Yelemiya 42 - IBAYIBOLO 2024

Abantu bakumulaba u Yelemiya ukuti abiputile

¹ Po bosi abalongozi aba basilikali, poka nu Yohanani umwana uwa Kaleya nu Yezaniya umwana uwa Hoshaya, sona na bantu bosi ukwandila ku banandi mupaka ku basongo bakamufika umulaghuzi u Yelemiya,

² bakamubuzya umulaghuzi bakati, “Twalamba, utulabileko kwa Mwene u Chala witu aswe twe bakusyalako. Ngati mumo ukutwenezya, napapo tukaba binji nkani, loli ilelo twasyala banandi bulo.

³ Utulabileko kwa Mwene u Chala witu ukuti atubuzye kuko tubukaye sona nachicho tungabomba.”

⁴ Umulaghuzi u Yelemiya akabamula akati, “Nabivwa, nkwiza pakubalabila kwa Mwene u Chala winyu ngati mumo mwalabila; nkwiza pakubabuzya zyosi zizyo u Mwene akunena, sona ntakwiza pakubavindapo nachimochimo.”

⁵ Po bakamubuzya u Yelemiya bakati, “U Mwene abanje we kaboni uwanaloli sona abanje musubiliwa pakutususya nanti tutakubomba ukuyana na vyosi vivyo u Mwene u Chala wako akukutuma pakutubuzya.

⁶ Manyi vikutuhobosya pamo vikutukalalizya, aswe tukwiza pakumwivwila u Mwene u Chala witu yuyo tukukutumako, umwakuti vitwendele akiza, pakuti tukwiza pakumwivwila u Mwene u Chala witu.”

U Mwene amula ulwiputo ulwa Yelemiya

⁷ Bo ghachilapo amasiku 10, u Mwene akamwamula u Yelemiya.

⁸ Po akamwitizya u Yohanani umwana uwa Kaleya poka na balongozi aba basilikali babo bakaba poka nawe sona na bantu bosi ukwandila ku banandi mupaka ku basongo.

⁹ Akababuzya akati, “U Mwene u Chala uwa Izilayeli kuko mukantuma ukuti imbalabileko akuti:

¹⁰ Nanti mukwikala muchisu chinichi, ntakwiza pakubanyampannya awe, loli nkwiza pakubazenga, ntakwiza pakubanyunkulannya awe, loli nkwiza pakubabyala, pakuti nanyokako kuchintu ichibibi chicho nkababombela.

¹¹ Mutakamunyilaye u mwene uwa ku Babiloni, yuyo mukumunyila. Mutakamunyilaye pakuti indinamwe sona nkwiza pakubapoka munyobe zyache.

¹² Nkwiza pakuba nichililizi umwakuti wepe abanje namwe nichililizi nukubitikizya ukuti mwikalaye muchisu chinyu.

¹³ “Loli nanti mukuti, ‘Aswe tutakulonda pakwikala muchisu chinichi,’ po sona mutakughivwila amazyu agha Mwene u Chala winyu,

¹⁴ sona nanti mukuti, ‘Twakana, aswe tukwiza pakwikala mu Ijiputi mumo tutakwiza pakubwennyamo ubwite pamo ukwivwa ukulila ukwa ipati pamo ukusobelwa ichakulya,’

¹⁵ po ivwa amazyu agha Mwene ghagho akunena kukwinyu, mwe bakusyalako aba Yuda. U Mwene Uwamaka Ghosi u Chala uwa Izilayeli akuti, ‘Nanti mwadumula pakubuka ku Ijiputi pakwikala kulakula,

¹⁶ po ubwite bubo mukubunyila bukwiza pakubagha sona izala yiyo mukuyipasya yikwiza pakubagha mu Ijiputi, po mukwiza pakufwila kulakula.

¹⁷ Momumo bosi babo badumuye pakubuka pakwikala ku Ijiputi bakwiza pakughoghiwa nupanga, nizala sona ni chiwaya, atalipo nayumoyumo yuyo akwiza pakuba nubumi pamo pakupona ichiwaya chicho nkwiza pakubawisizya.’

¹⁸ U Mwene Uwamaka Ghosi, u Chala uwa Izilayeli akuti, ‘Ngati mumo ubukali bwane sona nukoghofya kwapunguliliwa ku bantu babo bakwikala mu Yelusalemu, momumo ubukali bwane bukwiza pakupunguliliwa papinyu bo mukubuka ku Ijiputi. Mukwiza pakuba chintu chicho abantu bakuchighuna sona nichakoghofya, ni chamusamu pamo ichakusekiwa, mutakwiza pakubwennya sona ubuzilo bula.’ ”

¹⁹ U Yelemiya akati, “Amwe mwe bakusyalako mu Yuda, u Mwene akuti, ‘Mutakabukayeko ku Ijiputi.’ Nkubasoka isiku ili ukuti mube nubwanaloli pa chinichi,

²⁰ ukuti mukananga nkani bo mukuntuma kwa Mwene u Chala winyu nukunena ukuti, ‘Utwiputileko kwa Mwene u Chala witu, utubuzye chosi chicho akunena, po tukwiza pakuchibomba.’

²¹ Ilelo nababuzya amazyu ghosi ghagho u Mwene u Chala winyu akambuzya ukuti imbabuzye, loli mwaghakana.

²² Po ilelo muzimanye ukuti, mukwiza pakufwa nu bwite, nizala sona nichiwaya ku buzilo bubo mukulonda pakwikalako.”