Yelemiya 26 - IBAYIBOLO 2024

U Yelemiya ali pabulongi

¹ Bo u Yehoyakimu umwana uwa Yosiya u mwene uwa chisu icha Yuda, akwanda pakulaghila, u Mwene akamubuzya u Yelemiya akati,

² “Buka wimilile palubinjilo ulwa Nyumba iya Mwene nukubabuzya abantu bosi aba mutwaya utukulu utwa Yuda babo bakwiputila mu Nyumba iya Mwene. Ubabuzye zyosi zizyo nkukulamula, utakalilekayepo nizyu nalimolimo.

³ Lumo bangateghelezya nukunyokako, po umuntu wesi angabuleka ububibi bwache, umwakuti indeke pakubapa ulufundo lulo natinji imbafunde nalo pachifukwa icha bubibi bubo babombite.

⁴ Ubabuzye ukuti, ‘Umu momumo u Mwene akunenela: Nanti mutakunyivwila nukukonka ululaghilo lwane lulo nkabapa,

⁵ sona nanti mutakughivwila amazyu agha babombi bane abalaghuzi babo nkabatumila akabalilo na kabalilo, loli mutakivwila,

⁶ po nkwiza pakuyipela inyumba iyi iyakwiputilamo pakuba ngati buzilo ubwa Shilo, sona nkwiza pakukapela akaya akakulu nkani aka pakuba chighune pakasi panko izya pachisu ichapasi.’ ”

⁷ Abaputi na balaghuzi sona na bantu bosi bakamwivwa u Yelemiya akughanena amazyu ghosi ghanagha mu Nyumba iya Mwene.

⁸ Loli bo u Yelemiya amala bulo pakubabuzya abantu bosi amazyu ghagho u Mwene akamulamula ukuti ababuzye, abaputi na balaghuzi poka na bantu bosi bakamulema nukumubuzya ukuti, “Ubaghiye pakufwa!

⁹ Nkimba choni chicho ukulaghulila mwitabwa ilya Mwene ukuti inyumba iyi yikwiza pakuba ngati buzilo ubwa Shilo sona akaya akakulu aka kakwiza pakuba chisami, mutakwiza pakuba nu muntu nayumoyumo?” Po abantu bosi bakamuzyungulila u Yelemiya mu Nyumba iya Mwene.

¹⁰ Bo amakambala agha Yuda ghivwa nizya vintu vinivi bakafuma munyumba iya bumwene nukubuka ku Nyumba iya Mwene nukwikala pa Mulyango Umupya uwa Nyumba iya Mwene.

¹¹ Po abaputi na balaghuzi bakaghabuzya amakambala poka na bantu bosi ukuti, “Umuntu uyu abaghiye pakughoghiwa pachifukwa ichakuti akulaghula ububibi ubwa kaya akakulu nkani aka. Mwiyivwila na makutu ghinyu!”

¹² Po u Yelemiya akaghabuzya amakambala ghosi na bantu bosi akati, “U Mwene weyuyo akantuma ukuti indaghule ububibi ubwa nyumba iyi nakaya akakulu nkani aka na mazyu ghosi ghagho mwaghivwa.

¹³ Ilelo yannya akendele kinyu ni mbombo zyinyu nukumwivwila u Mwene u Chala winyu, po u Mwene akwiza pakubahobokela ichibibi chicho alondagha pakubabombela.

¹⁴ Loli ane indi munyobe zyinyu, mbombela chosi chicho mukwinong'ona ukuti chiza sona chigholosu.

¹⁵ Loli mumanye ukuti nanti mwangogha, po amwe mwebenecho poka nakaya akakulu nkani, sona napa bantu babo bakwikala mumo mukwiza pakwisendela mwebene inongwa iya kukupula ibanda lilyo lite ninongwa nayimoyimo pakuti nubwanaloli bosi u Mwene antumite kukwinyu ukuti imbasoke.”

¹⁶ Po amakambala na bantu bosi bakababuzya abaputi na balaghuzi bakati, “Umuntu uyu atakaghoghiwe! Pachifukwa ichakuti anenelagha mwitabwa ilya Mwene u Chala witu.”

¹⁷ Abasongo bamo aba chisu bakanyamuka nukuchibuzya ichilundilo icha bantu ukuti,

¹⁸ “U Mika uwa muchisu icha Molesheti akalaghulagha mukabalilo aka Hezekiya, u mwene uwa chisu icha Yuda akati, ‘U Mwene Uwamaka Ghosi ati: U Ziyoni akwiza pakulimiwa ngati mughunda, u Yelusalemu akwiza pakuba chisami, sona ighamba ilya Nyumba iya Chala likwiza pakuba ngati musitu.’

¹⁹ “Nkimba u Hezekiya u mwene uwa chisu icha Yuda na bantu bosi bakamughogha u Mika? Nkimba u Hezekiya atakamunyila u Mwene nukulaba uluhobokelo? Nkimba u Mwene atakabahobokela, umwakuti atakabapa ulufundo lulo akati akwiza pakubafunda nalo? Loli aswe twebene tuli papipi pakwisendela intamyo impalapala nkani!”

²⁰ Akabapo sona umuntu uyunji yuyo akalaghulilagha mwitabwa ilya Mwene, itabwa lyache akaba we Uliya umwana uwa Shemaya uwamu Kiliyati Yeyalimu, wepe akalaghula zizyo zikwiza pakukabonekela akaya akakulu nkani sona ni chisu ichi ukuyana namumo u Yelemiya akabombela.

²¹ Bo u mwene Yehoyakimu na basongo bache bosi sona na makambala ghache bivwa amazyu ghache, u mwene akalonda pakumughogha. Bo u Uliya azyivwa, akanyila nkani nukuchimbilila ku Ijiputi.

²² Pope bulo u mwene u Yehoyakimu akamutuma u Elinatani umwana uwa Akiboli ku Ijiputi poka na bantu abanji.

²³ Bakamulema u Uliya mu Ijiputi nukubuka nawe kwa mwene u Yehoyakimu, yuyo akamughogha nupanga, bakaghusyila umubili wache ku mapumpa agha kusyililako abantu bulo.

²⁴ Loli u Yelemiya akapokiwa nu Ahikamu u mwana uwa Shafani, yuyo atakachitikizya ichilundilo ukuti chimughoghe u Yelemiya.