Yelemiya 38 - IBAYIBOLO 2024

U Yelemiya akusumbiwa muchiziba

¹ U Shefatiya umwana uwa Matani nu Gedaliya umwana uwa Pashuli nu Yukala umwana uwa Shelemiya sona nu Pashulu umwana uwa Malikiya, bakivwa zizyo u Yelemiya akababuzyanga abantu bosi bo akuti,

² “Umu momumo u Mwene akunenela: Wesi yuyo akwikala mukaya akakulu nkani aka akwiza pakughoghiwa nu bwite, nizala pamo ichiwaya, loli wesi yuyo akufumamo nukubuka kuba Babiloni akwiza pakuba mumi.

³ U Mwene akuti: Akaya akakulu nkani aka kakwiza pakubikiwa munyobe izya basilikali aba abamwene uwa ku Babiloni, yuyo akwiza pakukafyula akaya akakulu nkani aka.”

⁴ Po amakambala ghakamubuzya u mwene ghakati, “Umuntu yunuyu aghoghiwanje. Muntu yumo yuyo akubamala amaka abasilikali ababwite babo balekiwe mukaya akakulu nkani aka poka na bantu bosi, pa vintu vivyo akubabuzya. Umuntu yunuyu atakubalondela abantu ubwiza loli ko kubavulazya.”

⁵ U mwene u Zedekiya akabamula akati, “Ali munyobe zyinyu, U mwene atangabombapo nachimochimo ichakubasusya.”

⁶ Po bakamusenda u Yelemiya nukumubika muchiziba icha Malakiya, umwana uwa mwene, mulubinjilo ulwa balindilili. Bakamwisizya u Yelemiya muchiziba pakubombezya inkusa, amizi ghatakabamo, loli gho matope ghene. U Yelemiya akadwibiziwa mumatope.

⁷ Loli u Ebedimeleki, umu Etiyopiya, ikambala munyumba iya bumwene, akivwa ukuti bamusumbila u Yelemiya muchiziba. Pakabalilo kalakala u mwene akaba Mulyango uwa Benjamini,

⁸ u Ebedimeleki akafumamo munyumba iya bumwene nukumubuzya ukuti,

⁹ “Wee mwene wane, abantu aba bamubombela umulaghuzi u Yelemiya ichintu ichibibi nkani. Bamusumbila muchiziba, polelo pakuti ichibama chimalite mukaya akakulu nkani aka, lumo angafwila mulamula.”

¹⁰ Po u mwene akamulamula u Ebedimeleki umu Etiyopiya yula akati, “Ubasende abanavuli 30, ubuke nabo nukumwefyamo umulaghuzi u Yelemiya muchiziba mula bo achili pakufwa.”

¹¹ Po u Ebedimeleki akabasenda abantu bala nukubuka nabo kunyumba iya bumwene. Akasenda amenda amanyankanyanka aghakale muchipinda icha vyakuvwala. Akaghasumba amenda amanyankanyanka ghala poka ninkusa kwa Yelemiya muchiziba mula.

¹² U Ebedimeleki umu Etiyopiya yula akamubuzya u Yelemiya akati, “Amenda amanyankanyanka agho ughabike munkwapa zyako poka ninkusa umwakuti inkusa zitakakuvulazye.” U Yelemiya akabomba zizyo akalamuliwa.

¹³ Po bakamwefyamo muchiziba mula ninkusa zila. U Yelemiya akasungiwa mulubinjilo ulwa balindilili.

U Zedekiya akumulalusya sona u Yelemiya

¹⁴ Po u mwene u Zedekiya akamwitizya umulaghuzi u Yelemiya nukumupokela pamulyango uwabutatu uwa ku Nyumba iya Mwene. Akanena kwa Yelemiya akati, “Nkwiza pakukulalusya zimo. Utakanfisepo nachimochimo.”

