Yelemiya 4 - IBAYIBOLO 2024

Ukwitiziwa ukwa ba Izilayeli ukuti bapinduke

¹ U Mwene akuti, “Mwee ba Izilayeli, nanti mukulonda pakunyokela kukwane, nyokela. Mwefyepo ivifwani ivinyazu vyosi pamaso papane, sona mutakusobelapo nalumo,

² nanti mukulapa nu bwanaloli na mubugholosu, naloli nu Mwene umumi inko zikwiza pakusayiwa na yuyo, sona mumwache mukwiza pakuba ubuchindamu.”

³ Umu momumo u Mwene akunenela kuba Yuda na ku Yelusalemu, “Limagha amaghunda ghinyu sona mutakabyalaye imbeyu zyinyu pakasi pa mivwa.

⁴ Mwisilimule mwebene kwa Mwene sona mughasilimule amoyo ghinyu, mwe bantu aba mu Yuda na mwe bantu aba mu Yelusalemu, nanti mutakubomba bunubu ubukali ubwa Mwene bukwiza pakwaka ngati moto, pachifukwa icha bubibi bwinyu bubo mwabomba, sona atalipo nayumoyumo uwakughuzimya.

Ababwite aba kumitu bakwiza nintamyo

⁵ “Fumusya muchisu icha Yuda nicha Yelusalemu ukuti, ‘Lizya ipati muchisu chosi!’ Kolomoka nukuti, ‘Bungana poka! Zagha tuchimbilile mutwaya utukulu utwa malinga!’

⁶ Kwezya indembela ku kaya aka Ziyoni! Chimbila lubilolubilo ukuti mupone, pakuti nkutuma intamyo izya kumitu sona nukunanganika ukukulu nkani.”

⁷ Inkalamu yafumila mumusitu, wepe uwakunangannya ivyisu anyamuka. Abulekite ubuzilo bwache umwakuti achinangannye ichisu chinyu. Utwaya twinyu utukulu tukwiza pakuba visami mumo mutakwikalamo abantu.

⁸ Po muvwale amasaka pachifukwa icha chitima, mulilaye nukukolomoka, pakuti ubukali ubwa Mwene butepitepo papitu.

⁹ U Mwene akuti, “Pisiku lilalila, u mwene na makambala batakwiza pakuba namaka naghamoghamo, abaputi bakwiza pakoghofiwa, sona abalaghuzi bakwiza pakuswigha bulo.”

¹⁰ Po nkati, “Wee Mwene Uwamaka Ghosi, naloli wabazimbula abantu aba poka naba mu Yelusalemu! Ukababuzya ukuti, ‘Mukwiza pakuba nu mutende,’ loli bo upanga ali pasingo zyabo.”

¹¹ Pa kabalilo kalakala, abantu aba mu Yelusalemu bakwiza pakubuziwa ukuti, “Impepo iyakocha iya pabuzilo ubwapamwanya ubwa munkolongo yikubaputila abantu bane, loli te mpepo iya kupetela pamo iya kuswefezya.

¹² Nkubatumila impepo iya maka nkani. Nene nkwiza nu bulongi papabo.”

U Yuda azyunguliliwe na balwani

¹³ Ennya! Abalwani bakwiza ngati mabingu, ingolo zyabo zikwiza ngati we kankungu, ifalasi zyabo zyalubilo ngati mazwanga. Chighune kukwitu! Twafwa!

¹⁴ Wee Yelusalemu, swefya umoyo wako kumbibi ukuti upokiwe. Nkimba ukwiza pakuba ninyinong'ono imbibi zinizyo mupaka liyi?

¹⁵ Pakuti intumi izya ku Dani zikufumusya amazyu, zikulumbilila intamyo ukufuma patughamba utwa Efulayimu.

¹⁶ “Muzisoke inko, mufumusye mu Yelusalemu muti, ‘Abasilikali aba kuchisu icha kubutali bakwiza, pakulwa nutwaya utukulu nkani utwa Yuda.

¹⁷ Bamuzyungulila u Yelusalemu ngati balindilili aba mumughunda, pachifukwa ichakuti abantu bansambukiye.’ Ane ne Mwene nanena.

¹⁸ “Akendele kinyu ni mbombo zyinyu vyo vivyo vyabizila nintamyo. Ulu lo lufundo lwinyu sona lukubaba, lukughavulazya amoyo ghinyu.”

U Yelemiya ali nichitima pabantu bache

¹⁹ Mwee, intamyo! Mwee intamyo! Nkwigholola nu bubavu. Mwee umoyo wane ghukubaba, umoyo wane ghukukoma nkani, nkupotwa pakuba myee. Pakuti nivwa ukulila ukwa lipati, nivwa ichongo icha bwite.

²⁰ Intamyo zikwiza pamwanya pantamyo; ichisu chosi chipela pakuba chisami. Lubilolubilo ivisakasa vyane vyananganika, pakabalilo akapimpa bulo, umwenda uwakuzighila ghukazepunkana.

²¹ Nkimba imbaghiye pakwennya indembela iya bwite mupaka liyi? Nkimba imbaghiye pakwivwa ukulila ukwa ipati mupaka liyi?

²² U Mwene akuti, “Abantu bane bapunganu, batammenye. Abana babo batakwinong'ona, sona batakwivwisya. Bo bafundi pakubomba ububibi, loli batamenye na pakubomba ubwiza.”

Ichisetuka ichakunangannya

²³ Nkenelezya pachisu ichapasi, chitakaba na kantu nakamokamo, sona nkennya kumwanya nkagha ukuti ulukozyo lutaliko.

²⁴ Nkennya kumaghamba, nkagha ukuti ghakaneng'enagha, sona utughamba tosi tukatetemagha.

²⁵ Nkennya, po mutakabamo nayumoyumo umuntu, sona ichiyuni chosi chikachimbila.

²⁶ Nkennya, nkagha ukuti ichisu icha muvundo chikaba nkolongo, utwaya utukulu tukananganika pachifukwa icha bukali ubwa Mwene.

²⁷ U Mwene akuti, “Ichisu chosi chikwiza pakuba chisami, napapo ntakwiza pakuchinangannya zila.

²⁸ Polelo ichisu chikwiza pakulila sona kope kumwanya kukwiza pakuba chisi chene, pachifukwa ichakuti ane ne Mwene nanena sona ntakwiza pakwandula inyinong'ono zyane, nadumula mpela, ntakwiza pakunyokela kwisinda.”

²⁹ Bo abantu bivwa ichongo icha ababwite babo bakakwela pafalasi na babo bakalasa utulasilo bamo bakachimbilila mumusitu, abanji bakakwela mumabwe. Utwaya tosi utukulu tukalekiwa, sona atalipo nayumoyumo uwakwikala mulamula.

³⁰ Wee Yelusalemu waba we chisami? Nkimba choni chicho uvwalite ivichesamu sona uvwalite amambo agha golide? Nkimba choni chicho ukughapakazya amaso ghako nibanya? Ukwitammya bulo wemwene. Abaghaniwa bako bakukusamula, bakubulonda ubumi bwako.

³¹ Nkivwa ukulila ngati po kwa mukolo yuyo ali pakusayiwa, ukukoloma ukwa yuyo akupapa umwana ukatote. Ukulila ukwa bantu aba mu Ziyoni bo bali pakubulonda ubumi bwabo, bakugholosya inyobe zyabo bakuti, “Mwee nkuzilika! Ubumi bwane bwabikiwa munyobe izya baghoghi.”