Yelemiya 23 - IBAYIBOLO 2024

Nizya bumwene ubwa muntazi

¹ U Mwene akuti, “Chighune ku badimi babo bakuzinangannya nukuzinyampannya ing'ozi izya mudimo wane!”

² Polelo u Mwene u Chala uwa Izilayeli akubabuzya abalongozi babo bakubasungilila abantu bane akuti, “Pachifukwa ichakuti mwabanyampannya abantu bane nukubachimbizizya kubutali, sona mutakubasungilila, nkwiza pakubika ulufundo papinyu pachifukwa icha mbibi zizyo mwabomba.

³ Ane nemwenecho nkwiza pakubabungannya abantu bane abakusyalako, nkwiza pakubefyamo muvyisu mumo nkabachimbizizyamo nukubanyosezya muvyisu vyabo, mumo bakwiza pakunyama nkani sona bakwiza pakuba binji nkani.

⁴ Nkwiza pakubalondela abalongozi babo bamenye pakubasungilila sona batakwiza pakunyilagha pamo ukoghofiwa, pamo pakusobelapo. Ane ne Mwene nanena.

⁵ “Amasiku ghakwiza ghagho ane ne Mwene nkwiza pakubimikila u mwene umugholosu pa banyenya aba Devedi. Weyuyo akwiza pakubalaghila abantu mubugholosu na mumahala, sona akwiza pakulongelagha mubugholosu na mubwanaloli inongwa izya bantu aba muchisu.

⁶ Mukabalilo kache ichisu icha Yuda chikwiza pakupokiwa sona ichisu icha Izilayeli chikwiza pakwikalagha umwakufwasa. Akwiza pakwitiziwa ni tabwa ilyakuti, ‘U Mwene we Bugholosu bwitu.’ ”

⁷ U Mwene akuti, “Kakwiza akabalilo kako abantu batakwiza pakunena sona ukuti, ‘Tukulapila mwa Mwene umumi, yuyo akabafumya aba Izilayeli mu Ijiputi,’

⁸ loli bakwiza pakuti, ‘Tukulapila mwa Mwene umumi, yuyo akabafumya aba Izilayeli muchisu icha kumitu sona na kuvyisu vyosi vivyo akabanyampanizizyako.’ Po bakwiza pakwikala muchisu ichabo ni chabo.”

Abalaghuzi abamyasi

⁹ Pakunena nizya balaghuzi, umoyo wane ghuli nichitima nkani, amafupa ghane ghakutetema. Indi ngati muntu yuyo akolizwe, umuntu yuyo u vinyo amumalite amaka pachifukwa icha Mwene sona na mazyu ghache amazelu.

¹⁰ Ichisu chizuye na balowe, pachifukwa icha chighune, abantu aba muchisu bakulila, sona lyope nisote ilyakudimamo munkolongo lyumiye. Bope abalaghuzi bakukonka ububibi sona batakubombela mubugholosu.

¹¹ “Bosi babili banaba, abalaghuzi na baputi batakumunyila u Chala, Imbaghite bakubomba ububibi mu Nyumba yane. Ane ne Mwene nanena.

¹² “Polelo izila zyabo zizyo bakwendamo zikwiza pakuba zya butyelele, bakwiza pakuchimbiziwa ku chisi, sona bakwiza pakuwila kulakula. Nkwiza pakubizila nintamyo, sona akabalilo aka lufundo kakwiza. Ane ne Mwene nanena.

¹³ “Nazyennya imbibi mukasi mu balaghuzi aba mu Samaliya, bakulaghulila mwitabwa ilya Baala sona bakubapuvya abantu bane.

¹⁴ Loli mu balaghuzi aba mu Yelusalemu nachennyamo ichintu ichakoghofya nkani. Bakulowa nukunena ubumyasi. Bakubavwa abantu pakubomba ububibi, umwakuti atalipo nayumoyumo uwakuleka pakubomba ububibi. Kukwane bosi banaba bali ngati we Sodomu, abantu aba mu Yelusalemu bali ngati we Gomola.”

¹⁵ Polelo, pakunena nizya balaghuzi banaba, u Mwene Uwamaka Ghosi akuti, “Nkwiza pakubalyesya ivyakulya ivibabe, sona bakwiza pakung'wela amizi agha bwanga, pachifukwa ichakuti ukwendela mu balaghuzi aba mu Yelusalemu imbeyu imbibi yapesiwa muchisu chosi.”

¹⁶ U Mwene Uwamaka Ghosi akuti, “Mutakateghelezyanje ku zizyo abalaghuzi bakubalaghulila, bakubizuzya bulo ninyinong'ono izya buzimbuli. Bakunena nizya visetuka vivyo vili munyinong'ono zyabo, vivyo vitafumite mumulomo wane.

¹⁷ Bakwendelela pakubabuzya abantu babo bakukana pakuteghelezya ku zizyo nkubabuzya bakuti, ‘U Mwene akuti: Mukwiza pakuba nu mutende.’ Sona bakubabuzya babo bali na moyo amakafu bakuti, ‘Intamyo zitakwiza pakubawila napo panandi.’

