Yelemiya 31 - IBAYIBOLO 2024

Abazya babwela kukwabo

¹ U Mwene akuti, “Amasiku ghakwiza ghagho nkwiza pakuba ne Chala uwa luko losi ulwa Izilayeli, sona bakwiza pakuba bantu bane.”

² U Mwene akuti, “Nkwiza pakubapelela ichisa abantu babo bakapona kubwite munkolongo, bo aba Izilayeli bakulonda ubutuzyo.”

³ U Mwene akatubonekela bo tuli kubutali nukunena ukuti, “Imbaghanite nkani mwe ba Izilayeli nu lughano ulusita kumala, naba ne musubiliwa ku kwinyu mupaka nilelo.

⁴ Nkwiza pakukuzenga sona, wee Izilayeli, umughaniwa wane, ukwiza pakuzengiwa sona. Po mukwiza pakusenda ivisekeseke, nukubuka pakujina umwabuhobosu.

⁵ Mukwiza pakubyala sona amampesya mumaghamba agha Samaliya, sona abalimi bakwiza pakubyala nukwilagha nkani ivikomwa vyache.

⁶ Akabalilo kakwiza pakufikila, kako abalindilili aba pamaghamba agha Efulayimu bakwiza pakukolomoka ukuti, ‘Tubukaye ku Ziyoni, kwa Mwene u Chala witu.’ ”

⁷ U Mwene akuti, “Mumwimbilaye u Yakobo umwabuhobosu, mukolomokaye pachifukwa icha luko lulo luchilite inko zyosi. Mumwimbilaye bo mukumupala mukuti, ‘Wee Mwene, bapoke abantu bako, aba Izilayeli abakusyalako.’

⁸ Nkwiza pakubefyako kuchisu icha kumitu nukubabungannya ukufumila kubumalilo ubwa chisu. Pakasi papabo pakwiza pakubapo abafwamaso na balemazu, abakolo babo bakaba ni nyanda na bakolo babo bakaba papipi pakusayiwa. Ichilundilo icha bantu chikwiza pakunyokako.

⁹ Bakwiza pakunyokela kukwabo bo bakulila, bakwiza pakwiputagha bo bakunyokela. Nkwiza pakubalongolezezya kutusoko utwa mizi. Batakwiza pakwipunulamo mumusebo umutenganu, pachifukwa ichakuti ne wise uwa ba Izilayeli, sona u Efulayimu we katote wane.”

¹⁰ U Mwene akuti, “Mwee inko, nteghelezya. Lumbilila amazyu ku bantu muvyisu ivya mulubazu ulwa nyanja, munenaye mutinji, ‘Yuyo akabanyampannya aba Izilayeli akwiza pakubabungannya, sona akwiza pakughusungilila umudimo ngati mumo umudimi akusungilila ing'ozi zyache.’

¹¹ Pakuti u Mwene akwiza pakumupoka u Yakobo, sona akwiza pakubatabula munyobe izya bantu babo bali namaka ukubachila.

¹² Bakwiza pakwimba umwalusekelo pighamba ilya Ziyoni, bakwiza pakukolomoka nu buhobosu pachifukwa icha bwiza ubwa Mwene, pavyakulya vivyo akubapa, ingano nu vinyo sona na mafuta, utwana utwa ng'ozi nutwa ng'ombe, bakwiza pakuba navyo vyosi vivyo bakuvilonda.

¹³ Po abalindu bakwiza pakujina nukusekela, bope abasongo na balumendo banaba. Nkwiza pakukupela ukulila kwabo kula pakuba lusekelo, nkwiza pakubasangalusya nukubahobosya mubuzilo ubwa chitima.

¹⁴ Nkwiza pakubikutizya abaputi ni vyakulya ivyinji, sona abantu bakwiza pakubizuzya na vyosi vivyo bakuvilonda. Ane ne Mwene nanena.”

U Mwene ali ni chisa pabantu bache

¹⁵ U Mwene akuti, “Izyu likwivwika mu Lama, ukulila nukufwifwitila ukukulu. U Lakelo akubalila abana bache, sona akukana pakusangalusiwa, pachifukwa ichakuti abana bache bate ku bumi sona.”

¹⁶ U Mwene akuti, “Leka pakulila, sona utakasyumulaye amasozi, imbombo yako yili nu muvwalo, pakuti bakwiza pakubwelako kuchisu icha balwani.”

¹⁷ U Mwene akuti, “Subila bulo vivyo vili kuntazi, abana bako bakwiza pakubwelako sona ku kaya kabo.

¹⁸ “Nivwa aba Efulayimu bakulila bakuti, ‘Naloli watufunda ngati ngwata yiyo yitamanyiziwe, sona twamanyilapo ukwivwila. Utunyosye ukuti tunyokele kukwako, pakuti naloli we Mwene u Chala witu.

¹⁹ Pakuti bo twakunangila, tukapinduka. Bo twazyaghannya tukikoma pachifuba. Twakoziwa isoni nukusamuliwa pa zizyo twabomba, pachifukwa icha mbibi zyitu izya ku bulumendo.’

²⁰ Nkimba u Efulayimu te mwana wane umulumendo umughaniwa, nkimba te mwana wane uwa pamoyo? Napapo nkumunena ububibi kabilikabili, loli pope bulo nkumukumbuka. Polelo umoyo wane ghukumusamba, sona nkuba nawe nichililizi ichikulu. Ane ne Mwene nanena.

