Yelemiya 25 - IBAYIBOLO 2024

Amaka 70 agha buzya

¹ U Mwene akamubuzya u Yelemiya ukuyana nizya ba Yuda bosi mumwaka uwafolo bo u Yehoyakimu umwana uwa Yosiya, u mwene uwa ba Yuda, ghugho ghukaba mwaka uwakwanda uwa Nebukadineza u mwene uwa Babiloni.

² Po umulaghuzi u Yelemiya akababuzya abantu bosi aba mu Yuda na bantu bosi babo bakikalagha mu Yelusalemu akati:

³ Ukwamaka 23 napokela amazyu ukufuma kwa Mwene (ukwandila mumwaka uwa 13, uwa Yosiya umwana uwa Amoni u mwene uwa ba Yuda mupaka mwisiku linili) ghagho naghanenagha nukubabuzya kabilikabili, loli mutakivwa.

⁴ Loli napapo u Mwene akabatumila ababombi bache abalaghuzi kabilikabili, pope bulo mutakivwa pamo ukuteghelezya.

⁵ Abalaghuzi bala bakati, “Umuntu wesi mumwinyu ayileke inkalo yache imbibi sona ni zila zyache imbibi, po mukwiza pakwikala muchisu chicho u Mwene akabapa amwe na banyenya binyu mupaka bwila na bwila.

⁶ Mutakabakonkaye abachala abanji nukubabombela sona mutakabiputaye, mutakankalalizyanje ni mbombo izya nyobe zyinyu. Po ntakwiza pakubanangannya.”

⁷ Loli u Mwene akuti, “Mutakanyivwila, sona mwankalalizya ni mbombo izya nyobe zyinyu, sona mwivulazya mwebene.”

⁸ Polelo u Mwene Uwamaka Ghosi akuti, “Pachifukwa ichakuti mutaghivwila amazyu ghane,

⁹ nkwiza pakubitizya abantu aba kumitu poka nu mubombi wane u Nebukadineza u mwene uwa ku Babiloni sona nkwiza pakuchitumila ubwite ichisu ichi poka na bantu babo bakwikala mulamula sona ninko izya bantu babo babazyunguliye. Nkwiza pakubanangannya nukubapela pakuba chintu ichakoghofya nichakusekiwa sona ichisu chila chikwiza pakwipela chisami icha bwila na bwila.

¹⁰ Nkwiza pakwefyamo ichongo icha buhobosu nu lusekelo, amazyu agha uwakusenda nu wakusendiwa, sona ichongo icha lwala nulukozyo ulwa nyale vitakwiza pakubamo.

¹¹ Ichisu chosi ichi chikwiza pakuba nkolongo ni chisami, sona inko zinizi zikwiza pakumubombela u mwene uwa Babiloni amaka 70.

¹² “Po nanti amaka 70 ghamala, nkwiza pakumufunda u mwene uwa Babiloni poka na bantu bache, ni chisu icha bantu aba mu Babiloni, pachifukwa icha mbibi zyabo, sona nkwiza pakuchipela pakuba chisami bwila na bwila.

¹³ Nkwiza pakubafunda abantu aba mu Babiloni nazyosi zizyo nanena, sona na zizyo zisimbiwe mwibuku ili, sona u Yelemiya akalaghula nizya kubasusya abantu aba inko zyosi zinizi.

¹⁴ Bakwiza pakuba bazya aba bantu aba inko inyinji poka na bamwene abamanyikwe. Nkwiza pakubatanizya ukuyana ni mbombo zyabo zizyo bakabomba ni nyobe zyabo.”

U Mwene akuzifunda inko

¹⁵ U Mwene, u Chala uwa ba Izilayeli akambuzya akati, “Senda ulubako ulwa vinyo ulwizule nubukali bwane, uzing'wesye inko zyosi zizyo nkukutumako.

¹⁶ Bo bang'wela bakwiza pakutantalila nukupena pachifukwa icha bwite bubo nkwiza pakutuma pakasi papabo.”

