Yelemiya 3 - IBAYIBOLO 2024

Aba Izilayeli abasita kusubiliwa

¹ “Nanti u mwanavuli akumusosya umuchi wache, sona u mukolo yula akwepako kukwache, nukusendana nu mwanavuli uyunji, nkimba u mwanavuli yula anganyokela nukumusenda sona u mukolo yula pakuba muchi wache? Nkimba ichisu chila chitanganyaziwa? Loli wabomba ubwamalaya na baghaniwa abinji nkani, nkimba unganyokela kukwane? Ane ne Mwene nanena.

² Ennya pamwanya pamaghamba. Nkimba buzilo boni bubo utabombeyepo ubwamalaya? Ukabalindilila abaghaniwa bako mulubazu muzila, ukikala mulubazu ulwa musebo ngati mu Alabu yuyo avwamiliye. Wachinyazya ichisu nu bwamalaya sona nu bubibi bwako.

³ Pachifukwa chinichi ivula iya chisiku yakaniziwa, sona yope ivula iya lupepo yitatimite, loli pope bulo ukuboneka ngati we malaya, sona ute ni soni nazimozimo pazizyo wabomba.

⁴ Nkimba ute wewe wanyitizya lunulu bulo ukuti, ‘Tata wane, mumanyani wane ukwanda po pabulumendo bwane?

⁵ Nkimba ukwiza pa kukalala akabalilo kosi? Nkimba ubukali bwako bukwiza pakwendelela mupaka bwila na bwila?’ Umu momumo ukunenela, loli pope bulo ukubomba ububibi bubo awe umenye pakububomba.”

Ukusita ukusubiliwa ukwa Izilayeli

⁶ Mubulaghili ubwa mwene u Yosiya, u Mwene akambuzya akati, “Nkimba wazyennya zizyo u Izilayeli umusita kusubiliwa yula azibomba? Ankana pakukwela pighamba pamwanya sona na muntende mumakwi mulamula, abomba ubwamalaya.

⁷ Nkinong'ona ukuti nanti azibomba zyosi zinizi akwiza pakunyokele kukwane loli atakachibomba chinichi, sona u muyemba wache umusita kusubiliwa u Yuda akachennya chinichi.

⁸ Nkamupa u Izilayeli umusita kusubiliwa yula ukalata uwasoka. Loli pope bulo umuyemba wache u Yuda umusita kusubiliwa yula atakaba nubogha nabumobumo, wepe bulo akabuka pakulowa.

⁹ Pakuti u Yuda akachennya chintu chipepe pakubomba ubwamalaya, akachinyazya ichisu, akalowa pakughiputa amabwe sona na makwi.

¹⁰ Napapo zikabombiwa zyosi zinizi, u muyemba wache umusita kusubiliwa u Yuda atakanyokela kukwane nu moyo wache ghosi, loli akabomba nu moyo uwabuzimbuli. Ane ne Mwene nanena.”

¹¹ U Mwene akambuzya akati, “Umu Izilayeli umusita kusubiliwa mugholosu nkani ukumuchila u Yuda umusita kusubiliwa.”

¹² U Mwene akati, “Buka ufumusye amazyu amiza kumitu, ‘Nyokela Izilayeli we musita kusubiliwa, icheni chane chitakwiza pakukukalalila, pakuti ane ne wachisa, ntakwiza pakukukalalila bwila na bwila. Ane ne Mwene nanena.

¹³ “ ‘Itika bulo ukunanga kwako, sona nukuti ukamusambukila u Mwene u Chala wako, ukabika ulughano lwako pa bachala abayeni pakwiputa mwikwi lyosi ilya kuvwinka, sona utakughivwila amalamulo ghane. Ane ne Mwene nanena.’ ”

¹⁴ U Mwene akuti, “Nyokela kukwane mwe bantu abasita kusubiliwa, pakuti ane ne mulume winyu. Nkwiza pakumusenda weka ukufuma mukaya koka sona babili ukufuma muluko loka ukubuka namwe ku Ziyoni.

¹⁵ Po nkwiza pakubapa abadimi aba pamoyo uwane nu wane, babo bakwiza pakubalongozya na mahala sona nu bumanyi.

¹⁶ Po mupapanaye nukubala muchisu chilachila, abantu batakwiza pakunena sona nizya Bokosi ilya Lufingo ulwa Mwene. Mukwiza pakuluvya nizya masiku ghalaghala, mutakwiza pakulyinong'ona pamo pakulikumbuka pamo pakupanga ilinji.

¹⁷ Pakabalilo kalakala u Yelusalemu akwiza pakwitiziwa pakuba Chitengo icha Mwene, sona inko zyosi zikwiza pakubungana mu Yelusalemu nukulichindika itabwa ilya Mwene. Batakwiza pakuba sona na moyo amabibi.

¹⁸ Mumasiku ghalaghala ubumwene ubwa Yuda bukwiza pakuba poka nu bumwene ubwa Izilayeli, bosi poka bakwiza pakufuma kuchisu icha kumitu nukubasendela kuchisu chicho nkabapa abanyenya binyu pakuba mpyana yabo.”

Ukusita kusubiliwa ukwa Izilayeli

¹⁹ U Mwene akuti, “Wee Izilayeli, nalondagha pakukupokela, ngati we mwana wane nukukupa ichisu ichiza nkani, ichilingo ichiza nkani ichakuchila icha inko zyosi. Ninong'onagha ukuti unyitizyanje ukuti, ‘Tata,’ sona nukuti utakwiza pakuleka pakunkonka.

²⁰ Utame musubiliwa ngati mukolo ku mulume wache, mwee ba Izilayeli, momumo mwabela basita kusubiliwa kukwane. Ane ne Mwene nanena.”

²¹ Ichongo chikwivwika pamwanya pamaghamba, aba Izilayeli bakulila nukulaba ichisa, pachifukwa icha mbibi zyabo, sona bamuluvizye u Mwene u Chala wabo.

²² “Mwe bantu abasita kusubiliwa nyokela kukwane, nkwiza pakubapozya ukuti mube basubiliwa.” “Eee, tukwiza kukwako, pakuti we Mwene u Chala witu.

²³ Naloli, ichongo ichakwiputa ivifwani patughamba na pamaghamba chabuzimbuli, Naloli ubupoki bwitu buli mwa Mwene u Chala uwa Izilayeli.

²⁴ Loli ukwandila ku bulumendo bwitu, abachala abakozya isoni batupela aswe ukuti tutaghe vyosi, vivyo abanyenya bitu bakatubombela, kokuti imidimo iya ng'ozi niya ng'ombe, abana babo abalumendo na balindu ukwanda kale.

²⁵ Zagha tulambalale pasi bo tuli nisoni, sona ukwisamula kwitu kutuvwinke. Pakuti twamunangila u Mwene u Chala witu, aswe poka na banyenya bitu, ukwandila ko kubulumendo bwitu mupaka nilelo, sona twapotwa pakumwivwila u Mwene u Chala witu.”