Yelemiya 20 - IBAYIBOLO 2024

Ukulwana pakasi pa Yelemiya nu muputi

¹ Umuputi u Pashulu umwana uwa Imeli, yuyo akaba we songo uwa Nyumba iya Mwene, akivwa bo u Yelemiya akulaghula amazyu ghanagha,

² po akabalamula abantu ukuti bamukome u Yelemiya umulaghuzi nukumupinya ni mpingu papipi nu Mulyango Uwapamwanya uwa Benjamini mu Nyumba iya Mwene.

³ Indabi yache, bo u Pashulu amwefyamo mujele, u Yelemiya akamubuzya akati, “U Mwene atakakwita ukuti we Pashulu, loli Uwakoghofya Kosi na Kosi.

⁴ Pakuti u Mwene akuti, ‘Nkwiza pakukupela pakuba we muntu uwakoghofya ku wemwene sona na kubamanyani bako, na maso aghako na ghako ukwiza pakubennya bosi bakughoghiwa nupanga uwa balwani babo. Abantu bosi aba mu Yuda bakwiza pakuba pasi pabulaghili ubwa mwene uwa ichisu icha Babiloni, akwiza pakubasenda bamo pakuba bazya sona akwiza pakubaghogha bamo.

⁵ Ichuma chosi icha mukaya akakulu nkani, ubukabi bwache bosi nu katundu wache wesi uwa bamwene aba mukaya aka Yuda, vyosi vinivi vikwiza pakufyuliwa na balwani nukubuka navyo kuchisu icha Babiloni.

⁶ Loli awe Pashulu, poka na bamunyumba yako bosi bakwiza pakulemiwa pakuba bazya nukubuka namwe ku Babiloni. Mukwiza pakufwa nukusyiliwa kulakula poka na bamanyani bako babo bakulaghula ivyabumyasi.’ ”

U Yelemiya akwilumbusya kwa Mwene

⁷ Wee Mwene, wanzimbula, sona nazimbuliwa. Awe uli namaka ukunchila, wampota. Nkobeziwa isiku lyosi, umuntu wesi akunseka.

⁸ Nanti nkuti inene, nkulila, nukukolomoka nemwene bulo nukuti, “Ulombwa kuno! Ukunanganika kuno!” Wee Mwene, nkusekiwa nukusamuliwa akabalilo kosi, pachifukwa ichakuti nkulumbilila amazyu ghako.

⁹ Loli nanti nkunena nkuti, “Ntakwiza pakumutambula u Mwene, pamo pakulinena itabwa lyache,” pakuti izyu lyache lili mumoyo wane ngati moto, lili ngati moto ghugho ghukocha mumafupa ghane. Nalita pakulisunga mukasi, naloliloli ntangachibomba.

¹⁰ Nkubivwa abinji bakuteketa bakuti, “Ukoghofya kuli imbazu zyosi! Mumulongelele! Zagha tumulongelele!” Na bamanyani bane bosi bakulindilila ukuti ingwilemo bakuti, “Lumo angazimbuliwa, po tungamulema nukumutanizya ububibi.”

¹¹ Loli u Mwene ali kulubazu lwane, ngati musilikali uwamaka ghosi, po babo bakunvwima bakwiza pakwipunula sona batakwiza pakumpota. Bakwiza pakukoziwa isoni akabalilo kosi, sona batakwiza pakumpota. Ukukoziwa isoni kwabo kutakwiza pakuluvyiwa.

¹² Wee Mwene Uwamaka Ghosi, wewe ukubayela abagholosu, ukuzyennya zizyo zili mumoyo ghabo na munyinong'ono zyabo. Leka nennye ukutanizya kwako papabo, pakuti nayibika inongwa yane munyobe zyako.

¹³ Mumwimbilaye u Mwene! Mumupalaye u Mwene! Akubapoka abantu babo bakuyiviwa, ukufuma kumaka agha bantu ababibi.

¹⁴ Lighuniwanje isiku lilyo nkapapiliwa! Isiku lilyo umayi akampapilagha litakabanje lisayiwa.

¹⁵ Aghuniwanje umuntu yuyo akiza na mazyu amiza kwa tata, nukumupela pakuba walusekelo bo akumubuzya ukuti, “Kunyumba yako kwapapiwa umwana umulumendo!”

¹⁶ Umuntu yunuyo abanje ngati twaya utukulu nkani, tuto u Mwene atakatupelela ichisa pakutunangannya. Ivwa ukulila ukwa pandabindabi, sona nipati ilya bwite pakasi pamusanya,

¹⁷ pachifukwa ichakuti atakangogha bo indi mulwanda lwache. Po u mayi wane ngali akaba lipumpa lyane, ulwanda lwache ngali lukakulilakulila.

¹⁸ Nkimba choni chicho nkapapiwa? Nkimba nkapapiliwa intamyo ni chitima, nukuti ubumi bwane bumalile mukukoziwa isoni?