Yelemiya 17 - IBAYIBOLO 2024

Imbibi nu lufundo ulwa Yuda

¹ U Mwene akuti, “Imbibi iya ba Yuda yisimbiwe na kasimbilo aka chela, sona yisimbiwe pamoyo ghabo nibwe ilya dayimondi, na pampembe izya vighemo vyabo.

² Bope na bana babo bakuvikumbuka ivighemo vyabo, ni chifwani chabo icha Ashela, sona muntende mumakwi na patumaghamba ututali.

³ Pamaghamba ghane agha muchisu, ni chuma chinyu sona nu bukabi bwinyu, vikwiza pakufyuliwa na balwani binyu, poka nu buzilo bwinyu ubwapamwanya, pachifukwa icha mbibi zyinyu zizyo mubombite muchisu chinyu chosi.

⁴ Mukwiza pakutagha vyosi ivya pachilingo, vivyo nkabapa pachifukwa icha kupuvya kwinyu. Nkwiza pakubapela bazya abakubabombela abalwani binyu, muchisu chicho mutachimenyemo lumo, pakuti ubukali bwane bukwaka ngati moto ghugho ghutakuzimamo nalumo.”

Ulusayo ni nguno

⁵ U Mwene akuti, “Mughuniwa umuntu yuyo akundeka ane, nukubika ulusubilo lwache mubantu, akweghamila ku bwavwilizi ubwa bantu, sona u moyo wache ghuli kubutali nu Mwene.

⁶ Umuntu ngati yunuyu ayanite bulo ni chivwati icha munkolongo; atakwiza pakubwennyapo ubwiza. Akwiza pakwikala munkolongo, mumo mutalimo amizi naghamoghamo, muchisu icha mbeya mumo mutalimo nu muntu uwakwikalamo.

⁷ “Musayiwa umuntu yuyo ali nu lusubilo mwa Mwene, yuyo abikite umoyo wache ghosi mu mwache.

⁸ Akwiza pakuba ngati likwi lilyo libyaliwe mulubazu ulwa lusoko lilyo amagululuzi ghache ghakutabila kulusoko. Litakunyilapo nu butukizu, akabalilo kosi amani ghache mateta. Litakupasyapo nululanga, sona litakupotwa pakwela ivikomwa.”

⁹ U moyo uwa muntu chintu ichizimbuli ukuchila ivintu vyosi. Nkimba wenu yuyo angawivwisya?

¹⁰ “Ane ne Mwene nkwenelezya inyinong'ono, nukughupima umoyo, nkumupa umuntu umuvwalo ukuyana ni nkalo yache, sona ukuyana ni mbombo zyache.”

¹¹ Ngati mumo inkwale yikubalulila amafumbi ghagho yitakatela momumo abeleye nu muntu yuyo akukabila ichuma muzila imbibi. Bo amasiku agha bumi bwache ghapalamila bakwiza pakumuchimbila po pabumalilo akwiza pakuboneka muntu umupunganu.

¹² Inyumba yitu iyakumwiputilamo u Chala, yili ngati chitengo icha bumwene ubuchindamu ukufuma pabwandilo.

¹³ Wee Mwene we lusubilo ulwa ba Izilayeli, abantu bosi babo bakukukana bakwiza pakukoziwa isoni. Babo bakukuleka bakwiza pakusyiliwa mulufumbi pachifukwa ichakuti bamukana u Mwene, imbwibwi iya mizi amumi.

U Yelemiya akumulaba u Mwene ukuti amwavwe

¹⁴ Wee Mwene, umpozye po nkwiza pakupola, umpoke po nkwiza pakupona, pakuti wewe nkukupala.

¹⁵ Abantu bakundalusya bakuti, “Nkimba izyu ilya Mwene lili kwiyi? Lileke lyizaye.”

¹⁶ Intakachimbila ukuti indeke pakuba mudimi wako, sona uzimenye ukuti intakalilonda isiku ilya ntamyo. Chosi chicho chikufuma mumulomo wane uchimenye.

¹⁷ Utakanyoghofyanje, awe nkuvwamamo mukabalilo akantamyo zyane.

¹⁸ Leka abalwani bane bakoziwanje isoni, loli ane intakakoziwanje isoni, leka ubogha bubaleme, loli ane butakanyaghaye. Ubatumile intamyo, ubanangannye, sona nako kuboneka batakabonekaye.

Isiku Ilyakutuzya libanje lizelu

¹⁹ U Mwene akambuzya akati, “Buka wimilile pa Mulyango uwa bantu ghugho abamwene aba mu Yuda bakwinjililapo nukufumilapo, wimilile sona pamilyango yosi iya Yelusalemu.

²⁰ Ubabuzye ukuti, ‘Mwe bamwene aba muchisu icha Yuda, ivwa amazyu agha Mwene sona nu muntu wesi uwa muchisu icha Yuda, na bosi babo bakwikala mu Yelusalemu, babo bakwinjilila pamilyango yiniyi.

²¹ U Mwene akuti: Muchebaye, mutakanyamulaye u katundu Pisiku Ilyakutuzya sona mutakinjilaye nawe pamilyango iya Yelusalemu.

²² Mutakanyamulaye u katundu uwa munyumba zyinyu, pamo mutakabombaye imbombo Pisiku Ilyakutuzya, loli libanje lizelu, ngati mumo nkubalamulila abanyenya binyu.

²³ Loli pope bulo batakivwila, sona bakighalila amakutu ghabo, nukughakazya amoyo ghabo, pamo pakuleka pakwivwila ivimanyisyo vyane.

²⁴ U Mwene akuti: Loli nanti mukunyivwila, sona mutakwinjila nu katundu pamilyango iya kaya akakulu nkani Pisiku Ilyakutuzya, loli mukulisunga pakuba lizelu sona mutakubombapo imbombo Pisiku Ilyakutuzya,

²⁵ po abamwene abakwikala pachitengo icha Devedi bakwiza pakwinjila pamulyango uwa kaya akakulu nkani kanaka poka na makambala ghabo. Abene poka na makambala ghabo bakwiza pakukwela mungolo na pafalasi bo bakulongozannya na bantu aba muchisu icha Yuda na babo bakwikala mu Yelusalemu, po abantu banaba bakwiza pakwikalaghamo bwila na bwila.

²⁶ Abantu aba mutwaya utukulu utwa Yuda naba mutwaya utwa kuzyungulila u Yelusalemu, naba muchigaba icha Benjamini bakwiza pakwiza nakutughamba utwakubwinjililo bwizuba, naku Negebu, bo bakwiza ni vyabupi sona ni vyakwiyipa ivya kocha, ni vyakwiyipa ivya busu nu twakununkila sona ni vyakwiyipa ivyakupalizikizya ku Nyumba iya Mwene.

²⁷ Loli nanti mutakunyivwila nukulisungilila Isiku Ilyakutuzya ukuti libanje lizelu sona nanti mutakunyamula u katundu bo mukwinjila pamilyango iya Yelusalemu Pisiku Ilyakutuzya, po nkwiza pakukozya u moto pamilyango iya Yelusalemu, ghugho ghutakuzimapo nalumo. U moto ghula ghukwiza pakulungulizya amalinga ghache.’ ”