¹⁷ Po nkasenda ulubako lula munyobe izya Mwene nukuzing'wesya inko zyosi zizyo nkatumiwako:

¹⁸ Ku Yelusalemu sona na mutwaya utwa Yuda, na bamwene na makambala pakubapela pakuba chisami, nukuba chintu ichakoghofya, nicha kusekiwa nukughuniwa ngati mumo babeleye ilelo,

¹⁹ kwa Falabo u mwene uwa muchisu icha Ijiputi na babombi bache na makambala ghache, sona na bantu bache bosi,

²⁰ poka na bantu bosi abayeni babo bali mulamula, ku bamwene bosi aba mu Uzi, ku bamwene bosi aba mu Filisiti, abantu bosi aba mu Ashikeloni, naba mu Gaza naba mu Ekiloni, sona na bosi babo bakasyalikila mu Ashidodi,

²¹ ku bantu bosi aba mu Edomu naba mu Mowabu naba mu Amoni,

²² ku bamwene bosi aba muvyisu ivya mu Tile naba mu Sidoni, ku bamwene bosi aba mulubazu ulwa kwisila ilya nyanja iya Medeteleniya,

²³ kwa Dedani naba ku Tema naba ku Buzi sona na bosi babo bakumwa isisi lyabo mulubazu,

²⁴ ku bamwene bosi aba mu Alabiya sona na bamwene bosi aba bantu abayeni babo bakwikala munkolongo,

²⁵ ku bamwene bosi aba mu Zimuli naba mu Elamu naba mu Mediya,

²⁶ ku bamwene bosi aba kumitu, aba kupipi naba kubutali, ukuyana namumo bakakonkezannya sona na bamwene bosi aba pachisu ichapasi. Pisinda pache bo bosi bang'wela, po u mwene uwa ku Babiloni wepe akwiza pakung'wela.

²⁷ Po u Mwene ambuzya ati imbabuzye abantu ukuti, “U Mwene Uwamaka Ghosi, u Chala uwa Izilayeli akuti, ‘Ng'wela, mukolwe nkani nukutapika, muwanje pasi po mutakanyamuke sona, pachifukwa icha bwite bubo nkwiza pakutuma pakasi papinyu.’ ”

²⁸ Loli nanti bakukana pakupokela ulubako ukuti bang'wele, ubabuzye ukuti, “U Mwene Uwamaka Ghosi akuti, ‘Mubaghiye pakung'wela!’

²⁹ Ennya nkwiza nu bwite mukaya akakulu nkani kako kakwitiziwa ni Tabwa lyane. Nkimba amwe mukwinong'ona ukuti mutakwiza pakufundiwa? Te momumo, mutakwiza pakupona, pakuti nkwiza pakutuma ubwite pabantu bosi babo bakwikala pachisu ichapasi. U Mwene Uwamaka Ghosi anena.

³⁰ “Yelemiya, buka kabalaghulile ukuti, ‘U Mwene akwiza pakubuluma kumwanya, sona akwiza pakupaya mubuzilo bwache ubuzelu ubwakwikalamo, nukuchibungulizizya nkani pachisu chache. Akwiza pakukolomoka ngati bantu babo bakukanyanka amampesya, nukubakolomokela babo bakwikala muchisu.

³¹ Izyu likwiza pakwivwika na kubumalilo ubwa chisu ichapasi, pakuti u Mwene akwiza pakuzipa inongwa inko, akwiza pakubalonga abantu bosi, sona ababibi bakwiza pakughoghiwa nupanga. Ane ne Mwene nanena.’ ”

³² U Mwene Uwamaka Ghosi akuti, “Ennya intamyo zikwiza pa luko ulu na ulu, sona kubumalilo ubwa chisu kusambukite impepo iyamaka.”

³³ Pakabalilo kalakala imivimba iya babo bakaghoghiwa nu Mwene, yikwiza pakulambalala posi na posi, ukwandila kubumalilo ubwa chisu mupaka kubunji, kutakwiza pakubapo nayumoyumo uwakubalila, pamo uwakubasyila, loli bakwiza pakuba ngati muvundo pamwanya pachisu.

³⁴ Mwee badimi, mulilaye nukufwifwitila nkani. Mwee balongozi aba bantu bane, mughalaghataye mulufumbi. Pakuti akabalilo kinyu akakughogheliwa kafika, sona mukwiza pakughoghiwa ngati bo badubi.

³⁵ Abadimi batakwiza pakuba nukwakuchimbilila, abalongozi batakwiza pakuba nukwakuponelako.

³⁶ Ivwa ukulila ukwa badimi, nukufwifwitila ukwa balongozi, pakuti u Mwene abunangannya ubuzilo ubwakudimilapo.

³⁷ Ivibagha ivya ng'ozi vivyo vikaba pamutende vyaba visami pachifukwa icha bukali ubwa koghofya ubwa Mwene.

³⁸ U Mwene ali ngati nkalamu yiyo yiyilekite impako yache, sona ichisu chabo chaba chisami, pachifukwa icha bantu babo bakubayivya nu bwite, sona pachifukwa icha bukali ubwa koghofya ubwa Mwene.