Yelemiya 40 - IBAYIBOLO 2024

U Yelemiya akusatuliwa

¹ U Mwene akanena nu Yelemiya bo u Nebuzaladani umulongozi uwa balindilili bamusatula ku Lama. Akamwagha u Yelemiya apinyiwe ni minyololo poka naba mujele bamo aba ku Yelusalemu sona naba ku Yuda babo bakasendiwa pakubuka nabo kubuzya mu Babiloni.

² Bo umulongozi uwa balindilili amwagha u Yelemiya, akamubuzya akati, “U Mwene u Chala wako akanena nizya chintu ichibibi chicho chikwiza pakukawila akaya aka.

³ Sona ilelo u Mwene achikwanilisya. Abomba ngati mumo akanenela ukuti akwiza pakuchibomba. Chosi ichi chikabombiwa pachifukwa ichakuti mwe bantu mukamubombela imbibi u Mwene sona mutakamwivwila.

⁴ Loli ilelo nkukusatula iminyololo yiyo bakupinyite munyobe zyako. Tubukaye ku Babiloni nanti wighanite, ane nkwiza pakukusungilila, loli nanti utakulonda, po utakizayeko. Ennya, ichisu chosi chili munyobe zyako, buka kosi kuko ungighana.”

⁵ Bo u Yelemiya atakwamula, u Nebuzaladani akamubuzya akati, “Nyokela kwa Gedaliya umwana uwa Ahikamu, umwana uwa Shafani, yuyo u mwene uwamu Babiloni amusala pakuba mulongozi uwa twaya utukulu utwa Yuda, nukwikala nawe pakasi pabantu pamo bukagha kosi kuko ungighana.” Po umulongozi akamupa ichakulya ni chabupi nukumubuzya ukuti abukaye.

⁶ Po u Yelemiya akabuka kwa Gedaliya umwana uwa Ahikamu ku Mizipa nukwikala nawe pakasi pabantu babo bakasyalikila muchisu chilachila.

U Gedaliya umulongozi uwa Yuda

⁷ Bakabapo bamo abalongozi na basilikali aba Chiyuda babo batakiyipa bene. Bakivwa ukuti u mwene uwamu Babiloni akamwimika u Gedaliya umwana uwa Ahikamu pakuba mulongozi uwa chisu nukuti abenelezyanje abanavuli na bakolo sona na bana babo bakaba bapina nkani muchisu chila sona babo batakalemiwa pakuba bazya ku Babiloni.

⁸ Babo bakabuka kwa Gedaliya ku Mizipa bo aba: U Ishimayeli umwana uwa Netaniya nu Yohanani nu Yonatani abana aba Kaleya nu Selaya umwana uwa Tanihumeti na bana aba Efayi umwana uwa Netofa nu Yezaniya umwana uwa Maaka sona na bantu babo.

⁹ U Gedaliya umwana uwa Ahikamu, umwana uwa Shafani, akalapa ichilapo nukubasimikizya abantu bala ukuti, “Mutakanyilaye pakubabombela aba ku Babiloni. Mwikalane muchisu chinichi sona mumubombelaye u mwene uwamu Babiloni, po ivintu vyosi vikwiza pakubendelagha akiza.

¹⁰ Ane nemwene nkwiza pakwikala mukaya aka Mizipa pakuba mwimilili winyu pantazi paba Babiloni babo bakwiza kukwitu, loli amwe musende u vinyo ni vikomwa sona na mafuta nukuvibika musonta izyakubikilamo nukwikala mutwaya utukulu tuto mwatufyula.”

¹¹ Umwakuyana bulo, bo aba Yuda aba ku Mowabu naba ku Amoni naba ku Edomu sona naba mutwaya tosi utunji bivwa ukuti u mwene uwa ku Babiloni akabaleka abantu bamo abakusyalako mu Yuda nukuti akamusala u Gedaliya umwana uwa Ahikamu umwana uwa Shafani pakuba mulaghili wabo,

¹² po aba Yuda bosi bakanyokako ku twaya tosi tuto bakanyampaniziwako nukunyokela ku Yuda naku Gedaliya pa Mizipa ukufumila mutwaya tosi tuto bakanyampaniziwako. Bakinula u vinyo u mwinji nkani sona ni vikomwa ivyinji nkani.

U Gedaliya aghoghiwa

¹³ U Yohanani umwana uwa Kaleya sona na balongozi bosi aba basilikali babo bakavwamagha mwikombe bakabuka kwa Gedaliya ku Mizipa,

¹⁴ bakamulalusya bakati, “Nkimba uzimenye ukuti u Baalisi u mwene uwa aba Amoni amutumite u Ishimayeli umwana uwa Netaniya ukuti ize akughoghe?” Loli u Gedaliya umwana uwa Ahikamu atakabasubila.

¹⁵ Po u Yohanani umwana uwa Kaleya akamubuzya u Gedaliya kubusyefu mu Mizipa akati, “Unyitikizye ukuti imbuke pakumughogha u Ishimayeli umwana uwa Netaniya, sona nayumoyumo atakwiza pakuzimanya. Nkimba pali chifukwa choni ichakukughoghela nukwitikizya ukuti aba Yuda bosi babo bakuzyunguliye banyampane sona nukuti bosi abakusyalako bananganike?”

¹⁶ Loli u Gedaliya umwana uwa Ahikamu akamwamula u Yohanani umwana uwa Kaleya akati, “Utakabombe zinizi! Pakuti ukumutamantila bulo u Ishimayeli.”