Yelemiya 44 - IBAYIBOLO 2024

Amazyu agha Chala kuba Izilayeli mu Ijiputi

¹ U Mwene akambuzya nizya ba Izilayeli babo bakikalagha kuntende ku Ijiputi, mutwaya utukulu nkani utwa Migidoli naka Tapanesi naka Memfisi sona na kumitu ukwa chisu icha Ijiputi.

² U Mwene Uwamaka Ghosi, u Chala uwa Izilayeli akati, “Amwe mwebene mukakwennya ukunanganika kuko nkakawisizya akaya aka Yelusalemu sona nutwaya tosi utukulu utwa Yuda. Ilelo utwaya tula twaba visami sona atalimo nayumoyumo umuntu uwakwikalamo

³ pachifukwa ichakuti abantu bakankalalizya sona bakabomba ububibi. Bakocha utwakununkila sona bakabiputa abachala abanji, babo amwe mwebenecho pamo abanyenya binyu mutakabamanyamo nalumolumo.

⁴ Kabilikabili nkabatumila ababombi bane abalaghuzi, babo bakababuzya ukuti, ‘Mutakabombaye ichintu ichamwiko chicho inchibengite.’

⁵ Loli batakivwa pamo ukuteghelezya napo panandi. Batakalondagha pakubuleka ububibi bwabo pamo pakubika ivyakwiyipa ku bachala abanji.

⁶ Polelo, ubukali bwane ubwakoghofya bukaka ngati moto uwa muvuno pa twaya utukulu utwa Yuda sona napa misebo iya mu Yelusalemu. Utwaya tula tukaba visami ngati mumo tubeleye ilelo.”

⁷ Po u Mwene, u Chala u Uwamaka Ghosi u Chala uwa Izilayeli akubalalusya akuti, “Nkimba choni chicho mukulonda pakwinangannya mwebene ni vintu vivyo mubombite mwebene. Nkimba mukulonda pakubanangannya aba Yuda abanavuli na bakolo na bana abanandi sona na babonda, umwakuti atalipo nayumoyumo uwakusyalako?

⁸ Nkimba choni chicho mukunkalalizya ni mbombo zyinyu izya kubiputa abachala abanji sona mukubika ivyakwiyipa vyinyu ku bachala aba mukaya aka Ijiputi mumo mukwikala? Nkimba mukubomba zinizi ukuti mwinangannye mwebene, umwakuti inko izya muchisu ichapasi zibapele pakuba bantu abakusekiwa sona naba kughuniwa?

⁹ Nkimba mwabuluvya ububibi bubo bubombiwe mutwaya utukulu utwa Yuda sona na mumisebo iya mu Yelusalemu, vivyo vikabombiwa na banyenya binyu na bamwene aba mutwaya utukulu utwa mu Yuda namwe sona na bachi binyu?

¹⁰ Loli mupaka nilelo mulekite pakwiyisya mwebene. Mulekite pakunchindika sona mutakuzikonka indaghilo zizyo nkabapa amwe poka na banyenya binyu.”

¹¹ Polelo, u Mwene Uwamaka Ghosi, u Chala uwa Izilayeli akuti, “Nadumula pakubanangannya aba Yuda bosi.

¹² Nkwiza pakubasenda abantu bosi abakusyalako aba mu Yuda, babo bakabikapo u moyo pakwikala mu Ijiputi. Bosi bakwiza pakumalila mu Ijiputi, bakwiza pakughoghiwa kubwite, pamo nizala. Ukwandila ku banandi mupaka ku basongo, bakwiza pakughoghiwa kubwite pamo nizala. Bakwiza pakuba bantu abakughuniwa naba koghofya.

¹³ Nkwiza pakubafunda babo bakwikala mu Ijiputi nu bwite, nizala, sona ni chiwaya ngati mumo nkabafundila aba ku Yelusalemu.

¹⁴ Atalipo nayumoyumo uwakusyalako mu Yuda yuyo akwikala mu Ijiputi akwiza pakuchimbila pamo ukuba nubumi pamo pakunyokela ku Yuda, kuko bakukusamba pakunyokela nukwikala kulakula, atalipo nayumoyumo yuyo akwiza pakunyokela, loli bene abanandi bulo babo bakachimbila kubwite.”

¹⁵ Po abanavuli bosi babo bakazimanya ukuti abachi babo bakochanga utwakununkila ku bachala abanji poka na bakolo abanji babo bakabapo, ni chilundilo ichikulu sona na bantu bosi babo bakikalagha ku kumitu ukwa Ijiputi sona naku kuntende, bakamwamula u Yelemiya bakati,

¹⁶ “Aswe tutakwiza pakuteghelezya amazyu ghagho watubuzya mwitabwa ilya Mwene!

