Yelemiya 13 - IBAYIBOLO 2024

Ulamba umutonte

¹ U Mwene akambuzya akati, “Buka ughule ulamba umutonte nukuvwala mumusana wako loli utakamuzubikaye mu mizi.”

² Po nkaghula ulamba ukuyana namumo u Mwene akambuzizya, nkamuvwala mumusana.

³ U Mwene akambuzya sona akati,

⁴ “Senda ulamba yuyo ukaghula yuyo uvwalite mumusana, nyamuka ubukaye kulusoko ulwa Yufuleti nukumufisa mumpako iya mabwe.”

⁵ Po nkabuka nukumufisa ulamba yula ku Yufuleti, ukuyana namumo u Mwene akambuzizya.

⁶ Bo ghachilapo amasiku aminji, u Mwene akambuzya akati, “Nyamuka, buka ku Yufuleti nukusenda ulamba yuyo nkakubuzya ukuti umufise kulakula.”

⁷ Po nkabuka kulusoko ulwa Yufuleti, nkafukula nukusenda ulamba kuko nkamufisa. Loli nkennya ukuti ananganikite sona ate ni mbombo nayimoyimo.

⁸ Po u Mwene akambuzya sona akati,

⁹ “Umu momumo nkwiza pakubombela pakughamalizya amituvyo agha Yuda na mituvyo agha Yelusalemu.

¹⁰ Abantu ababibi aba, babo bakukana pakuteghelezya ku mazyu ghane, sona bakukonka ubukafu ubwa moyo ghabo, bakubabombela nukubiputa abachala abanji, bakwiza pakuba ngati we lamba yuyo ate nimbombo nayimoyimo!

¹¹ Pakuti ngati mumo ulamba akupinyiwa mu musana uwa muntu, momumo nkalondelagha ukuti aba Izilayeli sona naba Yuda bipinyilile bene kukwane umwakuti babanje bantu bane, ukuti balipalaye itabwa lyane nukulichindika. Loli batakivwila.”

Utunyambi utwa makwela

¹² U Mwene u Chala akambuzya akati, “Ubabuzye uti umu momumo u Mwene u Chala uwa Izilayeli akunenela: Utunyambi tosi twizuziwe nu vinyo. Po nanti bakukulalusya bakuti, ‘Nkimba tutazimenye ukuti utunyambi tosi tubaghiye pakwizuziwa nuvinyo?’

¹³ Po ubabuzye uti u Mwene akuti, ‘Nkwiza pakubizuzya nubwachingw'ela abantu bosi babo bakwikala muchisu ichi. Abantu banaba bo aba: Abamwene babo bakwikala pachitengo icha Devedi, na baputi, na balaghuzi, sona na bantu bosi babo bakwikala mu Yelusalemu.

¹⁴ Nkwiza pakubakomezya imitu abawise nabana. Ntakwiza pakubapelela ichisa napo panandi sona ntakwiza pakubahobokela mupaka imbanangannye.’ ”

U Yelemiya akubasoka ukuti batakituvyanje

¹⁵ U Mwene akuti, “Mwee ba Izilayeli, ivwa nukuteghelezya, mutakituvyanje.

¹⁶ Mumuchindikaye u Mwene u Chala winyu bo achili pakwiza nichisi, bo ivinama vyinyu vitipunuye muchisi icha mumaghamba. Mukulindilila ulukozyo, loli akwiza pakulupela pakuba chisi ichakoghofya.

¹⁷ Loli nanti mutakuteghelezya, nkwiza pakubalilila kubusyefu, pachifukwa icha mituvyo ghinyu, amaso ghane ghakwiza pakulila nkani, ghakwiza pakwizula namasozi pachifukwa ichakuti ing'ozi izya Mwene zili mubuzya.

¹⁸ “Umubuzye u mwene nu nyina uti, ‘Ika pa vitengo vyinyu ivya bumwene, pakuti impumpu zyinyu izya buchindamu, zyavuliwa kumitu yinyu.’

¹⁹ Utwaya utukulu utwa kuntende tukwiza pakwighaliliwa, sona atakwiza pakubapo nayumoyumo uwakutwighula. Abantu bosi aba mu Yuda basendiwa pakuba bazya, wesi asendiwa pakuba muzya.

²⁰ “Mwee ba mu Yelusalemu, ennya, mubennye abalwani binyu aba kumitu. Nkimba umudimo ghugho ghukapeghiwa kukwinyu ghuli kwiyi, ing'ozi zizyo mukituvyikilamo zili ko kwiyi?

²¹ Nkimba mukwiza pakunena choni, nanti u Mwene abimika abantu banaba pakuba balaghili binyu? Nkimba chitakwiza pakubababa, ngati mukolo yuyo akusayiwa?

²² Nanti mukwilalusya mwebene mukuti, ‘Nkimba choni chicho zyosi zinizi zyatuwila?’ Pachifukwa icha mbibi zyinyu inyinji ivyakuvwala vyinyu vyazepuliwa sona amabili ghinyu ghayinviwa.

²³ Nkimba umu Etiyopiya angawandula umubili wache, pamo nkimba uzyela angaghandula amabala ghache? Nkimba po mwatinji mungabomba bulibuli ubwiza mwe mwizubiye pakubomba ububibi?

²⁴ “Ane nkwiza pakubanyampannya ngati lyelelo lilyo likupupuziwa ni mpepo iya munkolongo.

²⁵ Ichi cho chigaba chinyu chicho imbagabiye, pachifukwa ichakuti munduvizye, nukubasubila abachala abazimbuli. Ane ne Mwene nanena.

²⁶ “Nkwiza pakukuvwinkula ichakuvwala chako bo ukwennya namaso ghako, sona inkule yako yikwiza pakuboneka pabuzelu.

²⁷ Nabwennya ubunyazu bwako, ubwamalaya bwako, ni chinyonywa chako! Navyennya ivyakubombiwa vyako ivinyazu, ivyakubombiwa pamaghamba sona namumaghunda. Wee Yelusalemu! Chighune kukwako. Nkimba ukwiza pakuswefiwa liyi?”