Yelemiya 27 - IBAYIBOLO 2024

U Yelemiya akwivwika ikoli musingo

¹ Bo u Zedekiya umwana uwa Yosiya u mwene uwa muchisu icha Yuda bo anda pakulaghila, u Mwene akamubuzya u Yelemiya akati,

² “Panga ikoli pakubombezya utupote utwa ikwela nutukwi, po wivwike musingo.

³ Ubatumile amazyu abamwene aba mu Edomu naba mu Mowabu na mu Amoni na mu Tile sona na mu Sidoni, ukwendela muntumi zizyo zyizite mu Yelusalemu kwa Zedekiya u mwene uwa Yuda.

⁴ Ubalamule ukuti babuke na mazyu ghanagha ku bamwene babo nukubabuzya ukuti, ‘Umu momumo u Mwene Uwamaka Ghosi, u Chala uwa Izilayeli, akunenela ku bamwene binyu akuti:

⁵ Namaka ghane amakulu nkapela ichisu ichapasi, na bantu bache sona ni vinyamana vivyo vikwikala mulamula, sona nkumupa umuntu wesi yuyo nighanite pakumupa.

⁶ Ilelo nkwiza pakuvibika ivyisu vyosi vinivi munyobe izya mubombi wane u Nebukadineza u mwene uwa chisu icha Babiloni. Namupa sona ivinyamana ivya munkolongo ukuti avilaghilaye.

⁷ Inko zyosi zikwiza pakumubombela yuyo nu mwana wache sona nu mwizukulu wache mupaka akabalilo kafikile kako ichisu chache chikwiza pakulaghiliwa ninko inyinji. Po abantu aba inko inyinji na bamwene abamaka bakwiza pakumupela pakuba muzya wabo.

⁸ “ ‘Loli nanti uluko lumo, pamo ubumwene ubunji bosi butakwiza pakumubombela u Nebukadineza u mwene uwa chisu icha Babiloni, nukuleka pakumulambila u mwene yula, nkwiza pakulufunda uluko lula nupanga, nizala sona ni chiwaya mupaka inganangannye amaka agha luko lula. Ane ne Mwene nanena.

⁹ Pachifukwa chinichi mutakabivwilaye abalaghuzi binyu, na bantu babo bakunena ivya muntazi na babo bakusanusya ivilota, na babo bakunena ni mizimu iya bantu abafwe pamo abamayele, nanti bakubabuzya ukuti, “Mutakamubombelaye u mwene uwamu Babiloni.”

¹⁰ Pakuti bakulaghula ivyabumyasi umwakuti abalwani binyu babasendele kubutali ni chisu chinyu nukuzimila kulakula.

¹¹ “ ‘Loli uluko losi lulo lukwiza pakumulambila u mwene uwa muchisu icha Babiloni nukumubombela, nkwiza pakululeka ukuti lusyale muchisu chache umwakuti lulimaye mulamula. Ane ne Mwene nanena.’ ”

¹² Nkamubuzya sona amazyu ghanagha u Zedekiya u mwene uwa chisu icha Yuda. Nkati, “Umulambilaye u mwene uwamu Babiloni, umubombelaye yuyo na bantu bache, po ukwiza pakupona.

¹³ Nkimba choni chicho awe poka na bantu bako mufwilaye kubwite, nizala sona ni chiwaya, chicho u Mwene akaloghofya uluko losi lulo lutakamubombelagha u mwene uwa chisu icha Babiloni?

¹⁴ Mutakaghivwilaye amazyu agha balaghuzi babo bakubabuzya bakuti, ‘Mutakamubombelaye u mwene uwa chisu icha Babiloni,’ pakuti bakubalaghulila ivyabumyasi.

¹⁵ ‘Ane ne Mwene ntabatumitepo nalumolumo, bakulaghulila mwitabwa lyane ivyabumyasi. Polelo nkwiza pakubachimbizya sona mukwiza pakuzimila, mwebosi abalaghuzi na babo bakubalaghulila.’ ”

¹⁶ Po nkababuzya abaputi na bantu bosi banaba nkati, “Izi zyo zizyo u Mwene akunena, mutakabateghelezyanje abalaghuzi babo bakuti, ‘Ivibombelo ivya mu Nyumba iya Mwene ivya mu Babiloni vikwiza lunulu.’ Vyabumyasi vivyo bakubalaghulila.

¹⁷ Mutakabivwilaye. Mumubombelaye u mwene uwamu Babiloni po mukwiza pakuba nubumi. Nkimba choni chicho akaya akakulu nkani aka kabanje chisami?

¹⁸ “Nanti abalaghuzi banaloli sona izyu ilya Mwene lili mumwabo, leka bipute kwa Mwene Uwamaka Ghosi ukuti ivibombelo vivyo vikalekiwa mu Nyumba iya Mwene sona na munyumba iya bumwene ubwa mu Yuda nubwa mu Yelusalemu vitakabukaye ku Babiloni.

¹⁹ Pakuti umu momumo u Mwene Uwamaka Ghosi akunenela nizya mpanda, ni sonta inkulu iya mukuba, ni vyakwimapo isonta sona ni vibombelo vyosi vivyo visyalikiye mukaya aka,

²⁰ vivyo u Nebukadineza u mwene uwamu Babiloni atakavisenda bo akumusendela kubuzya u Yehoyakini umwana uwa Yehoyakimu u mwene uwamu Yuda ukufumila nabo ku Yelusalemu mupaka ku Babiloni poka na balongozi aba mu Yuda naba mu Yelusalemu.

²¹ Eee, momumo u Mwene Uwamaka Ghosi, u Chala uwa Izilayeli, akunenela nizya vintu vivyo vikalekiwa mu Nyumba iya Mwene sona na munyumba iya bumwene, ubwa mu Yuda nubwa mu Yelusalemu:

²² Vikwiza pakusendiwa nukubuka navyo ku Babiloni sona vikwiza pakusyala kulakula mupaka nize ivinyosezye mubuzilo bunubu. Ane ne Mwene nanena.”