Yelemiya 32 - IBAYIBOLO 2024

U Yelemiya akughula umughunda

¹ U Mwene akanena nu Yelemiya mumwaka uwa 10 uwa bulaghili ubwa Zedekiya u mwene uwamu Yuda, ghugho ghukaba mwaka uwa 18 uwa bumwene ubwa Nebukadineza.

² Pa kabalilo kalakala abasilikali aba mu Babiloni bakakazyungulila akaya akakulu nkani aka Yelusalemu, po umulaghuzi u Yelemiya akighaliliwa muchipinda icha balindilili munyumba iya bumwene muchisu icha Yuda.

³ U Zedekiya u mwene uwamu Yuda akamwighalila u Yelemiya mulamula nukumulalusya ukuti, “Nkimba choni chicho ukulaghula ukuti, ‘Umu momumo u Mwene akunenela akuti: Indi papipi pakukalemeka akaya akakulu nkani aka munyobe izya mwene uwamu Babiloni, sona akwiza pakukafyula?

⁴ U Zedekiya u mwene uwamu Yuda atakwiza pakupona munyobe izya bantu aba mu Babiloni, loli bakwiza pakubikiwa munyobe izya mwene uwa Babiloni. Akwiza pakunenezannya nukwenannya nawe pamaso na pamaso.

⁵ Akwiza pakumusenda u Zedekiya nukubuka nawe ku Babiloni kuko akwiza pakwikala mupaka amubombele zimo. Nanti mukulwa na bantu aba mu Babiloni, mutakwiza pakubapota.’ ”

⁶ U Yelemiya akati, “Amazyu agha Mwene ghakanyizila nukunena ukuti:

⁷ U Hanameli umwana uwa Shalumu uwise umunandi, akwiza kukwako nukunena nawe ukuti, ‘Ghula umughunda wane uwa ku Anatoti pachifukwa ichakuti we mukamu wane uli nulusako ulwa kughutabula nukughughula.’

⁸ “Po ngati mumo u Mwene akanenela, Hanameli umuvyala wane akanyizila muchipinda icha balindilili nukunena nane ukuti, ‘Ghula umughunda wane uwa ku Anatoti muchigaba icha Benjamini pachifukwa ichakuti ubaghiye pakughutabula ukuti ghubanje wa bamunyumba yako.’ “Nkamanya ukuti amazyu ghanagha ghakaba gha Mwene.

⁹ Po nkaghula umughunda ku Anatoti ku muvyala wane u Hanameli nukughupima pa chipimilo, ubung'wamu bwache bukaba amashekeli agha siliva 17.

¹⁰ Nkasimba nukwighalila ukalata uwa lufingo lula pamaso pa bakaboni nukumupima u siliva yula pa chipimilo.

¹¹ Po nkasenda abakalata bane aba, mumo mukaba indaghilo, ukalata yuyo akighaliliwa nu kalata yuyo atakighaliliwa,

¹² nukumupa u Baluki umwana uwa Neliya, umwana uwa Mahiseya pamaso pa muvyala wane u Hanameli napa bakaboni babo bakitikizya ulufingo lula na pamaso pa ba Yuda babo bakikalagha mulubinjilo ulwa balindilili.

¹³ “Nkamubuzya u Baluki pamaso pabantu bosi amazyu aghakuti,

¹⁴ ‘U Mwene Uwamaka Ghosi, u Chala uwa Izilayeli, akuti: Senda abakalata bosi aba lufingo, bosi babo batighaliliwe na babo bighaliliwe aba kughulila sona ubabike musonta umwakuti bikale akabalilo akatali.

¹⁵ Pakuti umu momumo u Mwene Uwamaka Ghosi, u Chala uwa Izilayeli akunenela akuti: Inyumba na maghunda sona na mampesya vikwiza pakughuliwa muchisu ichi.’ ”

Ulwiputo ulwa Yelemiya

¹⁶ Bo nabika ukalata uwakughulila kwa Baluki umwana uwa Neliya, nkiputa kwa Mwene nkati,

¹⁷ “Wee Mwene Uwamaka Ghosi, umupeli uwakumwanya ni chisu ichapasi na maka ghako amakulu sona ninyobe yako iyamaka. Chitalipo nachimo ichipalapala ku kwako.

¹⁸ Ubalanjizye ulughano abantu amasabuzani loli ubafunde abantu pachifukwa icha mbibi izya bapapi babo. Wee Chala umukulu sona uwamaka ghosi, itabwa lyako we Mwene Uwamaka Ghosi,

¹⁹ imbatiko zyako mpalapala nkani sona imbombo zyako zyamaka nkani. Amaso ghako ghakwenelezya. Amaso ghako ghakuzyennya namumo inkalo izya bantu zibeleye. Ukumupa umuntu wesi umuvwalo ukuyana ni nkalo yache ni mbombo zyache.

²⁰ Ukabomba ivyika ni viswigho mu Ijiputi sona uchili ukuvilanjizya nukuvibomba mupaka nilelo, kuba Izilayeli na pakasi pa inko izinji umwakuti ilelo bakumenye kosi na kosi.

²¹ Ukabefyamo aba Izilayeli mu Ijiputi bo ukulanjizya ivyika ni viswigho namaka amakulu nkani sona nivintu ivyakuboghofya abantu.

²² Ukabapa ichisu ichi chicho ukalayizya abanyenya babo, ichisu icha mboto nkani.

