti, “Mumasiku ghalaghala sona pakabalilo kalakala, abantu aba mu Izilayeli poka naba mu Yuda bakwiza pakulilagha bo bakumulondelezya u Mwene u Chala wabo.

⁵ Bakwiza pakulalusya izila iyakubuka ku Ziyoni bo benizye ivyeni vyabo kulakula. Bakwiza pakumamatilana poka nu Mwene, nukufinga nawe ulufingo ulwa bwila na bwila lulo lutakwiza pakuluviwapo nalumolumo.

⁶ “Abantu bane basobelite ngati zyo ng'ozi, abadimi babo babapuvizye nukubapela ukuti bendabendaye pamaghamba. Bakendakenda pamaghamba sona na patughamba, nukuluvya ubuzilo bwabo ubwakutuzyapo.

⁷ Umuntu wesi yuyo akabagha akabalya, abalwani babo bakati, ‘Aswe tute ninongwa nayimoyimo, pakuti bakamunangila u Mwene, yuyo pakudimapo apanaloli, yuyo lusubilo ulwa banyenya babo.’

⁸ “Chimbilamo muchisu icha mu Babiloni! Epemo mubantu aba mu Babiloni, Sona mubanje ngati we sabwe yuyo akughulongozya umudimo.

⁹ Pakuti nkwiza pakunyamusya ichilundilo icha inko izyamaka izya kumitu. Bakwiza pakubamba ukuti balwe ubwite ni chisu icha Babiloni nukuchifyula. Utulasilo twabo tukwiza pakuba ngati basilikali, babo bamenye pakulwa ubwite, sona batakubwela nyobe zyene.

¹⁰ Po ichisu icha Babiloni chikwiza pakufyuliwa, bosi babo bakufyula bakwiza pakwikutisiwa. Ane ne Mwene nanena.”

Ukupotiwa ukwa Babiloni

¹¹ U Mwene akuti, “Mwee ba Babiloni, mukusekela sona muhobokite. Amwe mwe mukusendelapo ulusako pachilingo chane, munganyelanyela umwakuhoboka, ngati mpampali yiyo yikukoma ingano, napapo mungalila ngati yo falasi inyanavuli,

¹² akaya kinyu akakulu nkani kakwiza pakukoziwa isoni, po yuyo akabapapa akwiza pakusamuliwa. Kakwiza pakuba kabumalilo mubantu aba inko, kakwiza pakuba ngati mo muzi, ni chisu ichumizu, sona ngati yo nkolongo.

¹³ Pachifukwa icha bukali ubwa Mwene abantu batakwiza pakwikalamo, loli chikwiza pakuba chisami. Abantu bosi babo bakudumusannya mu Babiloni, bakwiza pakuswigha, sona nukusekiwa pachifukwa icha vilonda vyache.

¹⁴ “Iyannya nukumuzyungulila u Babiloni, mwebosi mwe mukulasa ubwele. Kalase akaya aka Babiloni! Mukalase nu tulasilo tosi, pakuti kakamunangila u Mwene.

¹⁵ Mukolomokele imbazu zyosi! ‘Imika inyobe nukulamba, ichitembe chache chawa, ivibumba vyache vyamongonkana.’ Pakuti uku ko kutanizya ukwa Mwene, mubatanizye bope bulo, mubabombele zizyo bakababombela abanji.

¹⁶ Mwefyemo umupesa imbeyu wesi mu Babiloni, sona nu wakwinula yuyo ali ni chikwakwa pakwinula. Pachifukwa icha panga uwamuyinvyi, muleke umuntu wesi anyokele ku bantu bache, sona muleke umuntu wesi anyokele kuchisu ichache ni chache.”

Aba Izilayeli bakubwela

¹⁷ U Mwene akuti, “Aba Izilayeli bali ngati zyo ng'ozi zizyo zinyampanite bulo, zizyo inkalamu zyazichimbizya. U mwene uwa ku Asiliya weyuyo akaba wakwanda pakubaghogha. Nebukadineza u mwene uwa ku Babiloni weyuyo akaba wabumalilo pakughamemena amafupa ghabo.

¹⁸ Umu momumo u Mwene Uwamaka Ghosi u Chala uwa Izilayeli anenela, ‘Nkwiza pakumufunda u mwene uwamu Babiloni poka ni chisu chache, ngati mumo nkamufundila u mwene uwamu Asiliya.

¹⁹ Loli nkwiza pakumunyosezya u Izilayeli pabuzilo bwache ubwakudimapo, po akwiza pakulyanga ku Kalimeli naku Bashani. Akwiza pakwikuta mutughamba utwa Efulayimu nu twa Giliyadi.’

²⁰ Mumasiku ghalaghala sona pakabalilo kalakala, nkwiza pakulondelezya ukunanga ukwa Izilayeli, loli kutakwiza pakwaghiwa, sona zilondelezye imbibi izya Yuda, loli zitakwiza pakwaghiwa, pakuti nkwiza pakubahobokela abakusyalako bala. Ane ne Mwene nanena.”

Ubulongi bwa Chala paba Babiloni

²¹ U Mwene akuti, “Lwanga ni chisu icha Melatayimu, sona na bantu babo bakwikala mu Pekodi. Mubachimbizye, mubaghoghe sona nukubananganizizya zila. Bomba chosi chicho nabalamula.

²² Ichongo icha bwite chikwivwika muchisu, sona pali ukunanganika ukukulu nkani!

²³ U Babiloni aba ngati yo nyondo yiyo yikachinangannya ichisu ichapasi. U Babiloni ipela chisami mukasi mu inko izya bantu.

²⁴ Wee Babiloni, nkakutegha ichipingo po ukawilamo, bo utazimenye napo panandi, ukaghiwa nukulemiwa, pachifukwa ichakuti ukasusannya nu Mwene.

