Yelemiya 47 - IBAYIBOLO 2024

Zizyo u Mwene akunena nizya ba Filisiti

¹ Agha gho mazyu ghagho u Mwene akamubuzya u Yelemiya nizya ba Filisiti, bo u Falabo u mwene uwa Ijiputi achili pakukazyungulila akaya akakulu aka Gaza aghakuti,

² “Umu momumo u Mwene akunenela: Ennya namumo amizi agha kumitu ghakwizulila, ghakwiza pakuba ngati zyo soko zizyo zyizuye nukusata. Ghakwiza pakusata muchisu chosi nukuchibizya chosi chicho chilimo, nutwaya utukulu sona na bantu bosi babo bakwikalamo. Abantu bakwiza pakulila, sona bosi babo bakwikala mulamula bakwiza pakufwifwitila.

³ Bakwiza pakwivwa ichongo icha falasi bo zikuchimbila bakwiza pakwivwa ukuchimbila ukwa ngolo izya balwani sona nukulila ukwa vingelengele vyabo. Abawise batakwiza pakwennya sona kwisinda ukuti babavwe abana babo, inyobe zyabo zitakwiza pakuba namaka naghamoghamo.

⁴ Pachifukwa ichakuti isiku lyafikila ilya kubanangannya aba Filisiti bosi sona nukubamala bosi babo bakapona, babo bangamwavwa u Tile nu Sidoni. U Mwene ali papipi pakubanangannya aba Filisiti, abakusyalako babo bakafuma mulubuzu ulwa Kileti.

⁵ Abantu aba mu Gaza bakwiza pakumwa isisi zyabo pachifukwa icha chitima, sona aba Ashikeloni bakwiza pakuba bulo myee. Mwee bantu abakusyalako, nkimba mukwiza pakwibolannya mupaka liyi?

⁶ “Amwe mukumulila mukuti, ‘Wee panga uwa Mwene, nkimba ukwiza pakutuzya liyi? Nyokela munyambi yako, ikala munumo nukutuzya.’

⁷ Nkimba angatuzya bulibuli bo u Mwene amulamula ukuti alwe ubwite nu Ashikeloni, mulubazu ulwa munyanja?”