Yelemiya 46 - IBAYIBOLO 2024

Aba Babiloni bakubapota aba Ijiputi

¹ U Mwene akamubuzya umulaghuzi u Yelemiya nizya inko izinji:

² Nizya Ijiputi, akanena izya basilikali aba Falabo Neko u mwene uwa chisu icha Ijiputi, babo u Nebukadineza u mwene uwa ku Babiloni akabapota pa Kalikemishi mulusoko ulwa Yufuleti mumwaka uwafolo, bo Yehoyakimu umwana uwa Yosiya u mwene uwa kuchisu icha Yuda akulaghila akati,

³ “Senda ingulu zyinyu inkulu ni nandi, bukagha pakulwa ubwite!

⁴ Bikapo ivyakwikalila pafalasi nukukwelapo! Mwime mumizele bo muvwete ivisote! Pyasya impalala zyinyu, nukuvwala ichakuvwala chinyu icha chela!

⁵ Nkimba choni chicho nkuchennya? Abantu babo bali nubogha, bakunyokela kwisinda, abasilikali babo bapotiwa. Bakuchimbila ukusita ukwennya kwisinda, sona bazyunguliliwe nubogha inkuto zyosi. Ane ne Mwene nanena.

⁶ “Abantu abalubilo bakupotwa pakuchimbila, na basilikali abamaka bakupotwa pakwipoka. Kumitu ukwa lusoko ulwa Yufuleti bakutyelemuka nukuwa.

⁷ “Nkimba wewenu yunuyo yuyo akwimilila ngati lo lusoko ulwa Nayilo, ngati zyo soko izya kwizula?

⁸ Ichisu icha Ijiputi chikwimilila ngati lusoko ulwa Nayilo, ngati zyo soko izya kwizula. Akuti, ‘Nkwiza pakwimilila nukuchidwibizya ichisu, nkwiza pakutunangannya utwaya utukulu na bantu babo bakwikalamo.’

⁹ Wee falasi, chimbilila muntazi! Mwee ngolo, chimbilila muntazi! Mwee bantu ababwite aba mu Etiyopiya, naba mu Puti mwe munyamuye ingulu, mwee bantu aba mu Lidiya abafundi aba bwele.

¹⁰ Loli isiku lila ilya Mwene Uwamaka Ghosi, isiku ilya kutanizya, akubatanizya abalwani bache. U panga wache akwiza pakubanangannya, nukung'wela ibanda mupaka ikute. Pakuti u Mwene Uwamaka Ghosi akwiza pakubika ichakwiyipa, muchisu icha kumitu papipi nu lusoko ulwa Yufuleti.

¹¹ “Wee mulindu uwa muchisu icha mu Ijiputi, bukagha kuchisu icha Giliyadi nukusenda umulembo, napapo waghayezya nkani amalembo aminji, pope bulo wapotwa, ububine bwako butakwiza pakupola.

¹² Inko zikwiza pakwivwa ni nkozyasoni zyako, ukulila kwako kwivwika pachisu chosi ichapasi. Umusilikali weka akwiza pakwipunula pawamwabo, po bosi bakwiza pakuwila poka.”

Ukwiza ukwa Nebukadineza

¹³ Agha gho mazyu ghagho u Mwene akamubuzya u Yelemiya umulaghuzi nizya kwiza ukwa Nebukadineza u mwene uwa chisu icha Babiloni, pakulwa ubwite ni chisu icha Ijiputi akati,

¹⁴ “Fumusya mukaya akakulu aka Ijiputi, lumbilila mu Migidoli mu Memfisi sona na mu Tapanesi, ‘Iyannya pakwipoka, pakuti ubwite bukwiza pakubanangannya bosi babo babazyunguliye.’

¹⁵ Nkimba choni chicho abasilikali binyu bakwiza pakupotiwa? Batakwiza pakujimba, pachifukwa ichakuti u Mwene akwiza pakubawisya pasi.

