Yelemiya 41 - IBAYIBOLO 2024

¹ Mumwezi uwaseveni uwa mwaka ghulaghula, u Ishimayeli umwana uwa Netaniya, umwana uwa Elishama, uwa luko ulwa bumwene sona yuyo akaba wabamo abasongo abamwene, akiza na bantu 10 kwa Gedaliya umwana uwa Ahikamu pa Mizipa. Bo bakulya poka palapala,

² u Ishimayeli umwana uwa Netaniya sona na banavuli 10 babo bakaba nawe bakawesa upanga wabo nukumughogha u Gedaliya umwana uwa Ahikamu, umwana uwa Shafani, nukumughogha nupanga umuntu yuyo u mwene uwa ku Babiloni akamusala pakuba we mulaghili uwa chisu.

³ U Ishimayeli akabaghogha aba Yuda bosi babo bakaba poka nu Gedaliya ku Mizipa na basilikali aba ku Babiloni.

⁴ Indabi yache, bo abantu batazimenye ukuti u Gedaliya aghoghiwa,

⁵ abantu 80 aba ku Shekemu naba ku Shilo sona naba ku Samaliya babo bakamwa indevu zyabo, bakazepulannya amenda ghabo nukwibolannya bene ukulanjizya ukuti bali pa chililo. Bakasenda ivyakwiyipa ivya busu sona nutwakununkila nukuvibika mu Nyumba iya Mwene.

⁶ U Ishimayeli umwana uwa Netaniya akafuma ku Mizipa ukuti akomane nabo, akafwifwitilagha bo akubuka. Bo akomana nabo, akababuzya akati, “Zagha kwa Gedaliya umwana uwa Ahikamu.”

⁷ Bo babuka mukaya akakulu nkani kala, u Ishimayeli umwana uwa Netaniya na banavuli babo bakaba poka nawe bakabaghogha nukubasumbila muchiziba.

⁸ Loli abantu 10 bala bakamubuzya u Ishimayeli bakati, “Utakatughoghaye! Tuli ni ngano na mapemba na mafuta sona nu buchi vivyo vifisiwe mumughunda.” Po akabaleka sona atakabaghogha poka na bantu abanji.

⁹ Muchiziba mumo akayisumbilamo imivimba yosi iyabanavuli babo akabaghogha poka nu Gedaliya chikaba chiziba chicho u mwene u Asa akakumba pakuba chakuvwamilamo bo akulwa ubwite nu mwene u Baasha uwamu Izilayeli. U Ishimayeli umwana uwa Netaniya akachizuzya nimivimba.

¹⁰ U Ishimayeli akabalema abantu bosi babo bakasyalikila ku Mizipa: Abana abalindu abamwene poka na bosi babo bakasyalikila kulakula. U Nebuzaladani umulongozi uwa balindilili akabasalila u Gedaliya umwana uwa Ahikamu. U Ishimayeli umwana uwa Netaniya akabasenda pakuba bazya, akaloboka pakubuka kuchisu icha bantu abaluko ulwa Amoni.

¹¹ Bo u Yohanani umwana uwa Kaleya sona na balongozi bosi aba basilikali babo bakaba poka nawe bivwa nizya bubibi bubo u Ishimayeli umwana uwa Netaniya akabomba,

¹² bakabasenda abantu babo bosi nukubuka nabo pakulwa nu Ishimayeli umwana uwa Netaniya. Bakamulema kuchiziba ichikulu nkani icha mu Gibeyoni.

¹³ Bo abantu bosi babo bakaba nu Ishimayeli bamwennya u Yohanani umwana uwa Kaleya na balongozi aba basilikali babo bakaba nawe, bakahoboka nkani.

¹⁴ Abantu bosi babo u Ishimayeli akabasenda ku Mizipa pakuba bazya bakanyokela nukubamba poka nu Yohanani umwana uwa Kaleya.

¹⁵ Loli u Ishimayeli umwana uwa Netaniya sona na bantu eyiti banaba bakepako kwa Yohanani nukuchimbilila kuchisu icha Amoni.

¹⁶ Po u Yohanani umwana uwa Kaleya poka na balongozi bosi aba basilikali babo bakaba poka nawe bakabasenda abantu bosi babo bakasyalikila ku Mizipa babo u Ishimayeli umwana uwa Netaniya akabasenda pakuba bazya, bo amughogha u Gedaliya umwana uwa Ahikamu. Babo akabasenda bakaba bo aba: Abasilikali na bakolo na bana sona na makambala agha munyumba iya mwene, babo u Yohanani akiza nabo ukufumila ku Gibeyoni.

¹⁷ Po bakendelela nu bulendo nukutuzya pa Geluti Kimuhamu papipi nu Betelehemu pabulendo bwabo ubwakubuka ku Ijiputi.

¹⁸ Bakabanyilagha abasilikali aba ku Babiloni, pachifukwa ichakuti u Ishimayeli umwana uwa Netaniya akamughogha u Gedaliya umwana uwa Ahikamu, yuyo akasaliwa nu mwene uwa ku Babiloni pakuba mulaghili uwa chisu.