Yelemiya 49 - IBAYIBOLO 2024

Ubulongi paba Amoni

¹ Pakunena nizya luko ulwa Amoni, u Mwene ukulalusya akuti, “Nkimba aba Izilayeli bate na bana abalumendo? Nkimba bate naba mpyana? Po nkimba choni chicho abantu, babo bakumwiputa u Moleki bafyulite ichisu icha Gadi? Nkimba choni chicho abantu bache bakwikala mutwaya twache utukulu?

² Loli amasiku ghakwiza, ghagho nkwiza pakubalizizya ipati aba Laba, akaya akakulu nkani aka ba Amoni. Ane ne Mwene nanena. “Akaya akakulu kanaka kakwiza pakuba chisami sona utwaya tuto tukazyunguliye tukwiza pakwaka umoto. Po u Izilayeli akwiza pakubachimbizya, babo bakamuchimbizyamo. Ane ne Mwene nanena.

³ “Mwee bantu aba mu Heshiboni mulilaye, pakuti akaya akakulu nkani aka Ayi kananganika! Mulilaye nkani mwe mwikwikala mukaya akakulu nkani aka Laba! Muvwale amasaka nukufwifwitila, pachifukwa icha chitima, muchimbilile uku na uko mukasi mulupaso, pakuti u chala winyu u Moleki akwiza pakusendiwa pakuba muzya, poka na baputi bache sona na makambala ghache.

⁴ Nkimba choni chicho mukwituvya na makombe ghinyu, mukwitutumula nu bukabi bwinyu? Abantu abasita kusubiliwa, mukusubila ubukabi bwinyu nukuti, ‘Nkimba wenu yuyo angalwana naswe?’

⁵ Nkwiza pakubizila ni vyakoghofya, ivyakufuma ku bantu babo babazyunguliye. Ane ne Mwene Uwamaka Ghosi nanena. “Umuntu wesi uwa amwe akwiza pakuchimbiziwa, sona atalipo nayumoyumo, yuyo akwiza pakubabungannya mwe bakuchimbiziwa.

⁶ “Po pisinda pache nkwiza pakubanyosezya ubwiza aba Amoni. Ane ne Mwene nanena.”

Ubulongi paba Edomu

⁷ Pakunena nizya Edomu, U Mwene Uwamaka Ghosi akuti, “Nkimba mutalimo amahala mu Temani? Nkimba abantu abamahala ubulongozi bwabo bwamala? Nkimba amahala ghabo ghabamaliye?

⁸ Mwee bantu aba mu Dedani, nyokela nukuchimbila, muvwamaye muviliba ivyibizu, pakuti nkwiza pakumunangannya u Esabu, pakabalilo akakumufundila.

⁹ Nanti abakuyaba amampesya bakwiza kukwinyu nkimba batangaghaleka ghamo manandi? Nanti abiba biza pabusiku pakwiba, nkimba batabaghiye pakusenda vyosi vivyo bakuvilonda?

¹⁰ Loli nabafyula vyosi aba Esabu, nabubika pabuzelu ubuzilo bwabo ubwakuvwamilamo, umwakuti atangavwama sona. Abana babo na bakamu babo sona na bapalamani babo bakwiza pakuzimila, atalipo nayumoyumo uwakupona.

¹¹ Baleke abana abalanda, nkwiza pakubusungilila ubumi bwabo. Bope abakolo abafwilwe bakwiza pakunsubila.”

¹² Umu momumo u Mwene akunenela, “Nanti babo batabaghiye pakung'wela ulubako, babaghiye pakung'wela, po nkimba mukwinong'ona ukuti mukwiza pakupona ulufundo ulu? Mutakwiza pakupona, loli mubaghiye pakung'wela.

¹³ Nkulapa nkuti: U Bozila akwiza pakuba chisami sona akwiza pakuba chintu ichakoghofya, nuwa kusekiwa sona kakwiza pakuba kaghuniwa, tope utwaya twache tosi utukulu tukwiza pakuba visami bwila na bwila. Ane ne Mwene nanena.”

¹⁴ Nivuye amazyu aghakufuma kwa Mwene, intumi yikatumiwa ku inko izinji na mazyu aghakuti, “Nyamuka, twende pakulwa ubwite!

¹⁵ Nkwiza pakubapela pakuba banandi bulo pakasi pa inko zyosi, abantu bosi bakwiza pakubasamula.

¹⁶ Ukwituvya ukwa moyo wako kwakuzimbula, awe we ukwikala mumpako izya mabwe, sona na patughamba pamwanya nkani. Napapo ungazenga ichivulumbo chako, pamwanya ngati lyo lizwanga, pope bulo nkwiza pakukwisya. U Mwene anena.

¹⁷ “U Edomu akwiza pakuba chintu ichakoghofya, umuntu wesi yuyo akudumusannyapo palapala, akwiza pakuba nubogha sona ni chiswigho, pachifukwa icha kunanganika kwache.

¹⁸ Ngati mumo u Sodomu nu Gomola akananganikila, poka nutwaya twache utupalamani po atalipo nayumoyumo uwakwikalamo, sona atalipo nayumoyumo umuntu uwakuzengamo. Ane ne Mwene nanena.

