Yelemiya 12 - IBAYIBOLO 2024

Ukwilumbusya ukwa Yelemiya

¹ Wee Mwene umugholosu, nalondagha pakususannya nawe. Nkimba choni chicho ababibi bakwendelelagha pakuba bakabi? Nkimba choni chicho ivintu vikubendelagha akiza abazimbuli?

² Wewe ukubyala makwi sona amagululuzi ghache ghakwisimika ghakukula nukwela ivikomwa. Bakukunena akabalilo kosi, loli amoyo ghabo ghali kubutali nawe.

³ Loli pope bulo awe wee Mwene ummenye nkani, Ukunyennya nukuzipima nyinong'ono zyane namumo nkughaniye. Ubawesele kubutali abantu ababibi banaba ngati yo ng'ozi yiyo yikwiza pakughoghiwa. Ubapaghule ukuti balindililaye isiku ilya kughogheliwa.

⁴ Nkimba ichisu chikwiza pakubanga chisanya mupaka liyi? Nkimba isote likwiza pakubanga lyumizu mupaka liyi? Pachifukwa ichakuti abantu babo bakwikala mulamula babibi, ivinyamana ni viyuni vikufwa. Loli pope bulo abantu bakwituvya bakuti, “U Chala atakuzyennya zizyo tukubomba.”

⁵ U Mwene akamula akati, “Yelemiya, nanti ukulita pakuchimbila na bantu babo bakwenda pasi pa kupotana, po nkimba ukwiza pakupotana bulibuli ni falasi? Nkimba nanti ukuwa nukutyelemuka bo ukwenda muchisu icha mutende, po nkimba zikwiza pakubanga bulibuli munkolongo iya lusoko ulwa Yolodani?

⁶ Pakuti nabo bawamwinyu sona naba munyumba yako bakukulongelela ukuti ufwanje. Utakabasubilaye, napapo mu mazyu ghabo bakuba ngati po bamanyani bako.

U Mwene akubalilila abantu bache

⁷ “Imbalekite aba Izilayeli, imbakanite abampyana yane, Nababika abaghaniwa bane munyobe izya balwani babo.

⁸ Abachilingo chane bali ngati nkalamu zizyo zili mumusitu. Bakumbulumila nizyu ilya bukali, cho chifukwa imbabengite.

⁹ Abantu aba mpyana yane bali ngati chiyuni icha mabala, chicho chizyunguliliwe na mazwanga. Leka ivinyamana vyosi ivya mwisote vibungane nukubalya.

¹⁰ Abadimi abinji baghunangannya umughunda wane uwa mampesya, sona bakughukanyankila, baghupela umughunda wane umwiza ghula pakuba nkolongo.

¹¹ Naloliloli baghupela pakuba nkolongo, ghukundilila sona ghuli wene bulo, Ichisu chosi chipela chisami pamaso papane, pachifukwa ichakuti atalipo nayumoyumo uwakughulindilila.

¹² Abakunangannya bakwiza mubuzilo bosi ubwapamwanya bubo buli munkolongo. Pakuti ubwite ubwa Mwene bukwiza pakuchinangannya ichisu ukwandila kubwandilo mupaka kubumalilo, sona atalipo nayumoyumo uwakupona.

¹³ Bakwiza pakupesa ingano, loli bakwiza pakuvuna amivwa. Bakwiza pakulita nkani pakubomba imbombo, loli batakwiza pakuvunamo nakamokamo. Inyinulo yabo yikwiza pakubakozya isoni pachifukwa icha bukali ubwa Mwene.”

U Mwene akuzilayizya inko izinji

¹⁴ U Mwene akuti, “Nizya bapalamani bane bosi ababibi babo bakufyula ichilingo chicho nkabapa abantu bane aba Izilayeli, nkwiza pakubefyamo muchisu chilachila sona nkwiza pakubanyunkulannya aba muchisu icha Yuda mukasi mumwabo.

¹⁵ Loli bo nabanyunkulamo, nkwiza pakubapelela sona ichisa abapalamani bala, sona nkwiza pakulunyosezya uluko losi kuchilingo chache na kuchisu ichache ni chache.

¹⁶ Loli pisinda pache nanti nu moyo ghosi bangamanyila pakwenda muzila izya bantu bane, nukulapila mwitabwa lyane bo bakunena ukuti, ‘Nkulapila mwitabwa ilya Mwene Umumi,’ ukuyana namumo bakabamanyisikizya abantu bane pakulapila mwitabwa ilya Baala, po bakwiza pakwikala poka na bantu bane, sona bakwiza pakwikala mukasi mubantu bane.

¹⁷ Loli nanti uluko luli losi lutakunteghelezya, nkwiza pakulunyunkulannya nukulunangannya. Ane ne Mwene nanena.”