Yelemiya 21 - IBAYIBOLO 2024

Ukunenela zila nizya kunanganika ukwa Yelusalemu

¹ U mwene u Zedekiya uwa chisu icha Yuda akamutuma u Pashuli umwana uwa Malikiya sona nu muputi u Zefaniya umwana uwa Maseya kwa Yelemiya, po bakababuzya akati,

² “Mutubuzikizyeko kwa Mwene pachifukwa ichakuti u Nebukadineza u mwene uwa chisu icha Babiloni akwiza nu bwite. Lumo u Mwene angatubombela ivyika ngati mumo akabombela kale, umwakuti u Nebukadineza angefiwako kukwitu.”

³ Loli u Yelemiya akamula akati, “Mumubuzye u Zedekiya ukuti,

⁴ ‘U Mwene u Chala uwa Izilayeli akuti: Ivilwilo ivya bwite vivyo muvilemite vikwiza pakubanyokela, ivilwilo vivyo mukulwila nu mwene uwa Babiloni nababwite bache, babo bakazyunguliye akaya kinyu bimiliye kuzi ukwa malinga ghinyu. Nkwiza pakubabungannya abasilikali babo mukaya akakulu nkani aka.

⁵ Ane nemwene nkwiza pakulwa namwe namaka ghane ghosi, nukukalala kwane kosi sona nu bukali bwane bosi.

⁶ Nkwiza pakubaghogha bosi babo bakwikala mukaya akakulu nkani aka, kokuti abantu ni vinyamana bulo bakwiza pakufwa ni chiwaya ichakoghofya.’

⁷ Pisinda pache u Mwene akuti, ‘Abantu aba nkwiza pakubabika munyobe izya Nebukadineza u mwene uwa Babiloni nakubalwani babo bakulonda pakubaghogha: U Zedekiya u mwene uwa ba Yuda, poka na makambala ghache na bantu aba mukaya akakulu nkani aka, babo bakapona kuchiwaya nupanga na kuzala. U Nebukadineza akwiza pakubaghogha nupanga, atakwiza pakubapelela ichisa pamo pakubapasikizya pamo pakuba nichililizi.’

⁸ “Ubabuzye abantu uti, ‘U Mwene akuti: Musalepo ubumi pamo ubufwe.

⁹ Umuntu wesi yuyo akwikala mukaya akakulu nkani aka, akwiza pakughoghiwa nupanga, nizala pamo ni chiwaya. Loli bosi babo bakwibika munyobe izya ba Babiloni babo bakubavwima, bakwiza pakuba nubumi.

¹⁰ Nadumula ukuti ntakwiza pakukabombela akaya akakulu nkani aka ichintu ichiza loli ichintu ichibibi. Kakwiza pakubikiwa kwa mwene uwamu Babiloni, sona kakwiza pakochiwa numoto.’ ”

Ubulaghuzi ubwa kubasusya abamwene aba mu Yuda

¹¹ U Mwene akamubuzya u Yelemiya akati, “Ubabuzye abamunyumba iya Yuda uti: Ivwa amazyu agha Mwene.

¹² Wee nyumba iya Devedi! Ulongelaye inongwa mubugholosu indabindabi yosi, yuyo ali muntamyo mumupokaye munyobe iya muyinvyi, yuyo afyuliwa, pamo ubukali bwane bungaka ngati moto, pachifukwa icha bubibi bwinyu, sona nukuti atalipo nayumoyumo uwakughuzimya.

¹³ Nkulwana nawe Yelusalemu, we ukwikala mwikombe pakaghamba aka mabwe ukuti, ‘Nkimba wewenu yuyo angalwana naswe? Nkimba wewenu yuyo akwiza pakwinjila mwilinga lyitu?’ Ane ne Mwene nanena.

¹⁴ “Nkwiza pakubafunda ukuyana ni mbombo zyinyu, Nkwiza pakughocha umusitu winyu, umoto ghukwiza pakulungulizya ivintu vyosi vivyo vibazyunguliye. Ane ne Mwene nanena.”