Yelemiya 39 - IBAYIBOLO 2024

Ukuwa ukwa Yelusalemu

¹ Mumwaka uwa nayini uwa bulaghili ubwa Zedekiya u mwene uwa chisu icha Yuda, mumwezi uwa teni, u Nebukadineza u mwene uwa chisu icha Babiloni poka na basilikali bache bosi bakakazyungulila akaya akakulu nkani aka Yelusalemu.

² Mumwaka uwa 11 uwa bulaghili ubwa Zedekiya, mumwezi uwafolo pisiku ilya nayini ilinga ilya kaya akakulu nkani kala likamongoliwa.

³ Po amakambala ghosi agha mwene uwa chisu icha Babiloni ghakinjila nukwikala pa Mulyango uwa Pakasikasi. Ghakaba gho agha: U Neligali Shalezala uwamu Samugala nu Nebo Salasekimu usongo nkani uwa basilikali nu Neligali Shalezala, ikambala ilya pamwanya poka na makambala ghosi aghanji agha mwene uwamu Babiloni.

⁴ Bo u Zedekiya u mwene uwamu Yuda na basilikali bosi babennya bakachimbila, bakepamo mukaya pabusiku ukwendela pa mulyango uwa pakasi pavibumba vibili, papipi nu mughunda uwa mwene, bakachimbilila kwikombe ilya Alaba.

⁵ Loli abasilikali aba mu Babiloni bakamuchimbizya u Zedekiya mumakombe agha Yeliko. Bakamulema nukumusendela kwa Nebukadineza u mwene uwa chisu icha Babiloni pa Libila muchisu icha Hamati kuko akadumula ukuti ali ninongwa.

⁶ U mwene uwa ku Babiloni akabaghogha abana abalumendo aba Zedekiya pa Libila bo u wise akwennya na maso ghache. Akabaghogha sona amakambala ghosi agha mu Yuda.

⁷ Pisinda pache akakolompola amaso agha Zedekiya nukumupinya ni mpingu izya mukuba nukubuka nawe ku Babiloni.

⁸ Abantu aba Babiloni bakayocha inyumba iya bumwene ni nyumba izya bantu nukulimongolannya ilinga ilya Yelusalemu.

⁹ U Nebuzaladani umulongozi uwa balindilili akabasendela kubuzya ku Babiloni abantu babo bakasyalikila mukaya akakulu nkani, poka na bantu babo bakachimbilila kukwache, sona na bantu abanji.

¹⁰ Loli u Nebuzaladani usongo uwa balindilili, akabaleka kwisinda bamo babo bakaba bapina nkani sona na bantu babo batakaba na kantu nakamokamo muchisu icha Yuda, sona akabapa amaghunda agha mampesya ni mighunda iyinji.

Ukusatuliwa ukwa Yelemiya

¹¹ U Nebukadineza u mwene uwa ku Babiloni akamulamula u Nebuzaladani umulongozi uwa balindilili nizya Yelemiya akati,

¹² “Buka pakumulonda u Yelemiya sona umusunge akiza, utakamubombele nachimochimo ichakumuvulazya loli umubombele chosi chicho akulonda.”

¹³ Po u Nebuzaladani umulongozi uwa balindilili akanyamuka poka nu Nebushazibani umulongozi usongo nkani nu Neligali Shalezala ikambala ilya pamwanya nkani sona na balongozi bosi abamwene aba ku Babiloni,

¹⁴ bakabatuma abantu pakumusenda u Yelemiya munyumba iyakusungilamo abakayidi nukumubika kwa Gedaliya umwana uwa Ahikamu, umwana uwa Shafani ukuti amusatule nukumutuma kukwabo. Po u Yelemiya akikala pakasi pabantu abache na bache.

Ukupona ukwa Ebedimeleki

¹⁵ U Mwene akanena nu Yelemiya bo ali mujele mulubinjilo ulwa mulindilili akati,

¹⁶ “Buka umubuzye u Ebedimeleki umu Etiyopiya ukuti, umu momumo u Mwene Uwamaka Ghosi, u Chala uwa Izilayeli akunenela akuti, ‘Indi papipi pakughakwanilisya amazyu ghane aghakukasusya akaya akakulu nkani aka ukwendela muchintu ichibibi, te bukabi awe. Pakabalilo kalakala ghakwiza pakukwanilisiwa pamaso ghako.

¹⁷ Loli nkwiza pakukupoka pisiku lilalila, utakwiza pakubikiwa ku babo ukabanyila.

¹⁸ Nkwiza pakukupoka, utakwiza pakufwila kubwite awe, loli ukwiza pakubupoka ubumi bwako pachifukwa ichakuti unsubiye.’ Ane ne Mwene nanena.”