²⁵ U Mwene ighula inyumba iyakusungilamo ivilwilo, sona avyefyamo nubukali bwache. Pakuti u Mwene Uwamaka Ghosi ali ni mbombo, iyakuti abombe muchisu icha Babiloni.

²⁶ Zagha mubazyungulile imbazu zyosi. Ighula intamba zyache, mubabungannye abantu ngati zyo nkose izya ngano. Mubanangannye bosi sona, mutakamulekepo nayumoyumo mumi.

²⁷ Mubaghoghe abasilikali abalumendo bache bosi, baghoghe bosi, chighune kukwabo! Pakuti isiku lyabo lyabafikila, sona akabalilo kabo aka lufundo kakwana.

²⁸ Teghelezya! Abantu babo bakachimbila ubwite ku Babiloni, bali pakufumusya mukaya aka Ziyoni, nizya mumo u Mwene u Chala witu akutanizizya pachifukwa icha Nyumba yache.

²⁹ “Mubitizye bosi abafundi aba bwele, ukuti balwe ubwite naba mu Babiloni. Babazyungulile sona atakabepo nayumoyumo uwakupona. Mubatanizye pachifukwa icha mbombo zyabo, Mubabombele zizyo bakababombela abanji, Pakuti bakamusamula u Mwene Umuzelu uwa Izilayeli.

³⁰ Polelo abalumendo bache bakwiza pakuwila mumisebo, abasilikali bache bakwiza pakughoghiwa pisiku lilalila. Ane ne Mwene nanena.”

³¹ U Mwene Uwamaka Ghosi akuti, “Ennya, nkwiza pakulwa nawe, wee muntu uwa madinko awe, pakuti isiku lyako lyafikila, akabalilo akakuti ufundiwe kakwana.

³² Abakwikwezya bakwiza pakwipunula nukuwa, sona atakwiza pakubapo nayumoyumo uwakubanyamusya. Nkwiza pakutocha utwaya twache utukulu numoto ghugho ghukwiza pakubamala bosi, babo batuzyunguliye utwaya utukulu tula.”

³³ “Umu momumo u Mwene Uwamaka Ghosi akunenela: Abantu aba ku Izilayeli bakuyinvyiwa, poka na bantu aba mu Yuda. Babo bakalema pakuba bazya batakulonda pakubasatula.

³⁴ Loli pope bulo Umutabuli wabo ali na maka nkani, itabwa lyache we Mwene Uwamaka Ghosi. Akwiza pakubimila pa nongwa, umwakuti abike umutende pachisu chosi ichapasi, loli abantu aba ku Babiloni batakwiza pakuba nu mutende naghumoghumo.

³⁵ “Nizite nu bwite pachisu icha Babiloni, napa bantu babo bakwikala mulamula, sona napa makambala napa bantu abamahala! Ane ne Mwene nanena.

³⁶ “Nizite nu bwite pabalaghuzi abamyasi! Bakwiza pakuba bapunganu. Nizite nu bwite pabasilikali bache! Bakwiza pakwizula nubogha.

³⁷ Nizite nu bwite pafalasi sona napa ngolo zyache, napa basilikali babo abayeni, bakwiza pakuba badedebazu. Nizite nu bwite pabasunga chuma! Bakwiza pakufyuliwa.

³⁸ Nkwiza nu lulanga pa mizi ghache, ghakwiza pakupwa. Pakuti ichisu chicho chikwiputa ivifwani abantu bache bakuzimbuliwa ni vifwani.

³⁹ “Po ivinyamana ivya munkolongo vikwiza pakwikala mulamula, poka na balabwe na masisimusi. Abantu batakwiza pakuzengamo sona, abantu aba nkulilo ni nkulilo batakwiza pakwaghiwamo.

⁴⁰ Ngati mumo nkatunanganizizya utwaya utwa Sodomu nu Gomola, poka nutwaya twache utupalamani, Po atalipo nayumoyumo umuntu uwakwikalamo, sona atalipo nayumoyumo umuntu uwakuzengamo. Ane ne Mwene nanena.

⁴¹ “Ennya! Abasilikali aba kumitu bakwiza, uluko ulwamaka na bamwene abinji bakwiyannya pakulwa ubwite.

⁴² Banyamuye ubwele ni mpalala, bakali sona bate ni chisa nachimochimo. Bakwivwika ngati kupoma ukwa nyanja bo bakwelite pafalasi zyabo. Bakwiza ngati bantu babo biyanizye pakulwa ubwite, ukuti balwe nawe, wee Babiloni.

⁴³ U mwene uwamu Babiloni ivuye nizya mbili yabo, sona amaka ghamumalila. Ubogha bwamulema ngati bubavu ubwa mukolo yuyo akusayiwa.

⁴⁴ Ngati nkalamu yiyo yikufuma mumusitu uwa Yolodani, yikuyichimbizya ing'ozi. Nkwiza pakumuchimbizya u Babiloni, muchisu chache umwalubilolubilo. Pisinda pache nkwiza pakubimikila yuyo imusalite. Nkimba wewenu yuyo ayanite nane, sona nkimba wenu yuyo angambika pabulongi? Nkimba mudimi wenu yuyo angalwana nane?”

⁴⁵ Polelo, ivwa zizyo u Mwene ababatikiye pakumubombela u Babiloni nabantu bache. Utwana utwa ing'ozi ni mbuzi tukwiza pakusendiwa, sona akwiza pakunangannya apakudimapo pachifukwa icha babo.

⁴⁶ Ichisu ichapasi chikwiza pakutetema, pachifukwa ichakuti u Babiloni afyuliwa. Ukulila kwache kukwiza pakwivwika pakasi pa inko.