Yelemiya 22 - IBAYIBOLO 2024

Ubulaghuzi ubwa kunena nizya bumwene ubwa Yuda

¹ U Mwene akuti, “Ikila kunyumba iya bumwene iya mwene u Yuda nukuti,

² ‘Wee mwene uwa Yuda, ivwa amazyu agha Mwene, wewe ukwikala pachitengo icha Devedi, awe poka na makambala ghako sona na bantu babo bakwinjilila pamilyango iyi.

³ U Mwene akuti: Ulongelaye inongwa mubugholosu na mubwanaloli. Umupokaye umuntu munyobe izya bayinvyi sona na yuyo afyuliwe ivyache. Utakamubombelaye nachimochimo ichibibi umuyeni, pamo umupina, pamo umwana umulanda, pamo umukolo umufwilwe, sona utakakupulaye ibanda ilya bantu babo bate nakalema mubuzilo bunubu.

⁴ Pakuti nanti mukughivwila amalamulo ghanagha, po abamwene babo bakwikala pachitengo icha Devedi bakwiza pakwinjila pamilyango iya nyumba iya bumwene, bo bakwelite pa ngolo napa falasi, poka na makambala ghabo sona na bantu babo.

⁵ Loli nanti mutakwivwila amalamulo, ane ne Mwene nkulapa ukuti inyumba iya bumwene iyi yikwiza pakuba chisami.’ ”

⁶ Pakunena nizya nyumba iya bumwene iya mwene uwa Yuda u Mwene akati, “Napapo uli ngati we chisu icha Giliyadi kukwane, sona uli ngati songa iya lighamba ilya Lebanoni, naloli nkwiza pakukupela pakuba we nkolongo, pakuba ngati twaya tuto abantu batakwikalamo.

⁷ Nkwiza pakukutumila abantu aba kunangannya, bo umuntu wesi ali ni vilwilo vyache sona bakwiza pakubola amatabwa amiza agha mwale, nukughasumbila pamoto.

⁸ “Bo inko inyinji zikudumusannya mukaya akakulu nkani aka zikwiza pakulalusannya ukuti, ‘Nkimba choni chicho u Mwene abomba ichintu chinichi mukaya akakulu nkani kanaka?’

⁹ Ilyamulo likwiza pakuba lyakuti, ‘Chifukwa chakuti balulekite ulufingo ulwa Mwene u Chala wabo sona bakubiputa nukubabombela abachala abanji.’ ”

Nizya mwene u Shalumu

¹⁰ Utakamulililaye u mwene umufwe pamo pakumufwifwitilila, loli umulililaye yuyo epamo muchisu chache nukusendiwa pakuba muzya, pachifukwa ichakuti atakwiza pakunyokelako sona nukuchennya ichisu chicho akapapiliwamo.

¹¹ Pakunena nizya Shalumu umwana uwa Yosiya, yuyo akamupyana u wise pakuba we mwene uwa Yuda, u Mwene akuti, “Akepamo muno sona ate akanyokelemo nalumolumo.

¹² Akwiza pakufwila kubuzya, atakwiza pakuchennya nalumolumo ichisu ichi.”

Nizya mwene u Yehoyakimu

¹³ U Mwene akuti, “Chighune ku muntu yuyo akuzenga inyumba yache muzila zizyo te ngolosu, yuyo akuzenga ivipinda vyache ivya mumwanya mubuzimbuli, yuyo akubabombezya abantu pabulo, atakubalipila nakamokamo.

¹⁴ Akuti, ‘Nkwiza pakwizengela nemwene inyumba inkulu iya bumwene.’ Po akubikamo ivipinda ivikulu, nkwiza pakubikamo amabwindo amakulu, nukukomamo amatabwa agha mwale, nukughalabannya nibanya ichesamu.

¹⁵ “Nkimba ukwinong'ona ukuti, we mwene uwakubachila abamwinyu, pachifukwa ichakuti uzengeye inyumba yako na matabwa agha mwale? Nkimba ughuso atakaba ni chakulya sona ni chakung'wela? Akabomba chicho chikaba chigholosu sona ni chanaloli po vyosi vikamwendela akiza.

