Yelemiya 5 - IBAYIBOLO 2024

Imbibi iya bantu aba mu Yelusalemu

¹ U Mwene akuti, “Chimbilila uku na uku mumisebo iya mu Yelusalemu, mwiyenezye mwebene, mwennye uku na uku pakasi pamunalo. Nanti mungamwaghako yumo u muntu yuyo akubomba ubugholosu nu bwanaloli umwakuti imuhobokele u Yelusalemu.

² Napapo bakulapila mwitabwa ilya Mwene umumi, pope bulo bakulapa ivyabumyasi.”

³ Wee Mwene nkimba amaso ghako ghatakulonda ubwanaloli? Ukabafunda loli batakivwa ububavu, ukabasyempa loli bakakana pakumanyila. Bakavikazya ivyeni vyabo ngati mabwe, nukukana pakupinduka.

⁴ Po nkati, “Banaba bo bantu abapina, bate na mahala naghamoghamo, pakuti batayimenye izila iya Mwene sona batachimenye chicho u Chala akuchilonda.

⁵ Ilelo nkubuka ku balongozi aba bantu ukuti inene nabo, naloliloli bayimenye izila iya Mwene, bachimenye chicho u Chala akuchilonda.” Bope bulo bakapyolannya ikoli, nukudumulannya ubunyololo.

⁶ Polelo inkalamu iya mumusitu yikwiza pakubaghogha, sona abakambwe aba munkolongo bakwiza pakubanangannya. Uzyela akwiza pakubavwamilila papipi nutwaya twabo utukulu. Akwiza pakubazepulannya mutupusa umuntu wesi yuyo akufumila kuzi, pakuti ukusambuka kwabo kukulu nkani, sona bate basubiliwa.

⁷ U Mwene akuti, “Nkimba choni chicho imbahobokele? Abana binyu bankanite, sona nukulapa ku bachala babo bate bo bachala. Nkabapa vyosi vivyo bakalondagha, loli pope bulo bakalowa bakatagha akabalilo munyumba izya bamalaya.

⁸ Bali ngati zyo falasi inyine nkani zizyo zikulondela. Umuntu wesi akumunyonywa umuchi uwa mupalamani wache.

⁹ Ane ne Mwene nanena. “Nkimba intangabafunda pachifukwa icha zinizi? Nkimba intangalutanizya uluko ngati lunulu?

¹⁰ “Buka nukughanangannya amampesya, loli mutakaghanangannye nkani. Dumulannya isamba zyache, pakuti abantu banaba bate ba Mwene.

¹¹ Aba Izilayeli sona naba Yuda bate basubiliwa kukwane. Ane ne Mwene nanena.”

U Mwene akubakana aba Izilayeli

¹² Abantu bamutamantila u Mwene bati, “Atangatubombela nachimochimo, ubupalapala butakwiza pakutuwila, po tutakwiza pakwennyapo ubwite pamo izala.

¹³ Abalaghuzi bo bapwafu bambalala sona amazyu ghatalimo mumwabo, po leka zizyo bakunena zibabonekele babo.”

¹⁴ Polelo izi zyo zizyo u Mwene u Chala Uwamaka Ghosi akunena, “Pachifukwa ichakuti abantu banena amazyu ghanagha, nkwiza pakughapela amazyu agha mumulomo wako pakuba moto ghugho ghukwiza pakubocha abantu banaba ngati nkwi.”

¹⁵ U Mwene akuti, “Mwee ba Izilayeli, nkubizila ninko iya bantu aba kubutali nkani, iya kale sona yiyo yiliko, abantu babo ni neno yabo mutayimenye nalumolumo, sona mutangayivwa nakokuyivwa.

¹⁶ Inyambi izyakunyamulilamo utulasilo zili ngati lipumpa lilyo lili bwazi, bosi banaba zyo nkwanta izya ababwite.

¹⁷ Bakwiza pakulya ivyakulya vyinyu ivya nyinulo yinyu, bakwiza pakubalya abana binyu abalumendo na balindu, bakwiza pakuvilya ivitekwa vyinyu ivya ng'ozi ni ng'ombe, bakwiza pakunangannya amampesya ghinyu na makuyu ghinyu. Bakwiza pakutunangannya nu bwite utwaya twinyu utukulu nkani tuto tuzyunguliliwe na malinga ghagho mughasubiye nkani.”

¹⁸ U Mwene akuti, “Loli na mumasiku ghalaghala, ntakwiza pakubananganizizya zila.

¹⁹ Sona nanti abantu bakukulalusya bakuti, ‘Nkimba choni chicho u Mwene u Chala witu atubombela zyosi zinizi?’ awe Yelemiya, ubamule uti, ‘Ngati mumo mukamulekela u Mwene, nukubabombela abachala abayeni muchisu chinyu, momumo mukwiza pakubabombela abayeni muchisu chicho te chinyu.’ ”

U Chala akubasoka abantu bache

²⁰ U Mwene akuti, “Fumusya ichi kubaluko ulwa Yakobo sona mulumbilile ichi muba Yuda.

²¹ Ivwa ichi, mwe bapunganu na mwe bantu abasita mahala, amwe mwe muli na maso loli mutakwennya, amwe mwe muli na makutu loli mutakwivwa.

²² Ane ne Mwene. Nkimba choni chicho mutakunyila? Nkimba mutakutetema pamaso papane? Nkabika umusesenga pakuba yo mpaka iya nyanja, impaka iya bwila na bwila yiyo inyanja yitangaloboka. Amayigha agha nyanja ghangabunguluka, loli ghatangabomba nachimochimo, ghangapongomoka loli ghatangaloboka.

²³ Loli abantu banaba bali na moyo amakafu naghakusambuka, bepiteko kukwane sona babukite kubutali.

²⁴ Batakunena mumoyo ghabo ukuti, ‘Zagha tumunyilaye u Mwene u Chala witu, yuyo akutupa ivula iya chizimyalupya pakabalilo kache, sona ni vula iyamaka pakabalilo kache, sona atwimikiye amasiku aghakutuzikizya nagha nyinulo.’

²⁵ Loli ububibi bwinyu bo bubo bwavikanizya vyosi vinivi, imbibi zyinyu zyabukanizya ubwiza ukuti buleke pakubizila.

²⁶ “Mukasi mubantu bane mulimo abantu ababibi babo bakuvwamilila ngati bantu babo bakutegha iviyuni sona ngati bantu babo bakutegha ivipingo nukubalema abantu.

²⁷ Ngati vizanga vivyo vyizuye ni viyuni, inyumba zyabo zyizuye nu buzimbuli. Baba bakabi sona bamaka,

²⁸ binite sona bali na mabili amatyelemusu. Ububibi bubo bakubomba bute ni mpaka, batakulongela mubugholosu inongwa izya bana abalanda ukuti zibendele akiza sona batakubalwila abantu abapina.

²⁹ Nkimba ningaleka pakubafunda pa vintu vinivi? Nkimba ningaleka bulibuli pakulutanizya uluko ngati lunulu?” U Mwene anena.

³⁰ “Ichintu ichinyazu nicha koghofya chabombiwa muchisu ichi:

³¹ Abalaghuzi bakulaghula ivyabumyasi, abaputi bakumanyisya chicho bakulonda, sona abantu bane bakuhoboka na zyosi zinizi. Po nkimba mukwiza pakubomba choni pabumalilo?”