Yelemiya 29 - IBAYIBOLO 2024

U Yelemiya akubasimbila ukalata abazya

¹ Agha gho mazyu agha mu kalata yuyo umulaghuzi u Yelemiya akatuma ukufumila ku Yelusalemu uwa kubuka ku basongo babo bakapona pakasi pabazya na baputi na balaghuzi na bantu abanji bosi babo u Nebukadineza akabuka nabo kubuzya ukufumila ku Yelusalemu pakubuka ku Babiloni.

² Zinizi zikabombiwa bo u Yehoyakini nu nyina na makambala agha mwene na balongozi aba mu Yuda na mu Yelusalemu, abafundi naba syani basendiwa mu Yelusalemu pakubuka nabo kubuzya.

³ U kalata uyu akatumiwa nu Elasa umwana uwa Shafani nu Gemaliya umwana uwa Hilikiya, babo u Zedekiya u mwene uwamu Yuda akabatuma kwa mwene u Nebukadineza uwamu Babiloni mumo akasimbamo ukuti:

⁴ U Mwene Uwamaka Ghosi, u Chala uwa Izilayeli, akubabuzya abantu babo bakasendiwa mu Yelusalemu pakubuka nabo kubuzya ku Babiloni ukuti,

⁵ “Muzengaye inyumba nukwikalamo, mulimaye mumaghunda nukulya vivyo mwinula.

⁶ Musendaye nukupapa abana abalumendo na balindu, abana binyu abalumendo mubasendelaye abakolo pakuba bachi babo, sona abana abalindu basendiwanje, umwakuti bope bapapaye abana abalumendo na balindu. Mupapanaye nukubala, mutakabanje banandi bulo.

⁷ Mukalondelaye umutende sona nukuti ivintu vikendelaye akiza akaya akakulu nkani kuko imbasendeyeko pakuba bazya. Mukiputilaye kwa Mwene, pachifukwa ichakuti nanti akaya akakulu kala ivintu vikukendela akiza, namwe bulo ivintu vikwiza pakubendela akiza.”

⁸ U Mwene Uwamaka Ghosi, u Chala uwa Izilayeli akuti, “Mutakabitikizyanje abalaghuzi na babo bakunena ivya muntazi babo bali pakasi papinyu ukuti babazimbulaye. Mutakateghelezyanje ivilota vyabo.

⁹ Vyabumyasi vivyo bakulaghulila mwitabwa lyane. Te nene imbatumite, awe. Ane ne Mwene nanena.”

¹⁰ U Mwene akuti, “Bo ichisu icha Babiloni chalaghila amaka 70 nkwiza pakubendela nukukwanilisya ilayizyo lyane nukubanyosezya ku buzilo bunubu.

¹¹ Pakuti inzimenye zizyo imbayanizizye, te bubibi awe, loli pakubapa ulusubilo ni ntazi inyiza.

¹² Po mukwiza pakunyitizya nukundaba, ane nkwiza pakubateghelezya.

¹³ Mukwiza pakundonda nukunyagha nanti mukundonda nu moyo winyu ghosi.

¹⁴ Mukwiza pakunyagha sona nkwiza pakubanyosezya ubwiza bwinyu bosi nukubabungannya ukufuma mu inko zyosi kuko nkabachimbizizyako ngati bazya. Nkwiza pakubanyosezya ku buzilo bubo mukikalaghako bo inchili pakubatuma kubuzya.”

¹⁵ Amwe mukuti, “U Mwene atutumila abalaghuzi ku Babiloni,”

¹⁶ loli teghelezya zizyo u Mwene akunena nizya mwene yuyo akulaghila mubumwene ubwa Devedi sona nizya bantu babo bakwikala mukaya akakulu nkani aka, babo bakamu binyu batakabuka namwe mubuzya.

¹⁷ U Mwene Uwamaka Ghosi akuti, “Nkwiza pakubatumila ubwite, nizala sona ni chiwaya, nkwiza pakubapela ngati vikomwa ivya makuyu vivyo vibolite sona umuntu atangalya napo panandi.