¹⁸ Pakuti nkimba wewenu pakasi pabalaghuzi banaba yuyo imiliye lumo mulukomano ulwa Mwene ukuti ivwe nukuzyaghannya inyinong'ono zyache? Nkimba wenu yuyo ateghelezizye nukwivwa amazyu ghache?

¹⁹ Ennya impepo iya Mwene yikwiza nubukali yiyo yili ngati ko kankungu kako kakwiza, pamitu iya bantu ababibi.

²⁰ Ubukali ubwa Mwene butakwiza pakunyokako awe mupaka bwize bubombe nukuzimalizya zizyo u Mwene inong'onite pakuzibomba. Po pisinda pache mukwiza pakuzimanya akiza.”

²¹ U Mwene akuti, “Ntakabatumapo abalaghuzi banaba, loli pope bulo bakabuka. Ntakanenapo nabo, loli pope bulo bakalaghula.

²² Nanti bakimilila lumo mulukomano lwane, po ngali bakalumbilila amazyu ghane ku bantu bane, sona ngali bakabanyosyako ku zila zyabo imbibi, nakumbombo zyabo imbibi.”

²³ U Mwene akuti, “Nkimba ane ne Chala yuyo akwaghiwa papipi pene, sona ne Chala yuyo atakwaghiwa napabutali?

²⁴ Nkimba umuntu angavwama kubusyefu umwakuti intangamwennya? Nkimba ane intalipo posi na posi kumwanya na pachisu ichapasi? Ane ne Mwene nanena.

²⁵ “Nivuye zizyo abalaghuzi bakunena, sona bakulaghulila mwitabwa lyane, zizyo zyabumyasi bakukolomoka bakuti, ‘Nalota! Nalota!’

²⁶ Nkimba abalaghuzi banaba bakwiza pakubazimbula abantu bane mupaka liyi?

²⁷ Abalaghuzi banaba bakwinong'ona ukuti abantu bakwiza pakunduvya pachifukwa icha vilota vivyo bakubabuzya abantu ngati mumo abanyenya babo bakanduvizya nukumwiputa u Baala.

²⁸ “Muleke umulaghuzi yuyo alota asanusye ichilota chache, loli umulaghuzi yuyo ali na mazyu ghane aghanenele mubusubiliwa. Nkimba amapeta ghayanite bulo ni ngano? Ane ne Mwene nanena.

²⁹ “Nkimba amazyu ghane ghatayanite bulo numoto? Nkimba ghatayanite bulo ni nyondo yiyo yikutizannya ibwe pakuba tumenyumenyu?

³⁰ “Polelo nkubakana abalaghuzi abamyasi babo bakwibilana benebene amazyu ngati po mazyu ghane.

³¹ Nkubasusya abalaghuzi babo bakufumya amazyu pa milomo yabo nukunena ukuti, ‘Amazyu agha we Mwene anena.’

³² Momumo, nkubakana abalaghuzi babo ubulaghuzi bwabo ubwa vilota ivyabumyasi. Bakubabuzya nukubapuvya abantu bane napapo intakabatuma sona intakabasalapo. Ubulaghuzi bwabo bute nubwavwilizi nabumobumo ku bantu banaba. Ane ne Mwene nanena.”

Nizya katundu umung'wamu uwa Mwene

³³ U Mwene akamubuzya akati, “Yelemiya, bo abantu aba, pamo abalaghuzi pamo abaputi, bakukulalusya bakuti, ‘Nkimba ntamyo zyoni zizyo zili mumoyo uwa Mwene?’ ubabuzye uti, ‘Amwe mwe ntamyo kwa Mwene sona akwiza pakubatagha.’

³⁴ Nanti umulaghuzi, pamo umuputi pamo umuntu uyunji wesi akuti, ‘Agha gho mazyu agha Mwene,’ nkwiza pakumufunda umuntu yula poka naba munyumba yache.

³⁵ Loli nanti mukunenezannya nu mumanyani pamo umupalamani wesi mutinji, ‘Nkimba u Mwene amuye ichoni?’ pamo ‘Nkimba u Mwene akunena ichoni?’

³⁶ Loli mutakayitambulaye intamyo iya Mwene, pachifukwa ichakuti izyu ilya muntu wesi likuba ntamyo, po mukughannyongannya amazyu agha Chala umumi, u Mwene Uwamaka Ghosi, u Chala witu.

³⁷ Izi zyo zizyo mukumulalusya umulaghuzi mukuti, ‘Nkimba u Mwene amuye ichoni?’ pamo ‘Nkimba u Mwene anenite ichoni?’

³⁸ Napapo bakunena ukuti, ‘U Mwene ali nintamyo mumoyo wache,’ loli ane ne Mwene, nkabatumila amazyu aghakuti mutakanenaye ukuti, ‘U Mwene ali nintamyo mumoyo wache.’

³⁹ Po nkwiza pakubanyamula nukubasumbila ku butali. Nkwiza pakubefyapo pamaso ghane amwe poka nakaya akakulu nkani kako nkabapa amwe na banyenya binyu.

⁴⁰ Nkwiza pakubasamula bwila na bwila nukubakozya isoni zizyo zitakwiza pakuluviwapo.”