¹⁷ Nubwanaloli bosi tukwiza pakubomba chosi chicho tukanena ukuti tukwiza pakuchibomba. Tukwiza pakumochela utwakununkila u Mwene Umukolo Uwakumwanya nukumubikila ichakwiyipa icha vinyo ngati mumo aswe na banyenya na bamwene bitu na makambala ghitu tukabombela mutwaya utukulu utwa Yuda sona na mumisebo iya Yelusalemu. Pakabalilo kalakala tukaba ni chakulya ichinji nkani, sona tukaba akiza nkani, yitakabapo intamyo nayimoyimo.

¹⁸ Loli mumo tukalekela pakumochela u Mwene Umukolo Uwakumwanya, ichakwiyipa ichakocha ni vyakwiyipa ivya vinyo, tutakabitepo nachimochimo, twafwila kubwite sona nizala.”

¹⁹ Po abakolo bala bakendelela pakunena bakati, “Bo tukumochela utwakununkila u Mwene Umukolo Uwakumwanya nukumupungulila ichakwiyipa ichakung'wela, nkimba abalume bitu batakazimanya ukuti tukumupiyila ivibama vivyo vikaba muchifwani chache sona namumo tukamupungulilagha ichakwiyipa icha vinyo?”

²⁰ Po u Yelemiya akababuzya abantu bosi, abanavuli na bakolo babo bakamwamulagha akati,

²¹ “Nkimba mukwinong'ona ukuti u Mwene atakukumbuka nizya utwakununkila utwakocha mutwaya utukulu utwa Yuda na mumisebo iya Yelusalemu, chicho amwe na banyenya binyu na bamwene na makambala ghinyu sona na bantu bosi aba muchisu?

²² Bo u Mwene akupotwa pakwilema pachifukwa icha mbombo zyinyu imbibi sona ni vintu ivinyazu vivyo mukabombagha, ichisu chinyu chikaghuniwa nukuba chisami, chicho abantu batakwikalamo nabamobamo, ngati mumo chibeleye ilelo.

²³ Pachifukwa ichakuti amwe mukamochela utwakununkila nukumunangila u Mwene sona mutakamwivwila pamo mutakaghakonka amalamulo ghache pamo indaghilo zyache zizyo akababuzya, po ilelo mutakaswighaye bo mukuzyennya intamyo izi.”

²⁴ Po u Yelemiya akababuzya abantu bosi poka na bakolo akati, “Ivwa amazyu agha Mwene mwe ba Yuda mwe bosi mwe mukwikala mu Ijiputi.

²⁵ U Mwene Uwamaka Ghosi, u Chala uwa Izilayeli akuti: Amwe poka na bachi binyu mwanena ukuti, ‘Tukwiza pakubomba zizyo tukafinga. Tukwiza pakocha utwakufukizya utwakununkila nukubika ichakwiyipa icha vinyo kwa Mwene Umukolo Uwakumwanya.’ “Po endelela, bomba chicho mukalayizya! Sunga ifingo zyinyu!

²⁶ Loli ivwa amazyu agha Mwene mwe ba Yuda mwebosi mwe mukwikala mu Ijiputi. U Mwene akuti, ‘Nkulapila mwitabwa lyane ikulu ukuti: Atalipo nayumoyumo umu Yuda yuyo akwikala mu Ijiputi akwiza pakulapila sona mwitabwa linili ukuti, “Nkulapa mwitabwa ilya Mwene Uwamaka Ghosi umumi.”

²⁷ Nkwiza pakwenelezya ukuti imbabombele ichintu ichibibi, ntakwiza pakubabombela inyiza. Aba Yuda babo bali mu Ijiputi bakwiza pakuzimila nu bwite nizala mupaka bosi bananganike.

²⁸ Babo bapona kubwite nukunyokela mu Yuda abakufuma mu Ijiputi, bakwiza pakuba banandi bulo. Po bosi abakusyalako, babo bakiza pakwikala mu Ijiputi bakwiza pakumanya ukuti zili kwiyi izyanaloli, izyane pamo izyabo.

²⁹ Ichi chikwiza pakuba chimanyilo ku kwinyu ukuti nkwiza pakubafunda mubuzilo bunubu, umwakuti mumanye ukuti amazyu ghane aghakuti, “Nkwiza pakubafunda,” ghanaloli.

³⁰ Umu momumo u Mwene akunenela: Nkwiza pakumubika u Falabo u Hofula u mwene uwamu Ijiputi munyobe izya balwani, babo bakubulondelezya ubumi bwache, ngati mumo nkamubikila u Zedekiya u mwene uwa Yuda munyobe izya Nebukadineza u mwene uwamu Babiloni, yuyo akalondagha pakumughogha.’ ”