²³ Bakinjila nukuchifyula ichisu chila loli batakakwivwila pamo ukukonka indaghilo zyako, batakabomba zizyo ukabalamula ukuti babombaye. Po ukabawisizya intamyo zyosi zinizi.

²⁴ “Ennya namumo abalwani bazengeye amakwelelo umwakuti bakafyule akaya akakulu nkani aka Yelusalemu. Pachifukwa icha bwite, nizala ni chiwaya akaya kanaka kakwiza pakubikiwa munyobe izya bantu aba mu Babiloni. Zizyo mukanena zyabombiwa ngati mumo mukwenezya.

²⁵ Napapo akaya akakulu nkani kangabikiwa ku bantu aba ku Babiloni pope bulo, wee Mwene Uwamaka Ghosi, wambuzya wati, ‘Ghula umughunda ni ndalama pamaso pa bakaboni babili.’ ”

²⁶ Po u Mwene akamubuzya u Yelemiya akati,

²⁷ “Ane ne Mwene u Chala uwa bantu bosi. Nkimba chilipo chimo chicho chipalapala kukwane?

²⁸ Polelo u Mwene akuti: Indi papipi pakukabika akaya akakulu nkani aka munyobe izya Nebukadineza u mwene uwa chisu icha Babiloni yuyo akwiza pakukafyula.

²⁹ Abantu aba ku Babiloni babo bakulwa nakaya akakulu nkani aka bakwiza pakukocha numoto poka ni nyumba zyosi kuko abantu bakankalalizya bo bakumochela u Baala utwakununkila pamwanya pachisonje sona nukupungulila ichakwiyipa icha vinyo ku bachala abanji.

³⁰ “Pakuti ukwandila po pa bwana bwabo, aba Izilayeli naba Yuda batabombitepo nazimozimo inyiza loli bo bubibi bwene pamaso papane, imbombo yabo yakunkalalizya ni mbombo zyabo imbibi.

³¹ Abantu aba mukaya akakulu nkani ukwandila pakabalilo kako kakazengiwanga mupaka ilelo bankalalizizye nkani umwakuti nkwiza pakukefyapo pamaso ghane.

³² Abantu aba mu Izilayeli naba mu Yuda bankalalizizye nkani ni mbibi zyabo zizyo babombite poka na bamwene babo, na makambala ghabo na baputi babo sona na balaghuzi babo, abantu aba mu Yuda naba mu Yelusalemu.

³³ Bampa inkonto mubuzilo ubwakumpa ivyeni vyabo, napapo nkatamiwa nkani pakubamanyisya loli pope bakakana amafundwe.

³⁴ Bakabika ivifwani munyumba yane iyakwiputilamo nukuyinyazya.

³⁵ Bakamuzengela u Baala ubuzilo ubwapamwanya mwi Kombe ilya Beni Hinomu ukuti babikayepo abana babo abalumendo na balindu pakuba chakwiyipa kwa Moleki, napapo intakabalamulapo sona intakinong'onelapo ukuti bangabomba inyazu ngati zinizi nukubapela aba Yuda ukuti babombe imbibi.”

Ilayizyo ilya lusubilo

³⁶ U Mwene akambuzya akati, “Mukunena nizya kaya akakulu nkani aka mukuti, ‘Akaya aka kakwiza pakubikiwa munyobe izya mwene uwamu Babiloni pachifukwa icha bwite nizala sona ni chiwaya,’ loli u Mwene u Chala uwa Izilayeli akuti:

³⁷ Nkwiza pakubabungannya ukufumila mutwaya tosi tuto nkabachimbizizyamo bo nkalaye nkani. Nkwiza pakubanyosezya ku buzilo bunubu sona nkwiza pakubapela pakwikalagha kunuku umwakufwasa.

³⁸ Bakwiza pakuba bantu bane, sona Nkwiza pakuba ne Chala wabo.

³⁹ Nkwiza pakubapa u moyo ghoka nizila yoka umwakuti bakwiza pakunyilagha nukunchindika akabalilo kosi pachifukwa ichabwiza bwabo nu bwiza ubwa bana babo sona nababo bakwizila mwisinda mumwabo.

⁴⁰ Nkwiza pakufingana nabo ulufingo ulwa bwila na bwila, ntakwiza pakuleka pakubabombela inyiza. Nkwiza pakubapa u moyo uwakunnyila umwakuti batakansambukile sona.

⁴¹ Nkwiza pakuhoboka nkani pakubabombela inyiza sona nkwiza pakubabyala muchisu chinichi nu moyo wane ghosi sona nu muzimu wane ghosi.

⁴² Ngati mumo nkabatumila abantu aba ntamyo, momumo nkwiza pakubapela umutende ghugho nkafingana nabo.

⁴³ Abantu bakwiza pakughula amaghunda muchisu chinichi chicho amwe mukuti, ‘Chisami mumo mutalimo abantu ni vinyamana, pachifukwa ichakuti chikapeghiwa kuba Babiloni.’

⁴⁴ Abantu bakwiza pakughula amaghunda ni ndalama. Abakalata aba lufingo bakwiza pakusimbiwa nukwighaliliwa pamaso pa bakaboni, muchigaba icha Benjamini, mutwaya tuto tuzyunguliliwe nakaya akakulu nkani aka Yelusalemu, mutwaya utukulu utwa mu Yuda nutwaya utukulu utwa mutughamba nutughamba utwa kubufumilo bwizuba utwa Negebu, pakuti nkwiza pakubanyosekezya ubukabi bwabo. Ane ne Mwene nanena.”