Yelemiya 16 - IBAYIBOLO 2024

Isiku ilya ntamyo impalapala nkani

¹ U Mwene akambuzya akati,

² “Utakasendaye u mukolo nukupapa abana mubuzilo ubu.”

³ Pakuti umu momumo u Mwene akunenela nizya bana abalumendo na balindu babo bapapiliwe muchisu ichi sona nizya bakolo babo bo banyina sona na banavuli babo bo bawise:

⁴ “Bakwiza pakufwa nu bubine ubupalapala nkani. Batakwiza pakubalila pamo pakubasyila loli bakwiza pakuba ngati vinyazu vivyo vili pachisu. Bakwiza pakufwa nu bwite sona nizala. Imivimba yabo yikwiza pakuba chakulya icha viyuni ni vinyamana.”

⁵ U Mwene akuti, “Mutakinjilayemo munyumba mumo muli ichililo. Mutakalilaye pamo ukulanjizya ichitima, pakuti nefyamo umutende wane nu lughano lwane sona ni chisa chane mubantu banaba.

⁶ Bosi abasongo na banandi bulo, bakwiza pakufwila muchisu chinichi. Batakwiza pakubasyila pamo pakubalila, sona atalipo nayumoyumo uwakwibola mwene pamo uwakwimwa mwene kumutu, pachifukwa icha chitima.

⁷ Atalipo nayumoyumo uwakubapa ichakulya abafwilwe ukuti abasangalusye pa vitima ivya bufwe ubwa wise pamo unyina. Sona atakabepo nayumoyumo uwakubapa ichakung'wela ichakubasangalusya.

⁸ “Sona mutakinjilaye munyumba yiyo muli ulusekelo nukwikala ukuti mulye nukung'wela nabo.

⁹ Pakuti u Mwene Uwamaka Ghosi u Chala uwa Izilayeli akuti, ‘Pabuzilo bunubu nkwiza pakumazya amazyu agha lusekelo nu buhobosu, sona nkwiza pakwefyapo izyu ilya yuyo akusenda na yuyo akusendiwa.’

¹⁰ “Bo ukubabuzya abantu banaba amazyu ghosi ghanagha po bakukulalusya bakuti, ‘Nkimba choni chicho u Mwene alamula ukuti ichintu ichipalapala ngati chinichi chituwile? Nkimba twananga ichoni? Fwandi twamubombela mbibi yoni u Mwene u Chala witu?’

¹¹ Po awe ubamule uti, ‘Pachifukwa ichakuti abanyenya binyu bakandeka, po bakabakonka abachala abanji nukubabombela sona bakanda pakubiputa. Bakankana sona batakazisunga indaghilo zyane.

¹² Loli amwe mwabomba ububibi nukuchilapo pabubo abanyenya binyu bakabomba. Umuntu wesi akubukonka ububibi ubwa moyo wache umukafu mubuzilo ubwa kunyivwila.

¹³ Po nkwiza pakubasumbila kuzi kuchisu ichi, muchisu chicho amwe poka na banyenya binyu mutachimenye, mulamula momumo mukwiza pakubabombela abachala abanji pamusanya na pabusiku pakuti ntakwiza pakuba namwe ni chisa nachimochimo.’ ”

U Mwene akwiza pakubefyamo aba Izilayeli mubuzya

¹⁴ U Mwene akuti, “Akabalilo kakwiza kako abantu batakwiza pakunena sona ukuti, ‘Nkulapila mwa Mwene umumi, yuyo akabefyamo aba Izilayeli muchisu icha Ijiputi,’

¹⁵ loli bakwiza pakunena ukuti, ‘Nkulapila mwa Mwene umumi, yuyo akabefya abantu bache muchisu icha kumitu na muvyisu vyosi vivyo akabachimbizizyako.’ Pakuti nkwiza pakubanyosezyamo muchisu chicho nkabapa abanyenya babo.”

¹⁶ U Mwene akuti, “Loli ilelo nkwiza pakubatumila abaloba iswi abinji nkani, babo bakwiza pakubaloba abantu banaba. Pisinda pache nkwiza pakubatumila ababingi abinji nkani, po bakwiza pakubabinga mumaghamba ghosi na mutughamba tosi sona na mumpako izya mabwe.

¹⁷ Pakuti amaso ghane ghakuzyennya inkalo zyabo zyosi imbibi, batavwamite kukwane napo panandi, sona yitalipo nayimoyimo imbibi yiyo intayimenye

¹⁸ Nkwiza pakubanyosezya ulufundo kabili pachifukwa icha mbibi zyabo, pachifukwa ichakuti bachinyazya ichisu chane na bachala abanji abafwe sona bachizuzya ichilingo chane ni vifwani ivyamwiko.”

U Yelemiya akubika ulusubilo lwache mwa Mwene

¹⁹ Wee Mwene, awe we maka ghane, nilinga lyane sona nkuvwamila mumwako mukabalilo akantamyo, inko izya bantu izya ukufuma pachisu ichapasi, zikwiza pakwiza kukwako nukuti, “Abanyenya bitu batakapyanapo chimo, loli abachala aba bumyasi sona na vivyo vite ni mbombo nayimoyimo.

²⁰ Nkimba abantu bangipangila bene abachala ababo na babo? Awe, nanti bangapanga, kokuti batangaba bo bachala aba naloli.”

²¹ U Mwene akuti, “Po nkwiza pakubamanyisya lyoka bulo amaka ghane nu bukulu bwane. Po bakwiza pakumanya ukuti, ane ne Mwene.”