Yelemiya 2 - IBAYIBOLO 2024

U Chala akubasungilila aba Izilayeli

¹ U Mwene akambuzya akati,

² “Buka nukufumusya ku muntu wesi mu Yelusalemu ukuti: ‘Nkubukumbuka ubusubiliwa bwako bo we mulumendo, namumo ukanganila ngati mulindu yuyo akulonda pakusendwa, namumo ukendelegha nane munkolongo, muchisu chicho batakabyalamo nachimochimo.

³ U Izilayeli akaba muzelu kwa Mwene, ivikomwa ivyakwanda ivya nyinulo yache, bosi babo bakalyako ivikomwa vinivi bakaba ninongwa, sona ububibi bukabawila. Ane ne Mwene nanena.’ ”

Imbibi izya banyenya aba Izilayeli

⁴ Wee luko ulwa Yakobo, ivwa amazyu agha Mwene, sona na mwe bosi abaluko ulwa Izilayeli.

⁵ U Mwene akukulalusya akuti, “Nkimba bubibi boni bubo abanyenya binyu bakabwagha mumwane, ukuti banchimbile? Bakavyiputa ivifwani ivya mwalwemwalwe nukwipela pakuba bamwalwemwalwe.

⁶ Batakalalusya ukuti, ‘Nkimba ali ko kwiyi u Mwene, yuyo akatufumya muchisu icha Ijiputi, nukutulongolela munkolongo, muchisu ichumizu sona nicha viliba, muchisu icha lulanga sona icha chisi, muchisu mumo atalimo nayumoyumo yuyo akwendamo nukwikalamo?’

⁷ Nkabinjizya muchisu icha muvundo ukuti mulyanje ivikomwa ivyiza sona nivyiza vyosi. Loli mukinjila nukuchinyazya ichisu chane chicho nkabapa nukuchipela pakuba chinyazu.

⁸ Abaputi batakalalusyapo ukuti, ‘Nkimba u Mwene ali kwiyi?’ Abamanyandaghilo batakamanya, abalongozi bakansambukila. Abalaghuzi bakalaghulila mwitabwa ilya chala u Baala, nukuvikonka ivifwani vivyo vite ni mbombo.”

U Mwene akubapa inongwa abantu bache

⁹ Polelo u Mwene akuti, “Nkubapa inongwa, nkwiza pakubapa inongwa abanyenya binyu.

¹⁰ Loboka inyanja ku lubazu ulwa Sayipulasi, nukutuma yumo kubufumilo ubwizuba, ku Kedali ukuti enelezye nkani papipi, ennye nanti chikabapo chimo ngati chinichi.

¹¹ Nkimba lulipo lumo uluko, lulo lwanduyepo lumo abachala babo, napapo bate boba chala? Loli pope bulo abantu bane baghulizannya u Chala wabo uwabuchindamu nabachala babo aba mwalwemwalwe.

¹² Mwee vyisu ivya kumwanya, muswighe nazyo zinizi, mutetemaye sona mubanje nubogha. Ane ne Mwene nanena.

¹³ “Abantu bane babomba imbibi zibili: Bandeka ane ne mbwibwi iya mizi aghakupa ubumi, bikumbiye bene iviziba ivyabo ni vyabo, iviziba vivyo vili nividobozwi vitangasunga amizi.

Aba Izilayeli bakufundiwa pachifukwa icha mbibi

¹⁴ “Nkimba u Izilayeli umubombi, akapapiwa muzya? Po nkimba choni chicho abalwani bache bakumufyula u bukabi bwache?

¹⁵ Abalwani bakubuluma ngati zyo nkalamu. Bachipela ichisu pakuba nkolongo. Batunangannya utwaya twache utukulu tuto twipelite visami sona abantu batakwikalamo.

¹⁶ Sona abantu aba Memfisi naba mu Tapanesi bakuvulazizye pamutu wako.

¹⁷ Zinizi zyakubonekela, pachifukwa ichakuti ukamuleka u Mwene, u Chala wako, bo akukulongozya muzila yiyo ukendaghamo.

¹⁸ Nkimba po choni chicho ukubuka kuchisu icha Ijiputi, pakung'wela amizi mu Nayelo? Nkimba choni chicho ukubuka kuchisu icha Asiliya pakung'wela amizi agha mu Yufuleti?

¹⁹ Ukwiza pakufundiwa nu bubibi bwako, pakuti wankana, nkwiza pakukupa inongwa. Winong'one nkani ububibi nu bubavu ubwa kundeka ane ne Mwene u Chala wako, sona winong'one nizya kusita ukunyila.” U Mwene Uwamaka Ghosi anena.

