Yelemiya 48 - IBAYIBOLO 2024

Ukunanganika ukwa Mowabu

¹ Pakunena nizya chisu icha Mowabu, u Mwene Uwamaka Ghosi, u Chala uwa Izilayeli akuti, “Chighune kukaya aka Nebo, pakuti kaba chisami. Akaya aka Kiliyatayimu kakoziwa isoni sona kafyuliwa ilinga lyache ilya maka lyakoziwa isoni nukumongoka.

² U Mowabu atakwiza pakupaliwa sona, abalwani bakabatika pakukafyula akaya akakulu aka Heshiboni bakati, ‘Zagha tulumale uluko ulwa bantu.’ Namwe bulo, mwe bantu aba Madimeni, mukwiza pakwighaliliwa imilomo, ubwite bukwiza pakubakonka.

³ Ivwa ukulila ukwa bantu aba mu Holonayimu, ukulila ukukulu nkani ukwa kunanganika.

⁴ U Mowabu akwiza pakunanganika abana bache bakwiza pakulila nkani.

⁵ Abantu bakukwela akaghamba aka Luhiti, bakufwifwitila bo bakukwela. Pakwika ighamba ilya Holonayimu inkuta iya bantu babo bakunanganika yikwivwika.

⁶ Chimbila! Bupoke ubumi bwinyu, mube ngati vyo vinyamana ivya munkolongo.

⁷ Pakuti mwazisubila imbombo zyinyu nu bukabi bwinyu, namwe bulo mukwiza pakusendeliwa kubuzya, sona u chala winyu u Kemoshi akwiza pakusendeliwa kubuzya, poka na baputi bache sona na makambala ghache.

⁸ Uwakunangannya akwiza pakukizila akaya kosi akakulu, sona katalipo nakaya nakamokamo kako kakwiza pakupona. Ikombe likwiza pakuba chisami, sona akaghamba kakwiza pakunanganika, pakuti Ane ne Mwene nanena.

⁹ Umusoke u Mowabu, pakuti akwiza pakunanganika lunulu, Utwaya twache utukulu tukwiza pakuba visami, mumo atalipo nayumoyumo umuntu uwakwikalamo.

¹⁰ “Chighune ku muntu yuyo mukata pakubomba imbombo iya Mwene! Chighune ku muntu yuyo akukanizya u panga wache pakukupula ibanda!”

Utwaya utukulu utwa Mowabu twananganika

¹¹ U Mwene akuti, “U Mowabu ame pamutende ukwanda pabulumendo bwache, ngati bwalwa bubo butikaye nkani mumasika ghache, bubo butapunguliwe musonta yimo nukwinjila musonta iyinji, atabukiteko kubuzya. Po inkalo yache yili ngati mumo yikabela, sona umunusi wache ghuli ngati mumo ghukabela.

¹² Loli amasiku ghakwiza, papo nkwiza pakubatuma abanavuli, babo bakupungula ukufuma musonta nukupungulila kuzi, bakwiza pakupungulamo musonta nukuzifwantannya. Ane ne Mwene nanena.

¹³ “Po u Mowabu akwiza pakuba ni soni nu chala wabo u Kemoshi, ngati mumo isoni zikabalemela aba Izilayeli, ichifwani chicho bakachisubila mu Beteli.

¹⁴ “Nkimba munganena bulibuli ukuti, ‘Aswe twe balwabwite, abantu abamaka pabwite?’

¹⁵ Umu momumo u Mwene Uwamaka Ghosi akunenela: Uwakumunangannya u Mowabu nutwaya twache utukulu nkani afika, abalumendo bache abiza bika pakughoghiwa.

¹⁶ Ukuwa ukwa Mowabu kuli papipi, sona intamyo zyache zikwiza umwalubilolubilo.

¹⁷ Mumulililaye, mwe bapalamani bache, mwebosi mwe mubumenye ubumanyikwe bwache, munenaye mutinji, ‘Nkimba ko kupyokonkana koni ukwa ndisa iyamaka iya bumwene? Nkimba ko kupyokonkana koni ukwa ndisa iyabuchindamu?’

¹⁸ “Mwee bantu aba ku Diboni, ikapo pabuchindamu bwinyu, nukwikala pachisu ichumizu. Pakuti yuyo akunangannya ichisu icha Mowabu, akwiza pakulwa namwe, nukughamongolannya amalinga ghako.

¹⁹ Amwe mwe mukwikala mu Aloyeli, imilila mulubazu ulwa musebo nukwenelezya. Mumulalusye umwanavuli yuyo akuchimbila nu mukolo yuyo apona mumulalusye muti, ‘Nkimba choni chicho chabombiwa?’

²⁰ U Mowabu akoziwa isoni pakuti ananganika. Mufwifwitilaye nukulila! Mufumusye mulusoko ulwa Alinoni, ukuti u Mowabu ananganika.

²¹ Ubulongi bwiza kuchisu icha tughamba mutwaya utukulu nkani utu: Aka Holoni naka Yahazi naka Mefati,

²² naka Diboni naka Nebo sona naka Beti Dibulatayimu,

²³ naka Kiliyatayimu naka Beti Gamuli naka Beti Meyoni,

²⁴ naka Keliyoti sona naka Bozila, mupaka na mutwaya tosi utukulu utwa Mowabu, kubutali na kupipi.

²⁵ Amaka agha Mowabu ghadumuliwa, inyobe yache iyamaka yapyoka. Ane ne Mwene nanena.”

