Yelemiya 18 - IBAYIBOLO 2024

U Yelemiya ali panyumba iya mumata isonta

¹ U Mwene akamubuzya u Yelemiya akati,

² “Buka kunyumba iya mumata isonta, po kulakula ukwiza pakwivwa amazyu ghane.”

³ Po nkabuka kunyumba iya mumata isonta, nukumwennya pa chakumatilapo isonta.

⁴ Loli isonta yiyo akamatagha yikananganikila munyobe zyache, po umumata isonta yula akamata iyamwabo, akayimata ukuyana namumo umwenecho akalondelagha.

⁵ Po u Mwene akambuzya akati,

⁶ “Wee Izilayeli, nkimba ntangabomba nawe zimo ngati mumo umumata isonta akubombelagha? Ngati litope munyobe iya mumata isonta, momumo nawe ubeleye munyobe zyane.

⁷ Pakabalilo kosi nkulufumusya uluko pamo ubumwene ukuti bunyunkuliwe nukuzepuliwa sona nukubunangannya,

⁸ po nanti uluko ulwa bantu lulo nalusoka lukupinduka nukubuleka ububibi bwache, po nane ntakwiza pakulunangannya ukuyana namumo nkinong'onelagha.

⁹ Sona nanti pakabalilo akanji nkufumusya ukuti uluko pamo ubumwene bukwiza pakwanda nukwikalana,

¹⁰ sona nanti uluko lula lukwendelela pakubomba ububibi pamaso ghane sona lutakunyivwila, po ntakwiza pakulubombela inyiza zizyo nalondagha pakulubombela.

¹¹ “Po ilelo buka ubabuzye abantu aba muchisu icha Yuda na babo bakwikala mu Yelusalemu uti, ‘U Mwene akuti: Nkwinong'ona pakubabombela ichintu ichibibi, sona nkwiyannya nukubatika zizyo nkwiza pakubabombela. Po umuntu wesi anyokeko ku zila zyache imbibi naku mbombo zyache zizyo akuzibomba. Leka inkalo zyinyu imbibi ni mbombo zyinyu.’

¹² Loli bakamula bakati, ‘Chinicho chite nimbombo nayimoyimo. Aswe tukwiza pakwendelela ni mbatiko izyitu ni zyitu, umuntu wesi akwiza pakubomba zizyo inyinong'ono zyache inkafu izya moyo umubibi.’ ”

Abantu bakumukana u Mwene

¹³ Polelo u Mwene akuti, “Lalusya pakasi pa inko, nkimba wewenu yuyo azyivuyepo lumo zinizi? Umulindu wane u Izilayeli abomba ichintu ichinyazu.

¹⁴ Nkimba ukabefu uwamu Lebanoni angepapo pamwanya pamabwe agha? Nkimba amizi ghache amakatazu agha mutusoko ghakupwamo lumo?

¹⁵ Loli pope bulo abantu bane banduvizye, bakochela utwakufukizya ku bachala babo bate nimbombo nayimoyimo, bakwipunula muzila zyabo izyakale. Bakwenda mutuzila utwa mwisote, na mumisebo yiyo yitalimiwepo nalumolumo.

¹⁶ Bakachipela ichisu chabo pakuba chakoghofya, bosi babo bakudumusannyapo bakwiza pakuswigha, sona bakwiza pakupukuzya imutu yabo.

¹⁷ Nkwiza pakubanyampannya pamaso pa balwani babo, ngati yo mpepo iyakubufumilo bwizuba, ntakwiza pa kubalanjizya icheni chane, loli nkwiza pakubalanjizya inkonto yane, mukabalilo akantamyo zyabo.”

Bakubatika pakumubombela ububibi u Yelemiya

¹⁸ Po abantu bakati, “Zagha tubatike pakumubombela ububibi u Yelemiya! Pakuti abaputi bakwiza pakuba naswe akabalilo kosi pakutulongozya, abamahala bakwiza pakutulongozya, sona abalaghuzi bakwiza pakulumbilila amazyu agha Chala. Zagha tumupe inongwa, sona tuleke pakuteghelezya zizyo akunena.”

¹⁹ Po nkiputa nkati, “Wee Mwene, unyivwe, ivwa zizyo abalwani bane bakunena.

²⁰ Nkimba chiza pakutanizya imbibi pa chintu ichiza? Loli abene bankumbiye ichiliba ichibizu ukuti ingwilemo. Kumbuka namumo nkizila kukwako, nukukulambilizya ukuti utozole ubukali bwako.

²¹ Po ilelo Mwene, baleke abana babo bafwanje nizala, baleke bafwile kubwite. Baleke abachi babo babanje bafwilwe, abasita bana nabamobamo. Baleke abalume babo baghoghiwe, baleke abalumendo bafwile kubwite.

²² Ukulila kwivwike munyumba zyabo bo ukubatumila umwalubilolubilo ichilundilo icha bakufyula pakubafyula utwaya twabo. Bakumbite ichiliba ichakuti ingwilemo, sona bateghite ivipingo ukuti bandeme.

²³ Loli awe we Mwene, uzimenye zyosi zizyo bakubatika ukuti bangoghe. Utakabahobokelaye inongwa zyabo, pamo pakuzimya imbibi zyabo. Ubanangannye pamaso ghako, sona mubukalale bwako ubafunde.”