Yelemiya 36 - IBAYIBOLO 2024

U Baluki akubelenga ibuku mu Nyumba iya Chala

¹ Mumwaka uwafolo uwa Yehoyakimu umwana uwa Yosiya u mwene uwamu Yuda, u Mwene akamubuzya u Yelemiya akati,

² “Senda ibuku nukusimbamo amazyu ghosi ghagho nakubuzya nizya Izilayeli nu Yuda sona ninko zyosi izinji ukwandila pakabalilo kako nkandila pakunena nawe mubulaghili ubwa Yosiya mupaka ilelo.

³ Pamo bo aba Yuda bivwa nizya ntamyo zizyo nkwinong'ona pakubawisizya umwakuti umuntu wesi anyokeko ku zila zyache imbibi, po ane nkwiza pakubahobokela ku bubibi bwabo bosi sona na kumbibi zyabo.”

⁴ Po Yelemiya akamwitizya u Baluki umwana uwa Neliya. Bo u Yelemiya akumubuzya amazyu ghosi ghagho akabuziwa nu Mwene, u Baluki akaghasimba mwibuku.

⁵ Po u Yelemiya akamubuzya u Baluki akati, “Ane nkaniziwe pakwinjila mu Nyumba iya Mwene.

⁶ Buka ku Nyumba iya Mwene pisiku ilyakutuzya pakulya ughabelenge ku bantu amazyu agha Mwene agha mwibuku ghagho ukasimba bo nkukubuzya. Ughabelenge ku bantu bosi aba mu Yuda na babo bakufumila mutwaya twabo utukulu.

⁷ Lumo inyiputo zyabo zingafika pamaso agha Mwene nukuti wesi akwiza pakunyokako kumbombo zyache imbibi, pakuti ubukalale nu bukali ubwa Mwene bwaba bukulu nkani.”

⁸ U Baluki umwana uwa Neliya akabomba zyosi zizyo umulaghuzi u Yelemiya akamubuzya ukuti azibombe. Akaghabelenga amazyu agha Mwene mu Nyumba iya Mwene ghagho ghakasimbiwa mwibuku.

⁹ Mumwezi uwanayini uwa mwaka uwafayivi uwa bulaghili ubwa Yehoyakimu umwana uwa Yosiya u mwene uwa ba Yuda, akabalilo aka kutuzya pakulya pantazi pa Mwene kukafumuziwa ku bantu bosi aba mutwaya utukulu aba mu Yelusalemu sona na ku bantu bosi aba mutwaya utukulu utwa Yuda.

¹⁰ Bo bosi binjila mu Nyumba iya Mwene, muchipinda icha Gemaliya umwana uwa Shafani umusimbi, chicho chikaba palubinjilo ulwa pamwanya pabwinjililo ubwa Mulyango Umupya u Baluki akababelengela abantu bosi amazyu agha Yelemiya ghagho ghakasimbiwa mwibuku bo abantu bosi bakwivwa.

Ibuku likubelengiwa kumakambala

¹¹ Bo u Mikaya umwana uwa Gemaliya, umwana uwa Shafani, ivwa amazyu ghosi agha Mwene agha mwibuku,

¹² akika kuchipinda icha musimbi munyumba iya bumwene, kuko amakambala ghosi ghakikala: Umusimbi Elishama nu Delaya umwana uwa Shemaya nu Elinatani umwana uwa Akiboli nu Gemaliya umwana uwa Shafani nu Zedekiya umwana uwa Hananiya sona na makambala ghosi aghanji.

¹³ Bo u Mikaya ababuzya zyosi zizyo akivwa bo u Baluki akubabelengela abantu ivya mwibuku,

¹⁴ amakambala ghosi ghakamutuma u Yehudi umwana uwa Netaniya, umwana uwa Shelemiya, umwana uwa Kushi, ukuti amubuzye u Baluki ukuti, “Senda ibuku lilyo ukababelengela abantu nukwiza nalyo.” Po u Baluki umwana uwa Neliya akabuka ku bantu bo ibuku lila lili munyobe zyache.

¹⁵ Bakamubuzya bakati, “Ikala pasi nukutubelengela.” Po u Baluki akababelengela.

¹⁶ Bo bivwa amazyu ghosi, bakenannya kumaso bo ubogha bubalemite. Bakamubuzya u Baluki bakati, “Tubaghiye pakumubuzya u mwene amazyu ghosi ghanagha.”

