Yelemiya 37 - IBAYIBOLO 2024

U Zedekiya akumulaba u Yelemiya pakwiputa

¹ U Zedekiya umwana uwa Yosiya akabikiwa pabumwene ubwa chisu icha Yuda nu Nebukadineza u mwene uwa chisu icha Babiloni. Akinjila mubuzilo ubwa Yehoyakini umwana uwa Yehoyakimu.

² Loli u Zedekiya yula na makambala ghache poka na bantu bosi aba muchisu icha Yuda bakavisulannya vyosi vivyo u Mwene akababuzya ukwendela mu mulaghuzi u Yelemiya.

³ U mwene u Zedekiya, akamutuma u Yehukala u mwana uwa Shelemiya poka nu muputi u Zefaniya umwana uwa Maseya kwa Yelemiya umulaghuzi na mazyu aghakuti, “Twapela, mutwiputile kwa Mwene u Chala witu.”

⁴ Pakabalilo kalakala u Yelemiya akendakendagha mukasi mubantu pachifukwa ichakuti akaba achili pakubikiwa mujele.

⁵ Pisinda pache abasilikali aba Falabo bakepamo mu Ijiputi, po bo abantu aba mu Babiloni babo bakakazyungulila akaya aka Yelusalemu bivwa zinizi bakepamo mu Yelusalemu.

⁶ Po u Mwene u Chala uwa ba Izilayeli akamubuzya u Yelemiya akati,

⁷ “Umubuzye u mwene uwa ba Yuda: U Chala uwa ba Izilayeli yuyo akakutuma ukuti wize ulabe amahala kukwane ukuti, ‘Abasilikali aba Falabo babo bakiza pakukwavwa, bakwiza pakunyokela kuchisu ichabo ni chabo icha Ijiputi.

⁸ Po abantu aba ku Babiloni bakwiza pakunyokela pakulwa ubwite nakaya akakulu nkani aka, bakwiza pakukafyula nukukocha numoto.’

⁹ “Umu momumo u Mwene akunenela: Mutakizimbulaye mwebene pakwinong'ona ukuti abantu aba ku Babiloni bakwiza pakwepa nukutuleka. Batakwiza pakwepamo awe!

¹⁰ Napapo mungabapota abasilikali bosi aba ku Babiloni babo bakulwa namwe, sona napapo bangasyalapo muvisakasa vyabo abavulale, pope bulo bangiza nukukocha numoto akaya akakulu nkani kanaka.”

U Yelemiya ali mujele

¹¹ Bo abasilikali aba ku Babiloni bepamo mu Yelusalemu pachifukwa icha abasilikali aba Falabo,

¹² u Yelemiya akanda pakwepamo mukaya akakulu nkani aka Yelusalemu nukubuka kuchigaba icha Benjamini umwakuti apokele ichigaba chache icha mpyana mukasi mu bantu abaluko lwache.

¹³ Loli bo afika pa Mulyango uwa Benjamini, umulindilili usongo uwa pamulyango, yuyo itabwa lyache akaba we Iliya umwana uwa Shelemiya, umwana uwa Hananiya akamulema umulaghuzi u Yelemiya nukunena ukuti, “Ukuchimbilila ku bantu aba ku Babiloni!”

¹⁴ U Yelemiya akati, “Ukutamanta! Intakuchimbilila ku bantu aba ku Babiloni.” Loli u Iliya atakamuteghelezya, mubuzilo bwache akamulema u Yelemiya nukumubika munyobe izya makambala.

¹⁵ Amakambala ghakamukalalila u Yelemiya, bakamukoma nukumwighalila munyumba iya musimbi u Yonatani, yiyo bakayipela pakuba jele.

¹⁶ U Yelemiya akighaliliwa mujele iya chisi mumo akikala akabalilo akatali nkani.

¹⁷ Po u mwene u Zedekiya akamwitizya u Yelemiya nukumupokela munyumba yache iya bumwene mumo akamulalusya bo bali bene bulo akati, “Nkimba ghalipo ghamo amazyu ghagho u Mwene akubuzizye?” U Yelemiya akamula akati, “Ghalipo, ukwiza pakubikiwa munyobe izya mwene uwa ku Babiloni.”

¹⁸ Po u Yelemiya akamulalusya u mwene u Zedekiya akati, “Nkimba nongwa yoni yiyo indi nayo kukwako pamo ku makambala ghako pamo ku bantu aba ukuti imbikiwe mujele?

¹⁹ Nkimba bali kwiyi abalaghuzi bako babo bakakulaghulilagha ukuti, ‘U mwene uwa ku Babiloni atakwiza pakulwana nawe pamo ni chisu ichi’?

²⁰ We mwene wane, loli ilelo, teghelezya bo nkukulaba. Utakanyosezyanje kunyumba iya musimbi u Yonatani umwakuti intakafwile mulamula.”

²¹ Po u mwene u Zedekiya akalamula ukuti u Yelemiya asungiwe muchipinda icha balindilili nukupeghiwa ichibama icha baghulizi aba mumisebo isiku ni siku mupaka ivibama vyosi vimale mukaya akakulu nkani. U Yelemiya akasungiwa mulubinjilo muchipinda icha mulindilili.