¹⁶ Akabalongela akiza inongwa abapina na bakusobelwa, vyosi vikamwendela akiza. Nkimba ichi chitakulanjizya ukuti ammenye? Ane ne Mwene nanena.

¹⁷ “Loli amaso ghako nu moyo wako vili pabukabi ubwa buzimbuli, vili pakukupula ibanda ilya bantu abasita nongwa nayimoyimo, sona nukubayivya abantu abasita nongwa nayimoyimo, nukufyula ivintu vyabo.”

¹⁸ Polelo u Mwene pakunena nizya Yehoyakimu umwana uwa Yosiya u mwene uwa Yuda akuti, “Atakwiza pakubapo nayumoyumo uwakumulila ukuti, ‘Wee, wamwitu! Wee, muyemba wane!’ Atakwiza pakubapo nayumoyumo uwakumulila ukuti, ‘Wee mwene wane! Wee muchindikiwa wane!’

¹⁹ Akwiza pakusyiliwa ngati mpunda, bakwiza pakumuwesela nukumusumbila kuzi ukwa milyango iya Yelusalemu.”

Nizya Yelusalemu

²⁰ U Mwene akubabuzya abantu aba mu Yelusalemu ukuti, “Kwela kumaghamba agha Lebanoni, nukulila kulakula umwakukolomoka, amazyu ghinyu ghivwike mupaka ku Bashani, mulilaye umwakukolomoka bo muli mumaghamba agha Mowabu, pakuti abamanyani binyu bosi bapotwa.

²¹ Nkakusoka bo ufwasite, loli ukati, ‘Intakwivwa napo panandi!’ Momumo wabeleye bo uchili we mulumendo, utakaghivwila amalamulo ghane.

²² Impepo yikwiza pakubaputila kubutali abadimi bako bosi, sona abaghaniwa bako bakwiza pakubuka nabo kubuzya. Po isoni zikwiza pakukulema sona ukwiza pakusamuka pachifukwa icha bubibi bwako.

²³ Amwe mwe mukwikala munyumba zizyo zizengiwe na makwi agha mwale aghakufuma ku Lebanoni, mukwiza pakulila ngati mukolo yuyo ali mububavu pakabalilo akakupapila.”

U Mwene akwiza pakumufunda u Yehoyakini

²⁴ U Mwene akuti, “Wee Yehoyakini, umwana uwa Yehoyakimu, u mwene uwa Yuda, nkulapa ukuti, napapo wabanga ngati mpete iya munyobe yane indilo, ngali nkakwefyamo.

²⁵ Nkwiza pakukubika munyobe izya bantu babo bakubulonda ubumi bwako, babo ukubanyila, kokuti kwa Nebukadineza u mwene uwa Babiloni sona na bantu bache.

²⁶ Nkwiza pakukusumbila kuchisu ichinji, awe poka nu nyoko yuyo akakupapa, kuko mwebosi mutakapapiliwa, po mukwiza pakufwila kulakula.

²⁷ Mutakwiza pakunyokelako sona kuchisu chicho mukulonda pakunyokelako.”

²⁸ Nkimba u Yehoyakimu yunuyu muntu wenu, yuyo ali ngati yo sonta iya kufwantika, yiyo yitakulondiwa napo panandi? Nkimba choni chicho yuyo poka na bana bache, basumbiwe kuchisu chicho batachimenyepo nalumolumo?

²⁹ Wee chisu, wee chisu, wee chisu, ivwa amazyu agha Mwene!

³⁰ U Mwene akuti, “Mumusimbe umuntu uwa bunubu ngati mughumba, umuntu yuyo atangendelela mubumi bwache pakuti atalipo nayumoyumo uwa luko lwache, yuyo akwiza pakupyanapo ubumwene ubwa Devedi, pamo pakulaghila sona mu Yuda.”