¹⁸ Nkwiza pakubakonka nu bwite nizala sona ni chiwaya, nkwiza pakubapela pakuba chintu ichinyazu ku bantu bosi aba bumwene ubwa pachisu ichapasi. Bakwiza pakuba bantu baghuniwa na bantu abakoghofya, abakusekiwa naba kusamuliwa pakasi pabantu aba inko izya bantu kuko nkwiza pakubachimbizizyako.

¹⁹ Pachifukwa ichakuti batakaghivwila amazyu ghagho nkababuzya akabalilo na kabalilo, amazyu ghagho nkatuma na babombi bane abalaghuzi, loli amwe mwe bazya mukaghakana.

²⁰ Polelo amwe mwe bazya aba mu Yelusalemu mwe nkabatuma ku Babiloni, teghelezya amazyu agha Mwene.”

²¹ U Mwene Uwamaka Ghosi, u Chala uwa Izilayeli, akunena nizya Ahabu umwana uwa Koliya nu Zedekiya umwana uwa Maseya, yuyo akulaghulila mwitabwa lyane ivyabumyasi akuti, “Nkwiza pakubabika munyobe izya Nebukadineza u mwene uwa Babiloni, po akwiza pakubaghogha bo mukwennya na maso ghinyu.

²² Pachifukwa icha bantu babili banaba, abazya bosi aba ku Yuda babo bakwikala mu Babiloni, bo bakumughuna umuntu, bakwiza pakunena ukuti, ‘U Mwene akubombele ngati mumo akamubombela u Zedekiya nu Ahabu, babo u mwene uwa ku Babiloni akabocha mumoto.’

²³ Pakuti babombite ivya bupunganu mu Izilayeli, balowa na bachi aba bapalamani babo, sona banenaye mwitabwa lyane ivyabumyasi vivyo intakababuzyapo ukuti banene. Ane inzimenye sona ne kaboni. Ane ne Mwene nanena.”

Ukumusimbila u Shemaya u kalata

²⁴ Umubuzye u Shemaya uwa ku Nehelama uti,

²⁵ “U Mwene Uwamaka Ghosi, u Chala uwa Izilayeli, akambuzya zizyo zikwiza pakumubonekela u Shemaya, yuyo akaba wabamo uwa bantu bitu aba mu Babiloni. Bo ukalata wane afika mu Babiloni, u Shemaya akabasimbila u kalata abantu aba mu Yelusalemu poka nu muputi u Zefaniya umwana uwa Maseya sona na baputi bosi abanji:

²⁶ “U Mwene akusala awe pakuba muputi mubuzilo ubwa Yehoyada, ukuti ubanje mulaghili uwa kwenelezya Inyumba iya Mwene, umupinyaye ni mpingu uchipena wesi yuyo akwinena mwene pakuba mulaghuzi nukumwighalila mujele.

²⁷ Nkimba po choni chicho utamukanizizye u Yelemiya uwamu Anatoti yuyo akwinena mwene pakuba mulaghuzi pakasi papinyu?

²⁸ Pakuti atutumiye amazyu twe bantu aba muchisu icha Babiloni aghakuti, ‘Ubuzya bwinyu bukwiza pakuba bwakabalilo akatali nkani. Polelo zenga inyumba izyakuti mwikalayemo, sona mulimaye amaghunda nukubyalamo imbeyu zyinyu nukuzilya zizyo mwinula.’ ”

²⁹ Umuputi u Zefaniya akamubelengela u kalata yula umulaghuzi u Yelemiya.

³⁰ Po u Mwene akamubuzya u Yelemiya akati,

³¹ “Ubatumile amazyu abantu bosi babo bali mubuzya uti, ‘Umu momumo u Mwene akunenela nizya Shemaya uwamu Nehelama, pachifukwa ichakuti u Shemaya akabalaghulila, napapo intakamutuma sona mwabusubila ubumyasi bwache.

³² Naloliloli, nkwiza pakumufunda u Shemaya uwamu Nehelama na banyenya bache. Atakwiza pakuponapo nayumoyumo pakasi pabantu banaba, sona atakwiza pakubwennyapo nu bwiza nabumobumo bubo nkwiza pakubabombela abantu bane, pachifukwa ichakuti alumbilila amazyu aghakusambuka.’ Ane ne Mwene nanena.”