¹⁶ Bakwiza bakwipunula kabilikabili, nukuwilana benebene. Bakwiza pakunena ukuti, ‘Nyamuka, twende tunyokele kubakamu bitu, tubukaye kuchisu chicho tukapapiliwako, pachifukwa ichakuti umulwani witu akwiza pakutunangannya.’

¹⁷ Bakwiza pakunena ukuti, ‘U Falabo u mwene uwamu Ijiputi we chongo ichikulu nkani, atagha ulusako.’

¹⁸ “U Mwene Uwamaka Ghosi akuti: Nkulapa ukuti weka akwiza yuyo ali ngati lighamba ilya Taboli, pakasi pamaghamba, ngati lighamba ilya Kalimeli, lilyo lili mulubazu ulwa nyanja.

¹⁹ Yannya ukatundu winyu uwakubuka nawe kubuzya, mwe bantu mwe mukwikala mu Ijiputi, pakuti akaya aka Memfisi kakwiza pakuba chisami, sona abantu batakwiza pakwikalaghamo.

²⁰ “Ichisu icha Ijiputi mpampali iyakuboneka akiza nkani loli amasasi agha kumitu ghakwiza pakuyiluma impampali yila.

²¹ Abasilikali abaganyu babo bali nabo, bali ngati ngwata inyine. Bope bulo bakwiza pakunyokela mwisinda nukuchimbila poka, pakuti isiku lyabo ilya lufundo likubizila, batakwiza pakujimba, pakuti isiku ilya lufundo likubizila, ko kabalilo akakunanganikila

²² Izyu ilya chisu icha Ijiputi lili ngati lya njoka yiyo yikuchimbila, bo abalwani bakupalamila na maka, bakubuka kukwache ni ntemo, ngati bantu babo bakudumula amakwi.

²³ Bakwiza pakuyidumulannya imisitu napapo yingavwinka nkani. Pakuti abantu binji nkani ngati bo bakanta babo batangabelengiwa nukubelengiwa. Ane ne Mwene nanena.

²⁴ “Abantu aba mu Ijiputi isoni zikwiza pakubalema bakwiza pakubikiwa munyobe izya bantu aba kumitu.”

²⁵ U Mwene Uwamaka Ghosi, u Chala uwa ba Izilayeli akuti, “Nkwiza nulufundo kwa Amoni u chala uwa Tebesi napa Falabo, sona na muchisu chosi icha Ijiputi poka na bachala bache, na bamwene bache, sona napa bosi babo bakumusubila u Falabo.

²⁶ Nkwiza pakubabika munyobe izya Nebukadineza u mwene uwa chisu icha Babiloni sona na munyobe izya makambala ghache babo bakulonda pakubunangannya ubumi bwabo. Bo pachilapo akabalilo, ichisu icha Ijiputi chikwiza pakuba na bantu ngati mumo chikabela nabo pakwanda. Ane ne Mwene nanena.

U Mwene akwiza pakubapoka abantu bache

²⁷ “Wee Yakobo umubombi wane, utakanyilaye, wee Izilayeli, utakabanje nubogha. Naloliloli nkwiza pakukupoka ku vyisu ivyakubutali, na banyenya bako ukufuma kuchisu icha buzya. Abaluko ulwa Yakobo bakwiza pakunyokela muchisu chabo, sona bakwiza pakwikala akiza nkani mumutende nu mwakufwasa, sona atakwiza pakubapo nayumoyumo uwakuboghofya.

²⁸ Wee Yakobo umubombi wane, utakanyilaye, pakuti indi poka namwe sona nkwiza pakubapoka. Nkwiza pakuzinangannya inko zyosi, kuko nabanyampanizizya, loli amwe ntakwiza pakubananganizizya zila. Nkwiza pakubapa amafundwe nubwanaloli, ntakwiza pakubaleka bulo ukusita pakubafunda.”