¹⁹ “Ngati nkalamu yiyo yikufuma mumusitu uwa Yolodani, yikuyichimbizya ing'ozi, nkwiza pakumuchimbizya u Edomu, muchisu chache umwalubilolubilo. Pisinda pache nkwiza pakubimikila yuyo imusalite. Nkimba wewenu yuyo ayanite nane, sona nkimba wenu yuyo angambika pabulongi? Nkimba mudimi wenu yuyo angalwana nane?

²⁰ “Polelo, ivwa zizyo u Mwene ababatikiye pakubabombela abantu aba mu Edomu, sona na zizyo ababatikiye pakubabombela abantu aba mu Temani. Utwana utwa ing'ozi ni mbuzi tukwiza pakusendiwa, sona akwiza pakunangannya apakudimapo, pachifukwa icha babo.

²¹ Ichisu ichapasi chikwiza pakutetema pachifukwa icha kuwa kwabo. Ukulila kwabo kukwiza pakwivwika mupaka ku Nyanja Inchesamu.

²² Ennya, umuntu yumo ngati lyo lizwanga akwiza pakubuluka umwalubilolubilo nukukuzulila ivipapande vyache pa Bozila. Pisiku lilalila, amoyo agha basilikali aba Edomu ghakwiza pakuba ngati moyo uwa mukolo yuyo akusayiwa.”

Ubulongi paba Damasika

²³ Pakunena nizya Damasika akati, “Abantu aba Hamati naba Alipadi bali nubogha nkani, pachifukwa ichakuti bivwa amazyu amabibi. Amoyo ghabo ghali mumwanya bulo, ngati nyanja sona bate nu mutende naghumoghumo.

²⁴ U Damasika mudedebazu, sona achimbila pachifukwa icha bogha, ububavu ni chitima vyamulema, ngati mukolo yuyo akusayiwa.

²⁵ Akaya akakulu nkani akamanyikwe kalekiwa, akaya akakulu kako nkuhoboka nako!

²⁶ Pisiku lilalila abana abalumendo bakwiza pakughoghiwa mumisebo, sona abasilikali bache bosi bakwiza pakunanganika. Ane ne Mwene Uwamaka Ghosi nanena.

²⁷ “Nkwiza pakuvyochannya ivibumba ivya Damasika, ghukwiza pakocha amalinga agha Beni Hadadi.”

Ubulongi paba Kedali na paba Hazoli

²⁸ Pakunena nizya Kedali sona nizya bumwene ubwa Hazoli, bubo u Nebukadineza u mwene uwa Babiloni akabupota. U Mwene akati, “Nyamuka nukulwa nu Kedali, sona mubanangannye abantu abakubufumilo bwizuba.

²⁹ Mubafyule ivisakasa vyabo poka ni ing'ozi ni mbuzi zyabo, musende amenda agha kuzighila muvipinda vyabo, poka nu katundu wabo sona ni ngamila zyabo. Abantu bakolomokaye batinji, ‘Twazyunguliliwa nintamyo.’

³⁰ “Chimbila lubilolubilo, mwe bantu aba ku Hazoli, muvwamaye mumpako. Ane ne Mwene nanena. “U Nebukadineza u mwene uwa ku Babiloni abatika pakulwa namwe.

³¹ “Nyamuka nukulwa nuluko lulo lukwinong'ona ukuti lukwikala umwakufwasa. Uluko lulo lute nulupaso nalumo pamo impingwi, abantu bache bakwikala pakwisubila bene. Ane ne Mwene nanena.

³² “Fyula ingamila zyabo zyosi, sona ni vitekwa vyabo vyosi. Nkwiza pakubanyampanizizya kosi na kosi, abantu babo bakumwa isisi lyabo. Nkwiza pakubawisizya intamyo ukufumila kumbazu zyosi.

³³ Akaya aka Hazoli kakwiza pakuba kakwikalamo abakambwe, nukwipela pakuba chisami icha bwila na bwila. Atalipo nayumoyumo yuyo akwiza pakwikalamo, sona nuwakuzengamo.”

Ubulongi paba Elamu

³⁴ Bo u mwene u Zedekiya akulaghila muchisu icha Yuda, u Mwene Uwamaka Ghosi akamubuzya u Yelemiya nizya chisu icha Elamu akati,

³⁵ “Teghelezya, nkwiza pakupyolannya ubwele ubwa Elamu, chicho chilwilo chabo icha maka nkani.

³⁶ Nkwiza pakubizila na balwani kunkuto zyosi, sona nkwiza pakubanyambanizizya aba Elamu kosi na kosi. Aba Elamu bakwiza pakubuka ku vyisu vyosi ivya pachisu ichapasi pakuba bazya.

³⁷ Nkwiza pakubapelela ubogha aba Elamu pamaso pa balwani babo, pamaso pa babo bakubulondelezya ubumi bwabo. Nkwiza pakubanangannya abantu aba ku Elamu, sona nkwiza pakubawisizya ubukali bwane ubwakoghofya. Ane ne Mwene nanena. “Nkwiza pakubachimbizya nupanga, mupaka imbamale bosi.

³⁸ Nkwiza pakubika ichitengo chane icha bumwene mu Elamu, nukubanangannya abamwene poka na makambala ghache. Ane ne Mwene nanena.

³⁹ “Loli pisinda pache nkwiza pakubanyosezya ubwiza abantu aba mu Elamu mumasiku agha muntazi. Ane ne Mwene nanena.”