¹⁵ U Yelemiya akamubuzya u Zedekiya akati, “Nanti ningakubuzya ubwanaloli, nkimba utakwiza pakungogha? Napapo ningakubuzya utanganteghelezya.”

¹⁶ Loli u mwene u Zedekiya akalapa ichilapo kubusyefu akati, “Naloliloli nkulapa pantazi apa Mwene umumi yuyo akatupela nukutupa ubumi nkuti: Ntakwiza pakukughogha pamo pakukubika munyobe izya bantu babo bakubulondelezya ubumi bwako.”

¹⁷ Po u Yelemiya akamubuzya u Zedekiya akati, “U Mwene Uwamaka Ghosi, u Chala uwa ba Izilayeli akuti: Nanti ukwiyipa kumakambala agha mwene uwa ku Babiloni, ukwiza pakuba mumi sona akaya akakulu nkani aka katakwiza pakochiwa numoto. Awe poka naba munyumba yako mukwiza pakuba bumi.

¹⁸ Loli nanti utakwiyipa kumakambala agha mwene uwa ku Babiloni, akaya akakulu nkani aka kakwiza pakubikiwa munyobe izya bantu aba ku Babiloni sona bakwiza pakukocha numoto, awe wemwene utakwiza pakupona munyobe zyabo.”

¹⁹ U mwene u Zedekiya akamubuzya u Yelemiya akati, “Nkubanyila aba Yuda babo bakabuka kale ku bantu aba ku Babiloni, pakuti lumo aba ku Babiloni bangambika munyobe zyabo nukunjinvya.”

²⁰ U Yelemiya akamwamula akati, “Batakwiza pakukubika munyobe zyabo. Awe umwivwilaye bulo u Mwene pakubomba zyosi zizyo nkukubuzya. Po vyosi vikwiza pakukwendela akiza, sona ukwiza pakubupoka ubumi bwako.

²¹ Loli nanti utakwiyipa kukwabo, izi zyo zizyo u Mwene anvumbulila:

²² Abakolo bosi babo bakasyalikila munyumba iya bumwene ubwa mwene uwa ba Yuda bakwiza pakubikiwa ku makambala agha mwene uwa ku Babiloni. Abakolo balabala bakwiza pakwimba ukuti, ‘Abamanyani bako babo ukabasubila bakakuzimbula nukukupota bo ukulwa nabo. Ivinama vyako vyabadila mumatope, abamanyani bako bakuchimbiye.’

²³ “Abachi binyu bosi sona na bana binyu bosi bakwiza pakubikiwa munyobe izya bantu aba ku Babiloni. Sona nawe bulo utakwiza pakupotwa pakuwa munyobe zyabo loli ukwiza pakulemiwa nu mwene uwa ku Babiloni, sona akaya akakulu nkani aka kakwiza pakochiwa.”

²⁴ Po u Zedekiya akamubuzya u Yelemiya akati, “Utakamubuzyanje nayumoyumo amazyu ghanagha pachifukwa ichakuti nanti wamubuzya yumo tukwiza pakukughogha.

²⁵ Nanti amakambala ghangivwa ukuti nanenezannyanga nawe, po ghakwiza kukwako nukuti, ‘Utubuzye zizyo ukanena kwa mwene sona nazizyo u mwene akanena nawe, utakatufisepo nachimochimo sona tutakwiza pakukughogha,’

²⁶ po ubamule ukuti, ‘Nkamulaba u mwene ukuti atakantume sona kunyumba iya Yonatani ukuti infwile kulakula.’ ”

²⁷ Amakambala ghosi ghala ghakiza kwa Yelemiya nukumulalusya. Akaghabuzya zyosi zizyo u mwene akamubuzya. Po batakanena sona nawe pakuti atalipo nayumoyumo yuyo akamwivwa bo akunenezannya nu mwene.

²⁸ U Yelemiya akasyalikila mu mulubinjilo ulwa mulindilili mupaka mwisiku lilyo u Yelusalemu akafyuliwanga.