U Mowabu akwiza pakwisiwa

²⁶ U Mwene akuti, “Mumupele ukuti akolwe, pachifukwa icha kumusambukila u Mwene. Mumuleke u Mowabu aghalaghataye mumatapisi ghache, muleke abe chakusekiwa.

²⁷ Nkimba aba Izilayeli batakaba bakusekiwa kukwinyu? Nkimba akalemiwa pakasi pabiba, bo mukupukuzya imitu yinyu pakubasamula, akabalilo kosi kako mukumunena?

²⁸ Mwee bantu mwe mukwikala mu Mowabu, epamo mutwaya utukulu nkani nukwikala pakasi pamabwe. Mubanje ngati yo nkunda yiyo yikuzenga ichivulumbo chache, ku mulyango uwa mpako.

²⁹ “Twivuye nizya mituvyo agha Mowabu, bakwitutumula naloli, bamituvyo sona bamatata, bakwiyennya sona bamadinko.

³⁰ Nkumenye ukwituvya kwache, loli kwabulo, sona ukwitutumula kwache kute nimbombo nayimoyimo. Ane ne Mwene nanena.

³¹ “Polelo nkumulilila u Mowabu, Nkumulilila ni chitima ichikulu nkani, pachifukwa icha bantu aba ku Mowabu, nkubalilila abantu aba ku Kili Helesi.

³² Nkubalilila ngati mumo u Yazeli akulilila, wee mughunda uwa mampesya uwa Sibima. Isamba zyako zikakuzuka mupaka kunyanja, zikafika mupaka na kunyanja iya Yasele. Uwakunangannya awila pa vikomwa ivitonu na mampesya.

³³ Ubuhobosu nu lusekelo vimalite muchisu icha muvundo icha Mowabu. Nakanizya ukwenda ukwa vinyo muchakukanyilamo, atalipo nayumoyumo akukanyankila nukukolomoka ukwa buhobosu. Napapo ukukolomoka kulipo, loli kute kukolomoka ukwa buhobosu.

³⁴ “Ukulila kwabo kukwivwika ukufuma mu Heshiboni namu Eleyale, namu Yahazi, namu Zowala, namu Holonayimu, sona namu Egilati Shelishiya, pakuti ghope amizi agha Nimulimu ghakamukite.

³⁵ Nkwiza pakubaghogha abantu aba muchisu icha Mowabu, babo bakubika ivyabupi pabuzilo ubwapamwanya, nukubochela utwakununkila abachala babo. Ane ne Mwene nanena.

³⁶ “Polelo u moyo wane ghukulilila u Mowabu ngati lyo lilongi, ghukubalilila abantu aba ku Kili Helesi, pakuti ubukabi bosi bubo bakakaba bukamala.

³⁷ Pakuti umuntu wesi amwiye kumutu wache sona umuntu wesi amwiye indevu zyache pachifukwa icha chitima. Inyobe yosi yidumuliwe sona umusana ghosi ghuvwikiwe ni saka.

³⁸ Pavisonje vyosi ivya ku Mowabu sona na mumisebo yache, mutalimo nachimochimo loli ko kulila kwene, pakuti namupyola u Mowabu ngati yo sonta yiyo yitakulondiwa nu muntu nayumoyumo. Ane ne Mwene nanena.

³⁹ “Mwennye u Mowabu namumo apyoleliwa! Bennye abantu bache namumo bakulilila! Mwennye u Mowabu namumo isoni zimulemeye! U Mowabu aba chintu ichakusekiwa, ichintu ichakoghofya ku bantu babo bamuzyunguliye.”

U Mowabu atangachimbila

⁴⁰ U Mwene akuti, “Ennya! Uluko lumo lukwiza lukubuluka ngati lizwanga lilyo likuvikuzulila ivipapande vyache pa Mowabu.

⁴¹ Akaya akakulu nkani aka Keliyoti kakwiza pakulemiwa, sona amalinga ghakwiza pakufyuliwa. Pisiku lilalila amoyo agha basilikali aba Mowabu ghakwiza pakuba ngati moyo uwa mukolo yuyo ali pakusayiwa.

⁴² U Mowabu pakuba luko akwiza pakunanganika, pachifukwa ichakuti akamusambukila u Mwene.

⁴³ Mwee bantu aba mu Mowabu, ubogha ni chiliba sona ni chipingo vikubalindilila. Ane ne Mwene nanena.

⁴⁴ “Umuntu wesi yuyo akuchimbila ichakoghofya, akwiza pakuwila muchiliba, wesi yuyo akwepamo muchiliba, akwiza pakulemiwa muchipingo, pakuti zinizi nkwiza pakumuwisizya u Mowabu, pakabalilo aka lufundo lwache. Ane ne Mwene nanena.

⁴⁵ “Abantu bakuchimbila mu Heshiboni, bate nubwavwilizi nabumobumo. Pachifukwa icha moto uwakwaka mu Heshiboni, sona nindimi izya moto pakasi pa Sihoni, u moto ghukunangannya amaghamba agha mu Mowabu, ichisu icha bantu abalombwa.

⁴⁶ Wee Mowabu, chighune kukwako! Abantu aba ku Kemoshi bananganika, Abana bako abalumendo babuka kubuzya, poka na bana bako abalindu.

⁴⁷ “Loli pope bulo nkwiza pakubanyosezya aba Mowabu ulusako lwabo. Ane ne Mwene nanena.” Panapa po pabumalilo ubwa budumuzi ubwa nongwa iya ba Mowabu.