²⁰ “Pakuti kale ukapyola ikoli lyako nukudumulannya iminyololo yako ukati, ‘Ntakwiza pakukubombela!’ Momumo, pighamba lyosi sona na muntende mwikwi lyosi ilyakuvwinka ukughona nukubomba ubwamalaya.

²¹ Loli nkakubyala ngati mampesya amiza ghagho ghafumite mwikwi ilyiza. Po nkimba ukandeka bulibuli nukwipela pakuba mampesya agha mwisote?

²² Napapo ukoghela itoyi nukubombezya isopo inyinji, pope ubunyazu ubwa mbibi zyako bukuboneka pantazi papane.” U Mwene Uwamaka Ghosi anena.

²³ “Nkimba unganena bulibuli ukuti, ‘Ntinyazizyepo, sona ntabiputitepo lumo aba Baala’? Ennya mumo ukabombela mwikombe, sona wennye nazizyo ukabomba. Wayana bulo ni ngamila inkolo yiyo yikuchimbilila uku na kula,

²⁴ impunda yiyo yizubiye pakwikala munkolongo, yikwinusya impuno zyache mu mpepo bo yikulondela po nkimba wenu yuyo angayikanizya bo yikulondela? Inyanavuli yosi yiyo yikuyikonkelezya, yitakutamiwa pakuyagha bo yikulonda pakwendezya.

²⁵ Utakendaye vinama vyene sona pimilo lyako patakabanje inyota. Loli awe ukati, ‘Chite ni mbombo! Imbaghanite abachala abayeni, sona imbaghiye pakubakonka.’

U Izilayeli abaghiye pakufundiwa

²⁶ “Ngati mumo u mwiba akubela ni soni bo alemiwa, momumo aba Izilayeli bakubela ni soni, na bamwene babo na makambala ghabo na baputi babo sona na balaghuzi babo.

²⁷ Bakunena kwikwi bakuti, ‘Awe we tata wane,’ sona na kumabwe bakuti, ‘Wewe ukampapa.’ Bampiye inkonto, sona batakunyennya, loli mukabalilo kabo akantamyo, bakuti, ‘Zagha utupoke!’

²⁸ Po nkimba abachala babo mukipangila mwebene bali ko kwiyi? Baleke bize nanti bangabapoka bo muli muntamyo! Pakuti awe, we Yuda, uli nabachala abinji nkani ngati mumo ubeleye nutwaya utukulu.

²⁹ “Nkimba choni chicho mukumpa inongwa? Mwebosi munsambukiye. Ane ne Mwene nanena.

³⁰ “Nkabafunda abantu aba mu Yuda, pope batakamanyilapo nachimochimo. Mukabaghogha abalaghuzi nupanga ngati nkalamu yiyo yikalaye.

³¹ Amwe mwe bantu aba nkulilo iya ilelo, ivwa zizyo u Mwene akunena. Nkimba name ne nkolongo kwa Izilayeli pamo ichisu icha chisi ichikulu? Nkimba choni chicho abantu bane bakuti, ‘Aswe twe bantu abasatuke, tutangiza sona kukwako?’

³² Nkimba u mulindu angaluvya ivyakwibonesekezya akiza, pamo u mulindu yuyo akusendwa nkimba angaluvya ivyakuvwala vyache ivya pasendwa? Loli pope bulo abantu bane banduvizye, amasiku ghagho ghatangabelengiwa.

³³ Amwe muzimenye nkani izila nanti mukulonda abaghaniwa binyu! Bope abamalaya bamanyila izila zyinyu imbibi.

³⁴ Mumenda ghinyu mukwaghiwa ibanda ilya bantu abapina babo bate ninongwa nayimoyimo, napapo mutakabagha bakupankula inyumba zyinyu. Loli pavyosi vinivi,

³⁵ mukunena mukuti, ‘Tute ninongwa nayimoyimo, ubukali bwache bwatozoka.’ Loli nkwiza pakubalonga pachifukwa mukuti, ‘Intanangite.’

³⁶ Nkimba choni chicho mukwisamula mwebene pakwendakwenda uku na uku? Aba Ijiputi bakwiza pakubakozya isoni ngati mumo aba Asiliya bakabombela.

³⁷ Kope kulakula mukwiza pakubuleka ubuzilo bo mulemite inyobe zyinyu pamutu, pakuti u Mwene abakana babo mubasubiye, mutakwiza pakubwaghamo nabumobumo ubwavwilizi mumwabo.