Yelemiya 15 - IBAYIBOLO 2024

Intamyo inkulu kuba Yuda

¹ Po u Mwene akambuzya akati, “Napapo u Mozesi nu Samuweli bangimilila pamaso papane nukubiputila abantu banaba, pope bulo ngali intakabapelela ichisa abantu banaba. Befyepo pamaso papane! Babuzye babukaye!

² Sona nanti bakukulalusya bakuti, ‘Nkimba tubukaye kwiyi?’ ubabuzye uti: U Mwene akuti, ‘Babo ubufwe bubabaghiye, bafwanje, babo upanga ababaghiye, bafwanje nupanga, babo izala yibabaghiye, bafwanje nizala, babo ubuzya bubabaghiye, babukaye kubuzya.’ ”

³ U Mwene akuti, “Nkwiza pakubatumila ivintu folo ivyakubanangannya, upanga uwakubaghoghela, imbwa izyakubaluma, ni viyuni, sona ni vinyamana ukuti vibalye nukubanangannya.

⁴ Nkwiza pakubapela abantu aba mu Yuda pakuba chintu chakoghofya mubumwene bosi ubwa muchisu ichapasi pachifukwa icha vivyo u Manase u mwana uwa Hezekiya u mwene uwa ba Yuda akabomba mu Yelusalemu.

⁵ Wee Yelusalemu, nkimba wewenu yuyo angakupelela ichisa? Nkimba wewenu yuyo akwiza pakukulila? Fwandi wewenu yuyo atakwiza pakukulalusya nizya bumi bwako?”

⁶ U Mwene akuti, “Mwankana, mwanyokela mwisinda. Po nane nkwiza pakugholosya inyobe yane nukubanangannya, sona nalita pakubahobokela.

⁷ Nkwiza pakubapeta nuluselo ngati lyelelo mukaya akakulu nkani. Nkwiza pakubapela bafwilwe nukubanangannya abantu bane, pachifukwa ichakuti batakunyokako kunkalo zyabo imbibi.

⁸ Nkwiza pakonjelezya ubwinji ubwa bakolo abafwilwe, ukuchila nu musesenga uwa munyanja. Nkwiza pakubasendela uwakubanangannya, abamayi na bana babo pakasi pamusanya, Umwakuchenusya bulo nkwiza pakubizila nintamyo ni vyakoghofya.

⁹ U nyina uwa bana seveni akwiza pakuzilika nukuzililika. Izuba likwiza pakumwinjilila pakasi pamusanya bulo. Akwiza pakukoziwa isoni nukusamuliwa. Abakusyalikila bosi nkwiza pakubaghogha pamaso pabalwani babo. Ane ne Mwene nanena.”

U Yelemiya akwilumbusya kwa Mwene

¹⁰ Wee mayi, nkimba choni chicho nkapapiwa, ukuti imbe wakulwana na bantu pachisu chosi? Intakopezizyepo lumo indalama ku muntu sona intakopitepo nalumo ku muntu, loli pope bulo bakunguna.

¹¹ U Mwene akamula akati, “Naloliloli nkwiza pakukupoka umwakuti ube akiza, momumo abalwani bako bakwiza pakukulaba pakabalilo akantamyo naka vitima.

¹² Nkimba umuntu angapyola ichela, ichela icha kumitu pamo umukuba?

¹³ Ubukabi bwinyu ni chuma chinyu nkwiza pakuvibika kubalwani binyu ukusita kubikilapo nachimochimo pachifukwa icha mbibi zyinyu zyosi, muchisu chinyu chosi

¹⁴ Nkwiza pakubapela pakuba bazya kubalwani binyu muchisu chicho amwe mutachimenyepo nalumolumo, pakuti ubukali bwane buli ngati moto ghugho ghukwiza pakwaka bwila na bwila.”

¹⁵ Po nkati, “Wee Mwene uzimenye zyosi, unkumbuke nukunsungilila. Ubatanizye imbibi babo bakunvwima. Umpelele ichisa sona utakabusende ubumi bwane. Uzimanye ukuti nkutamiwa pachifukwa icha wewe.

¹⁶ Bo nivwa amazyu ghako, nkaghalya, ghakipela pakuba lusekelo nu buhobosu mumoyo wane, pakuti nkumanyikwa ni tabwa lyako, wee Mwene u Chala Uwamaka Ghosi.

¹⁷ Intakikala poka na bantu abantuko, intakasekelela poka nabo, nkikala nemwene, pachifukwa ichakuti inyobe yako yikaba papane sona umoyo wane ghukizula nubukali.

¹⁸ Nkimba choni chicho ukubaba kwane kutakumala ichilonda chane chitakupola sona choni chicho chitangapoziwa? Nkimba ukulonda pakuba ngati kasoko kako kakupwa, sona ngati mbwibi yiyo yikukamuka?”

¹⁹ U Mwene akamula akati, “Nanti mwapinduka, nkwiza pakubapokela ukuti mumbombelaye. Nanti mukunena vivyo vibaghiye, amazyu agha mwalwemwalwe awe, po mukwiza pakuba mwe balaghuzi bane. Baleke abantu banaba banyokele kukwako, loli awe utakanyokelaye kukwabo.

²⁰ Nkwiza pakukupela awe pakuba we lubumba ulwa bantu aba, ilinga ilya mukuba. Bakwiza pakulwa nawe, loli batakwiza pakukupota, pakuti ane indi nawe pakukwavwa nukukupoka. Ane ne Mwene nanena.

²¹ “Nkwiza pakukupoka ku bantu ababibi sona nkwiza pakukutabula ku bantu abakali.”