Yelemiya 19 - IBAYIBOLO 2024

Isonta iyakutiziwa

¹ U Mwene akambuzya akati, “Buka ughule isonta kumumata isonta. Ubasende abasongo bamo pakasi pabantu sona na baputi bamo,

² ubuke kwi Kombe ilya Beni Hinomu, papipi nu Mulyango uwa Nyinga. Kulakula ufumusye amazyu ghagho nkukubuzya.

³ Ubabuzye uti, ‘Mwee bamwene aba mu Yuda, na bosi babo bakwikala mu Yelusalemu, ivwa ku zizyo ane ne Mwene Uwamaka Ghosi, u Chala uwa Izilayeli nkunena: Nkwiza nintamyo impalapala nkani pabuzilo ubu umwakuti wesi yuyo akwivwa akwiza pakuswigha bulo.

⁴ Nkwiza pakuchibomba ichi pachifukwa ichakuti abantu bandeka, sona babunyazya ubuzilo ubu pakubika ivyakwiyipa ku bachala babo abayeni, babo abene pamo abanyenya babo batabamenye nalumolumo, pamo abamwene aba muchisu icha Yuda. Babwizuzya ubuzilo bunubu nibanda ilya bantu babo bate ninongwa nayimoyimo.

⁵ Bamuzengela ivighemo u chala u Baala umwakuti bochelayepo abana babo pakuba vyakwiyipa ivyakocha. Intakabalamulapo napo panandi ukuti babombe zinizi sona ichi chitakanyendamo munyinong'ono zyane.

⁶ Po u Mwene akuti, akabalilo kakwiza kako ubuzilo ubu butakwiza pakwitiziwa sona ukuti Tofeti pamo Ikombe ilya Beni Hinomu. Mubuzilo bwache bukwiza pakwitiziwanga ukuti, Ikombe Ilyakughoghelako.

⁷ “ ‘Pabuzilo bunubu nkwiza pakuvulungannya imbatiko zyosi izya bantu aba muchisu icha Yuda nicha Yelusalemu. Abalwani babo bakwiza pakubapota nukubaghoghela kubwite. Nkwiza pakuvipa iviyuni ni vinyamana imivimba yabo ukuti cho chibanje chakulya chabo.

⁸ Nkwiza pakukapela akaya akakulu kanaka pakuba chakoghofya nkani sona umuntu wesi yuyo akudumusannyapo palapala akwiza pakuba nubogha sona ni chiswigho pachifukwa icha kunanganika kwache.

⁹ Nkwiza pakubafyenga abantu banaba ukuti balye imibili iya bana babo abalumendo na balindu sona bakwiza pakulyana benebene pakabalilo akakoghofya bo bazyunguliliwe na balwani babo sona na babo bakulonda pakubaghogha.’

¹⁰ “Fwantannya isonta bo abantu bosi babo ukubuka nabo bakwennya.

¹¹ Ubabuzye ukuti, ‘U Mwene Uwamaka Ghosi akuti: Nkwiza pakuchifwantannya ichisu ichi nakaya akakulu kanaka ngati mumo umumata isonta akubombela, isonta yiniyi yitangamatiwa sona. Bakwiza pakubasyila abafwe mu Tofeti pakuti butakwiza pakubapo sona ubuzilo ubunji ubwa kubasyililako.

¹² Momumo nkwiza pakubombela nu buzilo ubu sona na bantu bosi babo bakwikala munumu. Nkwiza pakukapela akaya kanaka ngati kaya aka Tofeti.

¹³ Inyumba izya mu Yelusalemu nizya bamwene aba mu Yuda zikwiza pakunyaziwa ngati nyumba izya ku Tofeti, pachifukwa ichakuti pa visonje ivya nyumba zinizi po papo bakochelaghapo utwakununkila ku bachala aba mumwanya sona bakupungulilapo ichakwiyipa icha vinyo ku bachala abanji.’ ”

¹⁴ Po u Yelemiya akanyokako ku Tofeti kuko u Mwene akamutuma pakulaghula sona akimililagha pa lubinjilo ulwa Nyumba iya Mwene nukubabuzya abantu bosi ukuti,

¹⁵ “Umu momumo u Mwene Uwamaka Ghosi, u Chala uwa Izilayeli akunenela akuti, ‘Teghelezya! Nkwiza pakukizila nintamyo akaya akakulu nkani aka nutwaya tuto tukazyunguliye ngati mumo nkanenela, pachifukwa ichakuti abantu banaba bakazizye nkani amoyo ghabo sona bakukana pakwivwila amazyu ghane.’ ”