Yelemiya 30 - IBAYIBOLO 2024

Ulufingo ulwa kubanyosezya sona abantu

¹ U Mwene akamubuzya u Yelemiya akati,

² “Ane ne Mwene u Chala uwa Izilayeli nkuti, ‘Simba mwibuku zyosi zizyo nkubuzizye.

³ Akabalilo kakwiza kako nkwiza pakubanyosezya abantu bane aba Izilayeli naba mu Yuda, nukubanyosezya kuchisu chicho nkabapa abanyenya babo ukuti bikalayemo.’ ”

⁴ Agha gho mazyu ghagho u Mwene akaghanena nizya chisu icha Izilayeli nicha Yuda:

⁵ U Mwene akuti, “Nivwa amazyu agha nkuto, amazyu aghakoghofya ghagho te ghamutende, awe.

⁶ Leka imbalalusye ilalusyo: Nkimba umuntu umwanavuli angapapa umwana? Po nkimba choni chicho nkwennya ukuti umwanavuli wesi alemite inyobe zyache palwanda, ngati po mukolo yuyo akusayiwa? Nkimba choni chicho icheni icha muntu wesi chachitima?

⁷ Mwee, isiku ili likulu nkani! Litalipo isiku ilinji lilyo liyanite nalyo. Kakwiza pakuba kabalilo akantamyo kwa Yakobo, loli pope bulo akwiza pakupona.”

⁸ U Mwene Uwamaka Ghosi akuti, “Mwisiku lilalila, nkwiza pakupyolannya ikoli musingo zyabo, nkwiza pakudumulannya iminyololo yabo, sona batakwiza pakuba pasi pabulaghili ubwa bayeni bala.

⁹ Mubuzilo bwache bakwiza pakumubombela u Mwene u Chala wabo, sona nu Devedi u mwene wabo, yuyo nkwiza pakubasalila.

¹⁰ “Wee Yakobo umubombi wane, utakanyilaye, wee Izilayeli, utakabanje nubogha. Naloliloli nkwiza pakukupoka ku vyisu ivyakubutali, na banyenya bako ukufuma kuchisu icha buzya. Abaluko ulwa Yakobo bakwiza pakunyokela muchisu chabo, sona bakwiza pakwikala akiza nkani mumutende nu mwakufwasa, sona atakwiza pakubapo nayumoyumo uwakuboghofya.

¹¹ Indi poka namwe sona nkwiza pakubapoka. Nkwiza pakuzinangannya inko zyosi, kuko nabanyampanizizya, loli amwe ntakwiza pakubananganizizya zila. Nkwiza pakubapa amafundwe nubwanaloli, ntakwiza pakubaleka bulo ukusita pakubafunda.”

¹² U Mwene akuti, “Ichilonda chinyu chitakupola nukupola, ukuvulala kwinyu kutakumala nukumala.

¹³ Atalipo nayumoyumo uwakubapasikizya, ghutalipo nu mulembo naghumoghumo uwakumazya ichilonda chinyu.

¹⁴ Abaghaniwa binyu bosi babaluvizye, bate ni mbombo namwe. Nukubavulazya ngati mumo abalwani binyu bosi bababombela, ulufundo lwinyu lukulu pakuti imbibi zyinyu nyinji, sona bope ububibi bwinyu bukulu nkani.

¹⁵ Nkimba choni chicho mukulila pachifukwa icha kuvulala kwinyu, ububavu bubo butakupola nako kupola? Pakuti ububibi bwinyu bukulu nkani, sona imbibi zyinyu nyinji nkani, cho chifukwa nababombela zinizi.

¹⁶ “Loli nkwiza pakubanangannya bosi babo bakubanangannya, abalwani binyu bosi bakwiza pakusendiwa pakuba bazya. Bosi babo bakubafyula ivintu vyinyu, bope ivintu vyabo vikwiza pakufyuliwa. Bosi babo bakubayivya bakwiza pakuyinviwa

¹⁷ Loli nkwiza pakubapozya ku bubine bwinyu, sona nkwiza pakumazya ivilonda vyinyu pachifukwa ichakuti mukwitiziwa ukuti mwe bantu abakuzi, sona atalipo nayumo uwakumupasikizya u Ziyoni.”

¹⁸ U Mwene akuti, “Nkwiza pakubanyosekezya abamunyumba iya Yakobo kuchisu chabo, sona nukuba nichililizi pabuzilo bwache ubwakwikalapo, akaya akakulu nkani aka Yelusalemu kakwiza pakuzengiwa sona pa chisami, sona inyumba iya bumwene yikwiza pakuzengiwa pabuzilo bwache.

¹⁹ Abantu babo bakwikala mulamula bakwiza pakwimba inyimbo izyakupalizikizya, bakwiza pakukolomoka nulusekelo. Nkwiza pakubabalizya, sona batakwiza pakuba banandi awe. Nkwiza pakubachindika sona abantu batakwiza pakubasamula.

²⁰ Abana babo bakwiza pakuba ngati mumo bakabela kale, sona ichilundilo chabo chikwiza pakwikalana pamaso papane. Nkwiza pakabafunda babo bakubayivya.

²¹ Bakwiza pakuba nu mulongozi uwabo nu wabo, umulaghili wabo akwiza pakufuma mukasi mumwabo. Nkwiza pakumwitikizya ukuti ize papipi nane. Nkimba wewenu yuyo angaba mujivu ukuti apalamile kukwane?

²² Polelo amwe mukwiza pakuba mwe bantu bane sona nane nkwiza pakuba ne Chala winyu.”

²³ Ennya, impepo iya maka iya Mwene! Impepo iya kankungu, yikukuka pamitu iya bantu ababibi.

²⁴ Ubukali ubwa Mwene butakwiza pakutozokapo, mupaka amalizye zyosi zizyo akwinong'ona. Mukwiza pakuchivwisya ichi mumasiku agha muntazi.