²¹ “Mubike ivimanyilo mumusebo, mwibikile mwebene ivikwangwani. Muwenelezye nkani umusebo umukulu nkani, umusebo ghugho mukwiza pakwendamo bo mukubuka. Mwee ba Izilayeli nyokela nyokela ku twaya twinyu utukulu tuto mukatuleka.

²² Nkimba mukwiza pakwendakwenda mupaka liyi, mwee bana bane basita busubiliwa? U Mwene akwiza pakupela ichintu ichipya pachisu ichapasi, umukolo weyuyo akumusungilila umwanavuli.”

Intazi iya bantu aba Chala

²³ U Mwene Uwamaka Ghosi, u Chala uwa Izilayeli akuti, “Bo nkubanyosezya sona abantu ubwabuke, abantu aba mu Yuda naba mutwaya twache utukulu bakwiza pakunena sona amazyu aghakuti, ‘U Mwene akusaye wee kaya akagholosu, sona wee lighamba izelu.’

²⁴ Abantu bakwiza pakwikala poka mu Yuda na mutwaya twache utukulu, abalimi na babo bakwendakwenda bulo ni midimo yabo.

²⁵ Nkwiza pakunyosezyamo amaka mubantu babo bate namaka, sona nkwiza pakubapa ichakulya abantu babo bali nizala.”

²⁶ Nkalamusya mutulo nukutalankannya po nkazyaghannya ukuti name mutulo utunonu nkani.

²⁷ U Mwene akuti, “Amasiku ghakwiza ghagho aba Izilayeli naba Yuda poka ni vinyamana bakwiza pakubala nkani.

²⁸ Ngati mumo nkabenelezyanga pakubanyunkulannya nukubazepulannya nukubapota nukubanangannya nukubawisizya intamyo, momumo nkwiza pakubenelezya pakuzenga nukubyala.

²⁹ Mumasiku ghalaghala abantu batakwiza pakunena sona ukuti, ‘Abapapi balya amampesya aghakubaba, loli amino agha bana babo ghawa ubwazi.’

³⁰ “Loli umuntu wesi akwiza pakufwa pachifukwa icha mbibi zyache, sona wesi yuyo akulya amampesya aghakubaba amino ghache ghakwiza pakuwa ubwazi.”

³¹ U Mwene akuti, “Akabalilo kakwiza kako nkwiza pakufingana nabo ulufingo ulupya, aba Izilayeli, sona na baluko ulwa Yuda.

³² Lutakwiza pakuba sona ngati lufingo ulwakale lulo ingafingana na banyenya binyu bo nkubalema pa nyobe nukubefyamo muchisu icha Ijiputi. Pachifukwa ichakuti bakanangannya ulufingo, napapo nkaba ngati ne mulume wabo umusubiliwa.” U Mwene anena.

³³ U Mwene akati, “Ulu lo lufingo lulo nkwiza pakufingana naba Izilayeli mumasiku ghalaghala. Nkwiza pakubika ululaghilo lwane mukasi mumwabo nukulusimba mumoyo ghabo. Nkwiza pakuba ne Chala wabo, sona abene bakwiza pakuba bantu bane.

³⁴ Nayumoyumo umuntu yuyo akwiza pakumumanyisya umupalamani wache, pamo ukumubuzya umukamu wache ukuti, ‘Umumanye u Mwene.’ Pakuti bosi bakwiza pakummanya ane, abana abanandi na bantu abasongo bulo. Nkwiza pakubahobokela imbibi zyabo, sona ntakwiza pakukumbukapo nalumolumo ukunanga kwabo.”

³⁵ U Mwene Uwamaka Ghosi akuti, “Nkulamula izuba ukuti lilamaye pamusanya, nkulamula u mwezi ni ntondwa ukuti vilamaye pabusiku, sona nkuyilamula inyanja, umwakuti amayigha ghapongomokaye.

³⁶ Nanti indaghilo zinizi zikuzimila pamaso ghane, po abaluko ulwa Izilayeli bakwiza pakuzimila, lutakwiza pakuba luko sona pamaso papane mupaka bwila na bwila.”

³⁷ U Mwene akuti, “Nanti angaghiwa umuntu uwakupima kumwanya, nukuchitendela ichisu ichapasi, po ane nkwiza pakubakana abaluko bosi aba mu Izilayeli, pachifukwa icha vyosi vivyo babombite.”

³⁸ U Mwene akuti, “Amasiku ghakwiza ghagho bakwiza pakunzengela sona akaya akakulu ukwandila ku Chitembe icha Hananeli mupaka pa Mulyango uwa Pankuto.

³⁹ Ulukusa ulwakupimila lukwiza pakugholoka ukwandila palapala mupaka kwi ghamba ilya Galebi nukuzyungulila ku Gowa.

⁴⁰ Ikombe lyosi kuko imivimba yikusyiliwa sona kuko itoyi likutaghiwa, sona na maghunda ghosi ukwandila kwi Kombe ilya Kidiloni kubufumilo bwizuba mupaka kunkuto iya Mulyango uwa Falasi, likwiza pakuba lipaghuliwa kwa Mwene. Akaya akakulu nkani katakwiza pakunyunkuliwa pamo pakumongoliwa sona.”