Yelemiya 24 - IBAYIBOLO 2024

Ividudunga vibili ivya makuyu

¹ Bo u Yehoyakini umwana uwa Yehoyakimu u mwene uwa Yuda na makambala na bafundi, na babizi aba mu Yuda basendiwa pakubuka kubuzya ukufuma mu Yelusalemu nu mwene u Nebukadineza uwamu Babiloni, u Mwene akandanjizya ividudunga vibili ivya vikomwa ivya makuyu vivyo vikabikiwa kuntazi ukwa Nyumba iya Mwene.

² Ichidudunga choka chikaba ni vikomwa ivya makuyu ivyiza nkani, vivyo vikayana bulo navivyo vikatona kale, ichidudunga ichinji chikaba ni vikomwa ivibibi nkani ivya makuyu, umwakuti vikaba vibibi nkani pakulya.

³ Po u Mwene akandalusya akati, “Nkimba ukwennya ichoni, Yelemiya?” Nkamwamula nkati, “Amakuyu. Ivikomwa ivyiza, vyiza nkani, loli vibibi, vibibi nkani ukuchilapo umwakuti vitabaghiye pakulyewa.”

⁴ U Mwene akambuzya akati,

⁵ “Ane ne Mwene u Chala uwa Izilayeli nkuti, ‘Abazya aba ku Yuda babo nkabefyako ku buzilo ubu nukubuka nabo kuchisu icha ku Babiloni, bayanite bulo na makuyu amiza agha.

⁶ Nkwiza pakubasungilila nukubabombela inyiza, sona nkwiza pakubanyosezya kuchisu chabo. Nkwiza pakubazenga sona ntakwiza pakubamongolannya. Nkwiza pakubabyala sona ntakwiza pakubanyunkulannya.

⁷ Nkwiza pakubapa u moyo uwakuzimanya ukuti ne Mwene. Bakwiza pakuba bantu bane, nane nkwiza pakuba ne Chala wabo, pakuti bakwiza pakunyokela kukwane nu moyo wabo ghosi.

⁸ “ ‘Loli ngati makuyu amabibi nkani pakulya, momumo nkwiza pakubombela nu Zedekiya u mwene uwamu Yuda, na makambala ghache, nababo bakapona aba mu Yelusalemu, manyi bachili basyalikiye muchisu chinichi pamo bakwikala mu Ijiputi.

⁹ Nkwiza pakubapela pakuba chintu ichakoghofya muvyisu vyosi ivya pasi, ichintu ichakusamuliwa, ichintu chicho chite nimbombo nayimoyimo, ichintu ichakusekiwa nicha kughuniwa kosi kuko nkubachimbizizyako.

¹⁰ Nkwiza pakubatumila ubwite, nizala sona ni chiwaya mupaka bosi bananganike muchisu chicho nkabapa abene poka na banyenya babo.’ ”