Yelemiya 43 - IBAYIBOLO 2024

Abantu bakubuka ku Ijiputi

¹ Bo u Yelemiya amala pakubabuzya abantu amazyu ghosi agha Mwene u Chala wabo, ghagho akamutuma ukuti ababuzye,

² u Azaliya umwana uwa Hoshaya nu Yohanani umwana uwa Kaleya sona na banavuli bosi abamadinko bakamubuzya u Yelemiya bakati, “We mumyasi! U Mwene u Chala witu atakutumite pakutubuzya ukuti, ‘Mutakabukayeko ku Ijiputi pakwikala kulakula.’

³ Loli u Baluki umwana uwa Neliya weyuyo akukufyenga bulo ukuti ulwanaye naswe sona nukuti atubike munyobe izya ba Babiloni, umwakuti batughoghe pamo batusendele kubuzya ku Babiloni.”

⁴ Po u Yohanani umwana uwa Kaleya sona na balongozi bosi aba basilikali na bantu bosi bakakana pakukonka ilamulo ilya Mwene ilyakuti bikalaye muchisu icha Yuda.

⁵ Mubuzilo bwache, u Yohanani umwana uwa Kaleya sona na balongozi bosi aba basilikali bakabalongozezya bosi abakusyalako mu Yuda babo bakanyokela ukufumila mu inko zyosi zizyo bakazichimbizikizyako.

⁶ Abantu banaba bakaba bo aba: Abanavuli bosi na bakolo bosi na bana bosi sona na bana abalindu abamwene babo u Nebuzaladani umulongozi usongo uwa balindilili akabaleka nu Gedaliya umwana uwa Ahikamu, umwana uwa Shafani. Bakamusenda sona u mulaghuzi u Yelemiya nu Baluki umwana uwa Neliya.

⁷ Bakinjila mu Ijiputi pachifukwa icha kulisulannya ilamulo ilya Mwene nukubuka mupaka ku Tapanesi.

⁸ U Mwene akamubuzya u Yelemiya mu Tapanesi akati,

⁹ “Senda amabwe amakulu nkani nukughafukila mwitope palubinjilo lulo babikitepo amabwe ghala pa lubinjilo ulwa njelwa pamulyango uwa nyumba iya bumwene iya Falabo mu Tapanesi, bo aba Yuda bakukwennya ukubomba zinizyo.

¹⁰ Po ubabuzye ukuti, ‘U Mwene Uwamaka Ghosi, u Chala uwa Izilayeli akwiza pakumusenda umubombi wache u Nebukadineza, u mwene uwa chisu icha Babiloni, nkwiza pakubika ichitengo chache icha bumwene pamabwe ghagho naghafukila pano, sona akwiza pakuchikuzula ichisakasa chache icha bumwene pa mabwe ghala.

¹¹ Akwiza pakukanangannya akaya aka Ijiputi nukubapelela intamyo izya bufwe babo bubabaghiye nukubinjizya mubuzya abantu babo ubuzya bubabaghiye sona ukufwila kubwite babo babaghiye ukufwila kubwite.

¹² Akwiza pakuyocha inyumba iya kwiputilamo abachala aba Ijiputi. Akwiza pakuzyocha inyumba zyabo izyakwiputilamo nukubasenda abachala babo pakuba bazya. Ngati mumo umudimi akwefesezya impanyi mumwenda wache, momumo akwiza pakumuswefesezya u Ijiputi sona akwiza pakwepamo mu Ijiputi mumutende.

¹³ Akwiza pakuzimongolannya impanda izyakumwiputilamo uchala uwa izuba mu Ijiputi, sona akwiza pakuzyochannya inyumba izyakwiputilamo abachala aba ku Ijiputi.’ ”