Yelemiya 14 - IBAYIBOLO 2024

Ululanga nizala sona nupanga

¹ Agha gho mazyu agha Mwene kwa Yelemiya pakunena nizya lulanga aghakuti,

² “Aba Yuda bakulila, utwaya utukulu tukutamiwa, abantu bakughalaghata pasi nukuchililila ichisu, sona ukulila kukwivwika mu Yelusalemu.

³ Abachindikiwa bakubatuma abambombo pakusemba amizi, bakubuka ku viziba, loli batakughaghako amizi. Bakunyokela ni sonta zizyo zite na mizi naghamoghamo, bali ni soni sona bitwikite inyobe zyabo pamitu yabo.

⁴ Ichisu chumizu pachifukwa ichakuti ivula yitakutima, Abalimi bali ni soni sona bitwikite inyobe zyabo pamitu yabo.

⁵ Yope imbabala iya mwisote yikumuleka umwana yuyo apapiwa bulo, pachifukwa ichakuti isote nalimo.

⁶ Impunda zikwimilila pamwanya patughamba, sona zikufuta ngati bo bakambwe babo bali ninyota, Amaso ghabo ghali nakafobela pachifukwa ichakuti isote nalimo.”

⁷ Abantu bakuti, “Napapo imbibi zyitu zikutubikila ubwakaboni, wee Mwene, bombapo zimo pachifukwa icha itabwa lyako. Pakuti twakukana, sona twakunangila akabalilo kosi.

⁸ Wee lusubilo ulwa ba Izilayeli, we Mupoki wabo pakabalilo akantamyo, nkimba choni chicho ukuba ngati we muyeni muchisu, ngati mwendazila yuyo akwikalamo bulo ubusiku boka mpela?

⁹ Nkimba choni chicho uli ngati muntu yuyo achenuziwa bulo, ngati musilikali yuyo ate namaka pakubapoka abantu? Loli pope bulo awe we Mwene uli pakasi papitu, sona tukwitiziwa nitabwa lyako, utakatuleke twebene!”

¹⁰ Umu momumo u Mwene akukunena nizya bantu aba akuti, “Bighanite nkani pakwendakwenda, batakuvikanizya ivinama vyabo. Po u Mwene atakubapokela sona akwiza pakubukumbuka ububibi bwabo nukubafunda pachifukwa icha mbibi zyabo.”

¹¹ Po u Mwene akambuzya akati, “Utakabiputilaye nukubalondela ubwiza abantu banaba.

¹² Napapo bangatuzya pakulya, ntakwiza pakwivwa ukulila kwabo, napapo bangabika ivyakwiyipa ivyakocha sona ni vyakwiyipa ivya busu pope bulo ntakwiza pakubapokela. Mubuzilo bwache, nkwiza pakubanangannya nupanga, nizala sona ni chiwaya.”

¹³ Loli ane nkati, “Wee Mwene Uwamaka Ghosi! Abalaghuzi bakubabuzya bakuti, ‘Mutakwiza pakubwennyamo ubwite, pamo izala muchisu chinyu loli mukwiza pakuba nu mutende muchisu ichi.’ ”

¹⁴ Po u Mwene akambuzya akati, “Abalaghuzi bakulaghulila mwitabwa lyane bakunena ubumyasi. Intabatumite awe, pamo ukubasala pamo ukunena nabo. Bakubalaghulila muvisetuka ivyabumyasi, pamo pakunena ni mizimu iya bafwe, pamo pakwiputa ku vifwani, sona bakunena ivya munyinong'ono zyabo imbibi.

¹⁵ Polelo, u Mwene akunena nizya balaghuzi akuti: Abalaghuzi babo bakulaghulila mwitabwa lyane intabatumite awe. Bakubabuzya bakuti, ‘Mutakwiza pakufwa kubwite awe, pamo nizala muchisu ichi.’ Loli abalaghuzi banaba bo babo bakwiza pakughoghiwa nu bwite pamo nizala.

¹⁶ Sona abantu babo bakubalaghulila bakwiza pakusumbiwa mumisebo iya mu Yelusalemu pachifukwa icha zala nu bwite. Atakwiza pakubapo nayumoyumo uwakubasyila pamo abachi babo, abana babo abalumendo pamo abalindu. Nkwiza pakubafunda nintamyo zizyo zibabaghiye.

¹⁷ Ubabuzye amazyu agha uti, ‘Amaso ghane ghakwiza pakwizula na masozi, pabusiku na pamusanya umwakusita kulekapo, pakuti abantu bane abasaliwa bavulaziwa nkani, sona bali ni vilonda.

¹⁸ Nanti nkubuka mutwaya, nkwagha ukuti abantu abinji baghoghiwe kubwite. Nanti nkubuka mukaya akakulu nkani, nkubennya abantu bali nizala. Bosi abalaghuzi na baputi, babukite muchisu chicho batachimenye.’ ”

¹⁹ Abantu bakuti, “Nkimba wabakanila zila abantu aba muchisu icha Yuda? Nkimba ukubasamula abantu aba mu Ziyoni? Fwandi choni chicho watuvulazya umwakuti tukupotwa nukupola? Twaghulindililagha umutende loli butalipo nu bwiza nabumobumo. Twalondagha pakupola loli bogha bwene.

²⁰ Wee Mwene, tukwitika ububibi bwitu, sona ni mbibi izya banyenya bitu, pakuti naloliloli twakunangila.

²¹ Pachifukwa icha itabwa lyako utakatuleke twebene, utakachisamulaye ichitengo chako icha bumwene icha buchindamu. Ukumbukaye ulufingo lwako lulo ukafingana naswe, sona utakalunangannyanje.

²² Nkimba alimo yumo u chala umumyasi, pakasi pa inko izinji yuyo angapela ivula? Nkimba mumwanya mungapela ivula? Wee Mwene u Chala witu, awe wewe wemwene. Pakuti tukusubiye wenewe mpela pakuti wewe ukuzibomba zyosi zinizi.”