¹⁷ Po bakamulalusya u Baluki bakati, “Utubuzye, nkimba ukasimba bulibuli amazyu ghosi ghanagha? Nkimba we Yelemiya akakubuzya bo ukusimba?”

¹⁸ U Baluki akamula akati, “Momumo, akambuzya amazyu ghosi ghanagha, po nkasimba ni inki mwibuku.”

¹⁹ Po amakambala ghakamubuzya u Baluki ghakati, “Awe nu Yelemiya muvwame. Atakabepo nayumoyumo umuntu uwakumanya kuko muli.”

U mwene akulyocha ibuku

²⁰ Bo balibika ibuku lila muchipinda icha musimbi u Elishama, bakinjila mulubinjilo, bakabuka kwa mwene nukumubuzya amazyu ghosi.

²¹ Po u mwene akamutuma u Yehudi pakulisenda ibuku lila muchipinda icha Elishama umusimbi. U Yehudi akabuka muchipinda chila nukulisenda. Akamubelengela u mwene na makambala ghosi ghagho ghakimilila papipi nu mwene.

²² Ghukaba mwezi uwa nayini ghugho u mwene akikala munyumba mukabalilo aka chisiku bo akota umoto ghugho ghukakagha mu mbabula muntazi mumwache.

²³ Akabalilo kosi bo u Yehudi abelenga ivigaba vitatu pamo folo ivya mwibuku lila, u mwene akavisenda nukuvidumulannya nu mupeni uwa musimbi sona akavisumbila musonta iya moto, mupaka ibuku lyosi lila likapya mumoto.

²⁴ U mwene na babombi bache babo bakivwa amazyu ghanagha, batakaba nubogha nabumobumo, pamo ukuzepulannya amenda ghabo.

²⁵ Napapo u Elinatani nu Delaya sona nu Gemaliya bakayezya nkani pakumudeba u mwene ukuti atakalyoche ibuku lila, loli pope atakabivwila.

²⁶ Mubuzilo bwache, u mwene akamulamula u Yelahameli, umwana uwa mwene, u Selaya umwana uwa Aziliyeli sona nu Shelemiya umwana uwa Abidele ukuti bamuleme u Baluki umusimbi nu Yelemiya umulaghuzi. Loli u Mwene akabavwamika.

U Baluki akusimba ibuku ilinji

²⁷ Bo u mwene alyocha ibuku lila mumo mukaba amazyu ghagho u Baluki akaghasimba bo u Yelemiya akumubuzya, u Mwene akamubuzya u Yelemiya akati,

²⁸ “Senda ibuku ilinji nukusimbamo amazyu ghosi ghagho ghakaba mwibuku ilyakwanda lila, lilyo u Yehoyakimu u mwene uwa ba Yuda akalyocha.

²⁹ Umubuzye sona u Yehoyakimu u mwene uwa ba Yuda ukuti, ‘U Mwene akuti: Awe ukalyocha ibuku lila nukunena ukuti, “Nkimba choni chicho ukasimbamo ukuti naloliloli u mwene uwa Babiloni akwiza nukuchinangannya ichisu ichi sona akwiza pakughoghamo abantu ni vinyamana?”

³⁰ Pakunena nizya Yehoyakimu u mwene uwa ba Yuda u Mwene akuti: Atakwiza pakubapo nayumoyumo uwakupyana pachitengo icha bumwene ubwa Devedi, umuvimba wache ghukwiza pakusumbiwa nukulekiwa pizuba pamusanya sona pabusiku ghukwiza pakulekiwa mubukatazu.

³¹ Nkwiza pakumufunda poka nabaluko lwache sona na makambala ghache pachifukwa icha bubibi bwabo. Nkwiza pakubizila nintamyo abantu babo bakwikala mu Yelusalemu na mu Yuda pachifukwa ichakusita kwivwila.’ ”

³² Po u Yelemiya akasenda ibuku ilinji nukumupa umusimbi u Baluki umwana uwa Neliya yuyo akasimbaghamo bo u Yelemiya akumubuzya amazyu ghosi ghagho u Yehoyakimu u mwene uwa ba Yuda akaghocha mumoto. Sona amazyu aminji aghakuyanayana bulo ghakonjeleziwapo.